అక్షరటుడే వెబ్డెస్క్: Construction Equipment Industry | న్యూఢిల్లీలో ఇండియన్ కన్స్ట్రక్షన్ ఎక్విప్మెంట్ మ్యానుఫ్యాక్చరర్స్ అసోసియేషన్ (ICEMA) ఆధ్వర్యంలో 2026 వార్షిక సమావేశం ఘనంగా జరిగింది. “భారతదేశాన్ని నిర్మించే యంత్రాలు ట్రిలియన్ డాలర్ల ఆర్థిక వ్యవస్థకు గుండెకాయ వంటి నిర్మాణ పరికరాల పరిశ్రమ” అనే థీమ్తో తాజ్ ప్యాలెస్ హోటల్లో ఈ వేడుకను నిర్వహించారు. దేశ మౌలిక సదుపాయాలు, తయారీ రంగం , వికసిత్ భారత్ 2047 లక్ష్య సాధనలో నిర్మాణ పరికరాల (CE) రంగం పాత్రపై ఈ వేదికగా విస్తృతంగా చర్చించారు.
ఈ సమావేశంలో కేంద్ర భారీ పరిశ్రమల శాఖ మంత్రి హెచ్.డి. కుమారస్వామి, కేంద్ర బొగ్గు, గనుల శాఖ మంత్రి జి. కిషన్ రెడ్డి, నీతి ఆయోగ్ సభ్యులు డా. ఆర్. బాలసుబ్రమణియం, రోడ్డు రవాణా శాఖ అదనపు కార్యదర్శి మహమూద్ అహ్మద్ ముఖ్య అతితులుగా పాల్గొని ప్రసంగించారు. ఐసీఈఎంఏ అధ్యక్షుడు, జేసీబీ ఇండియా సీఈఓ అండ్ ఎండీ దీపక్ శెట్టి ఆధ్వర్యంలో పరిశ్రమ ప్రముఖులు, విధాన రూపకర్తలు ఈ సదస్సులో భాగస్వామ్యమయ్యారు.
Construction Equipment Industry | ఆర్థిక వృద్ధి..
మౌలిక సదుపాయాల వ్యయం కారణంగా ఆర్థిక సంవత్సరం 2027 తొలి త్రైమాసికంలో (Q1 FY27) జీడీపీ వృద్ధి 7.8 శాతానికి చేరింది. ప్రతిపాదిత ‘నిర్మాణ మౌలిక సదుపాయాల పరికరాల (CIE)’ పథకం ద్వారా పెట్టుబడులను ఆకర్షించడం, స్థానికీకరణను పెంచడంపై దృష్టి పెట్టారు. సీఈ పరిశ్రమ విజన్ 2030 లక్ష్యమైన 3 బిలియన్ డాలర్ల ఎగుమతుల సాధనే లక్ష్యంగా చర్చలు జరిపారు. ఖనిజ భద్రత, యాంత్రీకరణ, డ్రోన్లు, శాటిలైట్ మ్యాపింగ్ వంటి ఆధునిక సాంకేతికతల ద్వారా దేశీయ మైనింగ్ రంగాన్ని మరింత అభివృద్ధి చేయాలని నిర్ణయించారు.
Construction Equipment Industry | ప్రముఖుల దృక్పథాలు..
బడ్జెట్ 2026-27లో తెచ్చిన ‘నిర్మాణ, మౌలిక సదుపాయాల పరికరాల పెంపుదల పథకం’ దేశీయ సరఫరా గొలుసును బలోపేతం చేసి, దిగుమతులను తగ్గిస్తుందని కేంద్ర మంత్రి హెచ్.డి. కుమారస్వామి తెలిపారు. మైనింగ్ రంగంలో పారదర్శకమైన వేలం విధానం మంచి ఫలితాలనిచ్చిందని, సాంకేతికత , కృత్రిమ మేధస్సు (AI) ద్వారా ఈ రంగం మరింత పురోగమిస్తుందని కేంద్ర మంత్రి జి. కిషన్ రెడ్డి పేర్కొన్నారు. ప్రభుత్వం, పరిశ్రమలు , రాష్ట్రాలు వేర్వేరుగా కాకుండా నిజమైన భాగస్వాములుగా కలిసి పనిచేస్తేనే ఆశించిన వృద్ధి సాధ్యమని నీతి ఆయోగ్ సభ్యులు డా. ఆర్. బాలసుబ్రమణియం నొక్కిచెప్పారు. జాతీయ రహదారుల నెట్వర్క్ లక్షన్నర కిలోమీటర్లకు పెరిగిందని, నిర్మాణ వేగం మూడు రెట్లు పెరిగిందని, ఆపరేటర్లకు శిక్షణ , డిజిటల్ ట్రాకింగ్ పెంచాల్సిన అవసరం ఉందని రోడ్డు రవాణా శాఖ అధికారి మహమూద్ అహ్మద్ తెలిపారు. ఇక సీఈఐ పథకం ద్వారా తయారీని విస్తరించడానికి, ఆత్మనిర్భర్ భారత్, మేక్ ఇన్ ఇండియా లక్ష్యాలను సాధించడానికి ఇది సరైన తరుణమని ఐసీఈఎంఏ అధ్యక్షుడు దీపక్ శెట్టి వెల్లడించారు.
Construction Equipment Industry | పరిశ్రమ ప్రస్తుత స్థితి..
ప్రపంచంలోనే మూడో అతిపెద్ద నిర్మాణ పరికరాల మార్కెట్గా భారత్ కొనసాగుతోంది. FY25లో 10 బిలియన్ డాలర్లుగా ఉన్న ఈ రంగం విలువ, 2030 నాటికి 15 బిలియన్ డాలర్లకు చేరుతుందని అంచనా. అయితే మౌలిక సదుపాయాల పనులలో తాత్కాలిక మందగమనం కారణంగా FY26లో విక్రయాలు స్వల్పంగా తగ్గి 1,36,995 యూనిట్లకు పడిపోయినప్పటికీ, ఎగుమతులు మాత్రం దాదాపు 32 శాతం బలమైన వృద్ధిని నమోదు చేయడం విశేషం.
ప్రభుత్వ మూలధన వ్యయం (రూ. 12.2 లక్షల కోట్లు) , సీఐఈ పథకం మద్దతుతో FY27 నాటికి ఈ రంగం మళ్లీ పుంజుకుంటుందని ఐసీఈఎంఏ ధీమా వ్యక్తం చేసింది. 2047 నాటికి దేశాన్ని ట్రిలియన్ డాలర్ల తయారీ ఆర్థిక వ్యవస్థగా తీర్చిదిద్దడంలో ఈ పరిశ్రమ కీలక పాత్ర పోషిస్తుందని పునరుద్ఘాటించింది.
ఇది కూడా చదవండి: Jagga Reddy Comments | కేసీఆర్ చేసినదాని కంటే పెద్ద మోసం ఉంటుందా? : జగ్గారెడ్డి
