అక్షరటుడే, వెబ్డెస్క్: Dr K Laxman | తెలంగాణకు చెందిన సీనియర్ రాజకీయ నాయకుడు, బీజేపీ ఓబీసీ మోర్చా జాతీయ అధ్యక్షుడు, రాజ్యసభ సభ్యులు డాక్టర్ కె. లక్ష్మణ్కు కేంద్రంలో మరో కీలక పదవి దక్కింది.
పార్లమెంట్లో అత్యంత ప్రాధాన్యం కలిగిన రాజ్యసభ హౌస్ కమిటీ (వసతి, సౌకర్యాల కమిటీ) ఛైర్మన్గా ఆయన నియమితులయ్యారు. ఈ మేరకు రాజ్యసభ ఛైర్మన్.. ఆయనను హౌస్ కమిటీ సభ్యుడిగా నామినేట్ చేస్తూ, అనంతరం ఛైర్మన్గా నియమిస్తూ ఉత్తర్వులు జారీ చేశారు. రాజ్యసభ సెక్రటేరియట్ సంయుక్త కార్యదర్శి ఈ నియామక పత్రాన్ని డా. లక్ష్మణ్కు అందజేశారు.
Dr K Laxman | కీలక బాధ్యతలు ఇవే..
రాజ్యసభ సభ్యులకు సంబంధించిన వసతి, వైద్యం, నివాస గృహాల (బంగ్లాలు, ఫ్లాట్లు) కేటాయింపు, ఇతర మౌలిక సౌకర్యాల కల్పనను పర్యవేక్షించడంలో ఈ హౌస్ కమిటీ అత్యంత కీలకమైన పాత్ర పోషిస్తుంది. రాజ్యసభ పూల్లో ఉండే వసతి గృహాలను సభ్యులకు కేటాయించే సర్వాధికారాలు ఈ కమిటీ ఛైర్మన్కు ఉంటాయి.
Dr K Laxman | పార్టీ నాయకత్వానికి కృతజ్ఞతలు
తనపై నమ్మకంతో ఇంతటి ప్రతిష్ఠాత్మకమైన పదవిని అప్పగించినందుకు రాజ్యసభ ఛైర్మన్కు, భారతీయ జనతా పార్టీ (బీజేపీ) అగ్ర నాయకత్వానికి డా. కె. లక్ష్మణ్ కృతజ్ఞతలు తెలియజేశారు. తనకు అప్పగించిన బాధ్యతలను నిష్పక్షపాతంగా, సమర్థవంతంగా నిర్వహిస్తానని ఆయన పేర్కొన్నారు.
Dr K Laxman | వెల్లువెత్తుతున్న శుభాకాంక్షలు
తెలంగాణ నుంచి జాతీయ రాజకీయాల్లో రాణిస్తూ, ఇప్పటికే ఓబీసీ మోర్చా జాతీయ అధ్యక్షుడిగా కీలక పాత్ర పోషిస్తున్న లక్ష్మణ్కు ఈ అదనపు బాధ్యతలు దక్కడంపై తెలుగు రాష్ట్రాల వ్యాప్తంగా హర్షాతిరేకాలు వ్యక్తమవుతున్నాయి.
డా. లక్ష్మణ్కు పలువురు కేంద్ర మంత్రులు, బీజేపీ ముఖ్య నేతలు, అభిమానులు, కార్యకర్తలు సామాజిక మాధ్యమాల వేదికగా, వ్యక్తిగతంగా హృదయపూర్వక అభినందనలు, శుభాకాంక్షలు తెలియజేస్తున్నారు.
తెలంగాణ బిడ్డకు జాతీయ స్థాయిలో ఈ స్థాయి గుర్తింపు లభించడం పట్ల సర్వత్రా హర్షం వ్యక్తమవుతోంది.
