అక్షరటుడే వెబ్‌డెస్క్: HCLTech AI Solution | గ్లోబల్ ఐటీ దిగ్గజం హెచ్‌సీఎల్‌టెక్ (HCLTech) ఆటోమోటివ్ రంగానికి సంబంధించి ఒక వినూత్న సాంకేతిక పరిష్కారాన్ని అందుబాటులోకి తెచ్చింది. ఎన్విడియా (NVIDIA) సిమ్యులేషన్ స్టాక్, ఏజెంటిక్ సామర్థ్యాలు , ఓపెన్ మోడల్స్ సహకారంతో పనిచేసే ‘ఏఐ-పవర్డ్ వెరిఫికేషన్ అండ్ వాలిడేషన్ (V&V)’ సొల్యూషన్‌ను కంపెనీ అధికారికంగా ప్రారంభించింది. వాహన తయారీదారులు (OEMs) , టియర్-1 సప్లయర్లు తమ వాహనాల సాఫ్ట్‌వేర్ వాలిడేషన్ ప్రక్రియను వేగవంతం చేయడానికి, ఆటోమేట్ చేయడానికి ఈ సాంకేతికత ఎంతగానో తోడ్పడుతుంది.
HCLTech AI Solution | త్వరితగతిన పరీక్షలు..
నేటి ఆధునిక వాహనాలు వేగంగా సాఫ్ట్‌వేర్ ఆధారితంగా (Software-Defined Vehicles) మారుతున్నాయి. ఓవర్-ది-ఎయిర్ (OTA) అప్‌డేట్లు, సంక్లిష్టమైన వాహన వ్యవస్థలు , మారుతున్న ప్రభుత్వ నిబంధనల వల్ల వాహనాల పరీక్షల ప్రక్రియ (Testing Process) మరింత శ్రమతో కూడుకున్నదిగా మారింది. వేర్వేరు టూల్స్ వాడటం, మాన్యువల్ వర్క్‌ఫ్లోలు , నియమ నిబంధనల ధృవీకరణ వల్ల సాఫ్ట్‌వేర్ అభివృద్ధికి, దాని విడుదలకు మధ్య తీవ్రమైన ఆలస్యం జరుగుతోంది. ఈ సమస్యను అధిగమించడానికి హెచ్‌సీఎల్‌టెక్ ఈ ఏఐ-ఆధారిత వాలిడేషన్ మోడల్‌ను రూపొందించింది.
HCLTech AI Solution | అత్యాధునిక అనుకరణ ..
హెచ్‌సీఎల్‌టెక్ ఇంజనీరింగ్ నైపుణ్యం , ‘వాలిడేషన్ ఫ్యాక్టరీ’ మోడల్‌కు ఎన్విడియాకు చెందిన ఎన్విడియా ఓమ్నివర్స్, కాస్మోస్, ఆల్పామాయో, ఇసాక్ సిమ్ వంటి అత్యాధునిక ఉత్పత్తులు తోడయ్యాయి. వీటి ద్వారా నిజమైన రోడ్లపై వాహనాలను పరీక్షించే అవసరం లేకుండా, వర్చువల్ (కల్పిత) వాతావరణంలోనే అత్యంత అరుదైన , ప్రమాదకరమైన రోడ్డు పరిస్థితులను సృష్టించి సాఫ్ట్‌వేర్‌ను పరీక్షిస్తారు. ఇది భౌతిక పరీక్షలపై ఆధారపడటాన్ని తగ్గించి, టెస్టింగ్ సామర్థ్యాన్ని పెంచుతుంది. అలాగే ఎన్విడియా నెమోట్రాన్ ఓపెన్ మోడల్స్ ఆధారంగా పనిచేసే ఏఐ ఏజెంట్లు ఈ ప్రక్రియ మొత్తాన్ని వేగవంతం చేస్తాయి.
హెచ్‌సీఎల్‌టెక్ , ఎన్విడియా ప్రతినిధుల వ్యాఖ్యలు..
ఈ నూతన సేవ గురించి హెచ్‌సీఎల్‌టెక్ గ్లోబల్ హెడ్ (మొబిలిటీ) పంకజ్ తగ్రా మాట్లాడుతూ.. సాంప్రదాయ పరీక్షా పద్ధతుల కంటే ఆటోమోటివ్ సాఫ్ట్‌వేర్ చాలా వేగంగా మారుతోందని తెలిపారు. ఎన్విడియా భాగస్వామ్యంతో తెచ్చిన ఈ సాంకేతికత ద్వారా సంస్థలు శ్రమతో కూడిన సుదీర్ఘ పరీక్షల నుంచి ఏఐ-ఆధారిత నిరంతరం జరిగే స్మార్ట్ వాలిడేషన్‌కు మారవచ్చని, తద్వారా సాఫ్ట్‌వేర్ విడుదల నిర్ణయాలు వేగంగా తీసుకోవచ్చని చెప్పారు. ఎన్విడియా ఆటోమోటివ్ ఎంటర్‌ప్రైజ్ లీడ్ డాక్టర్ సెబాస్టియన్ స్కీర్లే మాట్లాడుతూ.. సాఫ్ట్‌వేర్ ఆధారిత వాహనాలకు వాలిడేషనే అత్యంత కీలకమని, ఎన్విడియా ఓమ్నివర్స్ , కాస్మోస్ ఆధారంగా పనిచేసే ఈ సొల్యూషన్ వాహన తయారీదారులు ముందస్తుగానే భద్రతా అంశాలను లోతుగా పరిశీలించడానికి సహాయపడుతుందని పేర్కొన్నారు.
ఇది కూడా చదవండి: Mysore Dasara Festival | మైసూరు దసరా ఉత్సవాల్లో పాల్గొన్న సీఎం రేవంత్రెడ్డి
