అక్షరటుడే వెబ్‌డెస్క్: India Corporate Credit Ratings | ముడి చమురు ధరలు పెరగడం, వర్షపాతం లోటు , ప్రపంచవ్యాప్త ఆర్థిక సవాళ్లు ఉన్నప్పటికీ.. భారతీయ ( India )కంపెనీల క్రెడిట్ ప్రొఫైల్ FY27 తొలి అర్ధభాగంలో (H1FY27) ఎంతో పటిష్టంగా కొనసాగిందని ప్రముఖ క్రెడిట్ రేటింగ్ ఏజెన్సీ ‘బ్రిక్‌వర్క్ రేటింగ్స్’ (BWR) తెలిపింది. ప్రభుత్వ వ్యయం పెరగడం, స్థిరమైన దేశీయ డిమాండ్ కారణంగా FY27 రెండో అర్ధభాగంలో (H2FY27) మౌలిక సదుపాయాలు (Infra), విద్యుత్ రంగాలు భారీగా పెట్టుబడులను ఆకర్షించే అవకాశం ఉందని BWR స్పష్టం చేసింది.
India Corporate Credit Ratings | అప్‌గ్రేడ్‌ల జోరు..
రేటింగ్ ఏజెన్సీ గణాంకాల ప్రకారం.. ఏప్రిల్ నుంచి సెప్టెంబర్ 2026 కాలంలో ప్రతి ఒక డౌన్‌గ్రేడ్‌కు ఏకంగా 2.7 రేటింగ్ అప్‌గ్రేడ్‌లు నమోదయ్యాయి (గత ఏడాది ఇది 2.4గా ఉండేది). BWR రేటింగ్ పొందిన కంపెనీల్లోనైతే ఈ నిష్పత్తి 3.3గా ఉంది.
వృద్ధి నమోదు చేసిన రంగాలు: మౌలిక సదుపాయాలు, విద్యుత్, క్యాపిటల్ గూడ్స్, ఆటో విడిభాగాలు , సెకండరీ స్టీల్ రంగాలు బలమైన క్రెడిట్ అప్‌గ్రేడ్‌లను సాధించాయి.
ఒత్తిడి ఎదుర్కొంటున్న రంగాలు: బలహీనమైన ఎగుమతులు, తక్కువ ధరల దిగుమతుల పోటీ వల్ల టెక్స్‌టైల్స్, సిరామిక్స్, వజ్రాలు , స్పెషాలిటీ కెమికల్స్ రంగాలు సవాళ్లను ఎదుర్కొన్నాయి.
India Corporate Credit Ratings | రుణాలు తగ్గుముఖం..
కంపెనీల ఈక్విటీతో పోలిస్తే రుణాల నిష్పత్తి FY20లో 1.1 రెట్లు ఉండగా, FY25 నాటికి అది 0.7 రెట్లకు తగ్గింది. ఇది కంపెనీలు భవిష్యత్తులో మరింత సులభంగా రుణాలు పొందే అవకాశాన్ని పెంచింది. “ప్రస్తుత పరిస్థితుల్లో పటిష్టమైన క్రెడిట్ రేటింగ్ అనేది నిధుల సమీకరణకు ఒక గొప్ప ఆస్తిగా మారింది” అని BWR చీఫ్ రేటింగ్స్ ఆఫీసర్ కె.హెచ్. పట్నాయక్ వ్యాఖ్యానించారు.
సేవల రంగం..
సేవల రంగం: వాణిజ్య రియల్ ఎస్టేట్ రంగం సపోర్ట్‌తో సేవల రంగానికి ఇచ్చే బ్యాంకు రుణాలు 24.3% వృద్ధి చెందాయి. హైదరాబాద్ నగరంలో ఆఫీస్ లీజింగ్ మునుపెన్నడూ లేనంతగా పెరగడం ఈ రంగానికి విపరీతంగా కలసిరానుంది.
NBFCల స్థితి: బంగారంపై రుణాలు (Gold Loans), ఆస్తులపై రుణాలు ఇచ్చే NBFCల కార్యకలాపాలు పుంజుకోగా.. మైక్రోఫైనాన్స్‌పై ఎక్కువగా ఆధారపడిన చిన్న NBFCలు మాత్రం ఇంకా ఆర్థిక ఒత్తిడిలోనే ఉన్నాయి.
India Corporate Credit Ratings | రాబోయే రోజుల్లో సవాళ్లు..
దక్షిణ భారతదేశంలో వర్షపాతం 24% తగ్గడం గ్రామీణ డిమాండ్‌పై ప్రభావం చూపే అవకాశం ఉందని పట్నాయక్ తెలిపారు. అమెరికా విధించే సుంకాల వల్ల ఎగుమతిదారులు ఇబ్బందులు ఎదుర్కొనే సూచనలు కనిపిస్తున్నాయి. రాబోయే H2FY27 కాలంలో కంపెనీలు పెరుగుతున్న నిధుల వ్యయాన్ని తట్టుకుంటూ బ్యాలెన్స్ షీట్లను ఎంత సమర్థవంతంగా నిర్వహిస్తాయో వేచి చూడాలని ఆయన పేర్కొన్నారు.
ఇది కూడా చదవండి: Nizamabad RTA Home Guards | రవాణాశాఖ నుంచి ఇద్దరు హోంగార్డుల సరెండర్
