అక్షరటుడే వెబ్డెస్క్:Bhojshala Verdict|మధ్యప్రదేశ్లోని ధార్ జిల్లాలో ఉన్న వివాదాస్పద భోజ్శాల సముదాయాన్ని వాగ్దేవి (సరస్వతి) అమ్మవారి ఆలయంగా గుర్తిస్తూ మధ్యప్రదేశ్ హైకోర్టు ఇండోర్ బెంచ్ శుక్రవారం సంచలన తీర్పునిచ్చింది. ఈ ప్రదేశంలో ప్రాచీన కాలం నుండి హిందూ ఆరాధన కొనసాగుతోందని, అది ఎన్నడూ అంతరించిపోలేదని న్యాయస్థానం గమనించింది. చారిత్రక సాహిత్యం, రికార్డులు , వాస్తుపరమైన ఆధారాల ప్రకారం.. పర్మార్ రాజవంశానికి చెందిన రాజా భోజ్ నిర్మించిన ఈ కట్టడం ఒక సంస్కృత విద్యా కేంద్రమని, ఇది పూర్తిగా సరస్వతీ దేవికి అంకితం చేయబడిన ఆలయమని కోర్టు స్పష్టం చేసింది.
Bhojshala Verdict| ASI ఉత్తర్వుల రద్దు..
ఈ తీర్పు ద్వారా 2003 ఏప్రిల్ 7 నాటి ఆర్కియాలజికల్ సర్వే ఆఫ్ ఇండియా (ASI) ఉత్తర్వులను కోర్టు పాక్షికంగా రద్దు చేసింది. గతంలో మంగళవారం హిందువులు పూజలు, శుక్రవారం ముస్లింలు నమాజ్ చేసుకునేలా ఉన్న ఒప్పందాన్ని మారుస్తూ, హిందూ పక్షానికి పూర్తిస్థాయిలో పూజించుకునే హక్కును మంజూరు చేసింది. ముస్లింలకు నమాజ్ చేసుకునే హక్కును కల్పించిన మునుపటి ఆదేశాలను రద్దు చేస్తూ, ఇకపై అక్కడ హిందూ పూజలు మాత్రమే జరుగుతాయని పేర్కొంది. అయితే, ముస్లిం పక్షం మసీదు స్థాపన కోసం ప్రత్యామ్నాయ భూమిని అభ్యర్థించవచ్చని, ప్రభుత్వం దానిని పరిశీలించాలని సూచించింది.
Bhojshala Verdict|బ్రిటిష్ మ్యూజియం నుండి విగ్రహం వెనక్కి..
ప్రస్తుతం లండన్లోని బ్రిటిష్ మ్యూజియంలో ఉన్న వాగ్దేవి అమ్మవారి విగ్రహాన్ని తిరిగి భారతదేశానికి తీసుకురావాలన్న హిందూ పక్షం డిమాండ్పై కోర్టు సానుకూలంగా స్పందించింది. ఈ విగ్రహాన్ని తిరిగి తీసుకువచ్చే అంశాన్ని భారత ప్రభుత్వం పరిశీలించాలని కోర్టు పేర్కొంది. అదే సమయంలో, ఈ మొత్తం ఆస్తి నిర్వహణ , పరిపాలన బాధ్యతలు యధావిధిగా ఆర్కియాలజికల్ సర్వే ఆఫ్ ఇండియా (ASI) ఆధీనంలోనే ఉంటాయని న్యాయస్థానం స్పష్టం చేసింది.
Bhojshala Verdict|సుదీర్ఘ విచారణ ..
ఏప్రిల్ 6, 2026 నుండి సుమారు 25 రోజుల పాటు సాగిన సుదీర్ఘ విచారణలో అన్ని పక్షాల వాదనలను కోర్టు దాదాపు 60 గంటల పాటు విన్నది. ASI సమర్పించిన 2,000 పేజీలకు పైగా ఉన్న సమగ్ర శాస్త్రీయ సర్వే నివేదిక ఈ తీర్పులో కీలక పాత్ర పోషించింది. సర్వేలో ఉపయోగించిన పద్ధతులు, కనుగొన్న చారిత్రక ఆధారాలు , విశ్లేషణల ఆధారంగా కోర్టు ఈ నిర్ణయానికి వచ్చింది. ఈ విచారణలో పిటిషనర్లు, ప్రతివాదులు , మధ్యవర్తులందరికీ తమ అభిప్రాయాలను వ్యక్తం చేసే అవకాశం కల్పించినట్లు ధర్మాసనం తెలిపింది.
Bhojshala Verdict|అదనపు బలగాలను మోహరింపు..
తీర్పు వెలువడిన నేపథ్యంలో ధార్ జిల్లాలో పోలీసులు భద్రతను అత్యంత కట్టుదిట్టం చేశారు. ఎటువంటి అవాంఛనీయ సంఘటనలు జరగకుండా అదనపు బలగాలను మోహరించారు. జిల్లా కలెక్టర్ రాజీవ్ రంజన్ మీనా స్పందిస్తూ.. ప్రజలు శాంతిని పాటించాలని, సోషల్ మీడియాలో వచ్చే వదంతులను లేదా తప్పుడు సమాచారాన్ని నమ్మవద్దని విజ్ఞప్తి చేశారు. తప్పుడు ప్రచారాలు చేసే వారిపై కఠిన చర్యలు తీసుకుంటామని యంత్రాంగం హెచ్చరించింది.
ఇది కూడా చదవండి: UAE LPG Deal | ఎల్పీజీ సరఫరాపై యూఏఈతో భారత్ కీలక ఒప్పందం
