అక్షరటుడే, వెబ్డెస్క్: Bihar SUV Rooftop | సాధారణంగా కారును ఇంటి ముందు పార్క్ చేస్తారు.. కొందరు గ్యారేజీలో భద్రపరుచుకుంటారు. కానీ బిహార్లో ఓ వ్యక్తి మాత్రం తన కొత్త SUVని దొంగల బారి నుంచి కాపాడేందుకు ఏకంగా ఇంటి రెండో అంతస్తు పైకప్పుపైకి చేర్చాడు. ఇందుకోసం క్రేన్ను ఉపయోగించడం ఇప్పుడు సోషల్ మీడియాలో చర్చనీయాంశంగా మారింది.
బిహార్లోని గోపాల్గంజ్కు చెందిన మనోజ్ యాదవ్ ఇటీవల మహీంద్రా స్కార్పియో క్లాసిక్ SUVని కొనుగోలు చేశారు. ఆయన ఉద్యోగరీత్యా ఇజ్రాయెల్లో ఉండటంతో కారును అక్కడే ఉన్న డ్రైవర్ సంరక్షణలో ఉంచారు. అయితే కొంతకాలానికి డ్రైవర్ పని మానేయడంతో వాహనం భద్రతపై కుటుంబ సభ్యుల్లో ఆందోళన మొదలైంది.
Bihar SUV Rooftop | క్రేన్ సాయంతో రెండో అంతస్తు పైకప్పుపైకి
ఈ నేపథ్యంలో కారును ఇంటి బయట ఉంచడం కంటే మరింత సురక్షితమైన ప్రదేశంలో ఉంచాలని కుటుంబం నిర్ణయించింది. దీంతో వినూత్నంగా ఆలోచించి క్రేన్ సాయంతో కారును ఇంటి రెండో అంతస్తు పైకప్పుపైకి ఎక్కించారు.
సోషల్ మీడియాలో వైరల్ అవుతున్న వీడియోలో భారీ క్రేన్కు SUVని తాళ్లతో బిగించి, నెమ్మదిగా పైకి ఎత్తుతున్న దృశ్యం కనిపిస్తుంది. అనంతరం రెండు అంతస్తుల ఎత్తులో ఉన్న ఇంటి పైకప్పుపైకి వాహనాన్ని జాగ్రత్తగా చేర్చి దించారు. ఈ దృశ్యాన్ని చూసిన స్థానికులు ఆశ్చర్యపోయినట్లు సమాచారం.
Bihar SUV Rooftop | అసాధారణ నిర్ణయం
‘ఇంటిపై స్కార్పియో’ అంటూ ఈ వీడియో నెట్టింట వైరల్ కావడంతో నెటిజన్లు భిన్నంగా స్పందిస్తున్నారు. కారును దొంగతనం నుంచి కాపాడేందుకు యాదవ్ కుటుంబం తీసుకున్న ఈ అసాధారణ నిర్ణయం కొందరిని ఆశ్చర్యానికి గురిచేస్తే, మరికొందరు మాత్రం పైకప్పుపై వాహనం ఉంచడం ఎంతవరకు సురక్షితమనే ప్రశ్నలు లేవనెత్తుతున్నారు.
National Film Awards | నేషనల్ ఫిల్మ్ అవార్డ్స్ వేడుకకు కొత్త వేదిక.. తొలిసారి ఢిల్లీ వెలుపల నిర్వహణ
అయితే ఆ ఇంటి పైకప్పు వాహనం బరువును మోయగలదా? అక్కడ కారును ఉంచడం నిర్మాణపరంగా సురక్షితమేనా? అనే అంశాలపై అధికారికంగా ఎలాంటి సమాచారం వెలువడలేదు. ప్రస్తుతం వైరల్ వీడియో ఆధారంగానే ఈ ఘటనపై చర్చ జరుగుతోంది.
దొంగల భయంతో సాధారణ పార్కింగ్కు భిన్నంగా తీసుకున్న ఈ నిర్ణయం.. బిహార్లోని ఈ కుటుంబాన్ని ఒక్కసారిగా సోషల్ మీడియా దృష్టిలోకి తీసుకొచ్చింది.
