అక్షరటుబే వెబ్డెస్క్:Imran Khan Cipher | పాకిస్తాన్ మాజీ ప్రధానమంత్రి ఇమ్రాన్ ఖాన్ పదవీచ్యుతుడు కావడం వెనుక అమెరికా హస్తం ఉందనే ఆరోపణలు మరోసారి అంతర్జాతీయంగా చర్చనీయాంశమయ్యాయి. ఇమ్రాన్ను అధికారం నుంచి తొలగించాలంటూ అమెరికా ఒత్తిడి తెచ్చిందనే వాదనలకు బలం చేకూరుస్తూ ఒక రహస్య దౌత్య పత్రం (సైఫర్) ఇప్పుడు బయటకు వచ్చింది. WION కథనం ప్రకారం.. ఈ లీకైన పత్రం పాక్ రాజకీయాల్లో కొత్త సంచలనానికి తెరలేపింది.
Imran Khan Cipher | ఈ పత్రంలో ఏముంది?
పరిశోధనాత్మక సంస్థ ‘డ్రాప్ సైట్’ ప్రచురించిన “సైఫర్ I-0678” అనే ఈ రహస్య కేబుల్ పత్రం, ఏప్రిల్ 2022లో ఇమ్రాన్ ఖాన్ ప్రభుత్వం కూలిపోవడానికి కొద్ది రోజుల ముందు జరిగిన ఒక సమావేశానికి సంబంధించినది. వాషింగ్టన్లోని పాకిస్తాన్ రాయబారికి, అమెరికా సీనియర్ స్టేట్ డిపార్ట్మెంట్ అధికారి డోనాల్డ్ లూకు మధ్య జరిగిన చర్చలు ఇందులో ఉన్నాయి. ఈ పత్రం ప్రకారం.. పార్లమెంటులో అవిశ్వాస తీర్మానం ద్వారా ఇమ్రాన్ ఖాన్ను ప్రధాని పదవి నుంచి తొలగిస్తే, అమెరికా-పాకిస్తాన్ సంబంధాలు మెరుగుపడతాయని డోనాల్డ్ లూ సూచించారు. అలా జరిగితే “అన్నీ క్షమిస్తాం” అని ఆయన అన్నట్లు అందులో పేర్కొన్నారు. ఒకవేళ ఇమ్రాన్ ఖాన్ అవిశ్వాస తీర్మానంలో గెలిచి అధికారంలోనే కొనసాగితే.. అమెరికా, యూరప్ దేశాల నుంచి పాకిస్తాన్ అంతర్జాతీయంగా తీవ్ర ‘ఏకాకి’ అయ్యే ప్రమాదం ఉందని కూడా హెచ్చరించినట్లు తెలుస్తోంది.
Imran Khan Cipher | తెరవెనుక కుట్రలు చేసిందని ..
తన స్వతంత్ర విదేశాంగ విధానం, అలాగే చైనా, రష్యాలతో సన్నిహితంగా ఉండటం అమెరికాకు నచ్చలేదని, అందుకే తనను గద్దె దించడానికి వాషింగ్టన్ తెరవెనుక కుట్రలు చేసిందని ఇమ్రాన్ ఖాన్ మొదటి నుండి ఆరోపిస్తున్నారు. అయితే అమెరికా ప్రభుత్వం ఈ ఆరోపణలను పదేపదే ఖండించింది. ఈ వాదనల్లో ఎలాంటి నిజం లేదని, ఇమ్రాన్ ఎప్పుడూ ఇందుకు సంబంధించిన ఆధారాలు చూపించలేదని అమెరికా అంటోంది. ప్రస్తుతం లీకైన ఈ కేబుల్ పత్రాన్ని ఇమ్రాన్ ఖాన్ పార్టీ అయిన పాకిస్తాన్ తెహ్రీక్-ఎ-ఇన్సాఫ్ (PTI) , అతని మద్దతుదారులు తమ ఆరోపణలకు బలమైన ఆధారంగా చూపిస్తున్నారు. ఖాన్ను తొలగించి, ఆపై జైల్లో పెట్టినా అమెరికాకు ఇబ్బంది లేదనే విషయం “అన్నీ క్షమిస్తాం” అనే పదబంధం ద్వారా స్పష్టమవుతోందని వారు వాదిస్తున్నారు.
Imran Khan Cipher | దేశీయ రాజకీయాల వల్లేనంటున్న విపక్షాలు.
మరోవైపు, ఇమ్రాన్ ఖాన్ తన ప్రభుత్వాన్ని కూల్చడానికి పాకిస్తాన్లోని ప్రధాన రాజకీయ పార్టీలైన ముస్లిం లీగ్-ఎన్ (PML-N), పాకిస్తాన్ పీపుల్స్ పార్టీ (PPP) అమెరికాతో చేతులు కలిపాయని ఆరోపించారు. కానీ, ఆ పార్టీలు ఈ ఆరోపణలను పూర్తిగా తోసిపుచ్చాయి. ఇమ్రాన్ ఖాన్ ప్రభుత్వం కూలిపోవడానికి విదేశీ శక్తులు కారణం కాదని, ఆయన దేశీయ రాజకీయ వైఫల్యాల వల్లే రాజ్యాంగబద్ధంగా జరిగిన అవిశ్వాస తీర్మానంలో ఓడిపోయారని స్పష్టం చేశాయి.
పాకిస్తాన్ చరిత్రలో అవిశ్వాస తీర్మానం ద్వారా పదవిని కోల్పోయిన మొదటి ప్రధానమంత్రిగా ఇమ్రాన్ ఖాన్ నిలిచారు. ఆ తర్వాత ఏడాదికి ఆయన ఒక అవినీతి కేసులో దోషిగా తేలి జైలుపాలయ్యారు. అప్పటి నుండి ఇప్పటి వరకు ఇమ్రాన్ ఖాన్ జైలులోనే కొనసాగుతున్నారు.
ఇది కూడా చదవండి: Iran Internet Cables | హర్మూజ్ ఇంటర్నెట్ కేబుల్స్పై ఇరాన్ కన్ను.. టెక్ దిగ్గజాలే లక్ష్యంగా వసూళ్లు..?
