అక్షరటుడే, వెబ్డెస్క్: Asian Games Medals | ఆసియా క్రీడల్లో గురువారం భారత్ మూడు పతకాలు గెలుచుకుంది. సెయిలింగ్ స్కిఫ్ విభాగంలో మను ఫ్రాన్సిస్, ప్రిన్స్ కురిసింకల్ రజతం గెలుచుకున్నారు. ఇది భారత్కు తొలి సెయిలింగ్ పతకం కావడం గమనార్హం.
ప్రిన్స్ నోబుల్, మను ఫ్రాన్సిస్ రజత పతకం సాధించి చరిత్ర సృష్టించారు. ఆసియా క్రీడల్లో (Asian Games) తొలిసారిగా అడుగుపెట్టిన ఈ భారత జంట, చైనాకు చెందిన వెన్ జైడాంగ్, లియు టియాన్‌ల వెనుక రెండవ స్థానంలో నిలిచి, ఐచి-నగోయాలో దేశానికి మొట్టమొదటి సెయిలింగ్ పతకాన్ని సాధించారు. గత కొన్ని రోజులుగా జరిగిన తొమ్మిది రేసుల్లో, ఫ్రాన్సిస్, నోబుల్ అద్భుతమైన స్థిరత్వాన్ని ప్రదర్శించి, మొత్తం 23 పాయింట్లు సాధించారు. ఒక రేసులో విజయం సాధించి రజత స్థానాన్ని ఖాయం చేసుకున్నారు. ఇందులో చైనా స్వర్ణం, హాంకాంగ్ కాంస్య పతకాన్ని కైవసం చేసుకున్నాయి.
Asian Games Medals | ఆర్చరీలో..
ఆర్చరీలో గణేష్ మణిరత్నం తిరుమూరు, కాంగ్ డక్ డాంగ్‌పై 149-144 తేడాతో ఘన విజయం సాధించి కాంస్య పతకాన్ని కైవసం చేసుకున్నాడు. దీంతో కాంపౌండ్ ఆర్చరీ ఈవెంట్లు ముగిశాయి. ఈ విభాగంలో భారత్ మూడు స్వర్ణాలు, ఒక కాంస్యం గెలుచుకుంది. స్క్వాష్‌లో మహిళల టీమ్ కాంస్య పతకం సాధించింది. సెమీ-ఫైనల్‌లో హాంకాంగ్ చేతిలో 2-1 తేడాతో భారత జట్టు ఓడిపోయింది. ఆరంభ మ్యాచ్‌లో అనాహత్ సింగ్ స్వల్ప తేడాతో ఓడిపోగా, తన్వి ఖన్నా సంచలన విజయంతో భారత ఆశలను సజీవంగా ఉంచింది. అయితే, నిర్ణయాత్మక మ్యాచ్‌లో 40 ఏళ్ల సీనియర్ క్రీడాకారిణి జోష్నా చినప్ప, ప్రపంచ నంబర్ 39 హో త్జే లోక్ చేతిలో 0-3 తేడాతో ఓటమి పాలైంది.
Asian Games Medals | ఇతర క్రీడల్లో
భారత ఆటగాళ్లు పలు క్రీడల్లో ముందుకు సాగి పతకం ఖాయం చేశారు. భారత క్రికెట్ జట్టు ఫైనల్కు చేరింది. రెజ్లర్ నితేష్ సివాచ్ గ్రీకో-రోమన్ 97 కేజీల ఫైనల్కు అర్హత సాధించాడు. పురుషుల సెపక్‌టక్రా విభాగంలో వియత్నాంను ఓడించిన భారత్ సెమీఫైనల్స్‌కు చేరి పతకాన్ని ఖాయం చేసుకుంది. షూటింగ్‌ 25 మీటర్ల ర్యాపిడ్ ఫైర్ పిస్టల్ ఫైనల్‌లో అనీష్ భాన్వాలా 7వ స్థానంతో సరిపెట్టుకున్నాడు. వాలీబాల్‌లో పురుషుల జట్టు పాకిస్థాన్ చేతిలో ఓడిపోయింది.
ఇది కూడా చదవండి..: India vs Sri Lanka | సెమీస్లో భారత్ ఘన విజయం.. పసిడి కోసం పాక్తో పోరు
