అక్షరటుడే వెబ్డెస్క్: Krishna Janmashtami 2026 | హిందూ సంప్రదాయంలో అత్యంత పవిత్రమైన పర్వదినాల్లో శ్రీకృష్ణ జన్మాష్టమి ( Janmashtami )ఒకటి. అధర్మాన్ని అంతం చేసి ధర్మాన్ని పరిరక్షించేందుకు శ్రీమహావిష్ణువు ద్వాపరయుగంలో శ్రీకృష్ణుడిగా జన్మించిన ఈ పర్వదినాన్ని ప్రతిఏటా భాద్రపద మాస కృష్ణ పక్ష అష్టమి తిథి రోజున ఘనంగా జరుపుకుంటారు. ఈ సంవత్సరం శ్రీకృష్ణుడి 5253వ జయంతిని పురస్కరించుకుని తేదీలపై నెలకొన్న సందిగ్ధతకు పండితులు స్పష్టతనిచ్చారు. దీని ప్రకారం సాధారణ గృహస్థులు సెప్టెంబరు 4న జన్మాష్టమి జరుపుకోనుండగా, వైష్ణవ సంప్రదాయాన్ని పాటించే భక్తులు సెప్టెంబరు 5న ఈ వేడుకను నిర్వహించుకోనున్నారు. అలాగే, ఉత్సాహభరితమైన దహీ-హాండీ ఉత్సవాన్ని సెప్టెంబరు 5న నిర్వహిస్తారు.
Krishna Janmashtami 2026 | తిథి , పూజా ముహూర్త వివరాలు..
అష్టమి తిథి సెప్టెంబరు 4వ తేదీ తెల్లవారుజామున 02:25 గంటలకు ప్రారంభమై, సెప్టెంబరు 5న అర్ధరాత్రి 12:13 గంటలకు ముగుస్తుంది. నిశిత కాల పూజా ముహూర్తం సెప్టెంబరు 4న రాత్రి 11:57 గంటల నుంచి సెప్టెంబరు 5న తెల్లవారుజామున 12:43 గంటల వరకు కొనసాగుతుంది. అలాగే రోహిణీ నక్షత్రం సెప్టెంబరు 4న అర్ధరాత్రి 12:29 గంటలకు మొదలై, అదే రోజు రాత్రి 11:04 గంటలకు పూర్తవుతుంది.
Krishna Janmashtami 2026 | పూజా విధానం..
జన్మాష్టమి పర్వదినం రోజున భక్తులు భక్తిశ్రద్ధలతో ఉపవాస దీక్షను ఆచరిస్తారు. అర్ధరాత్రి వేళ బాలగోపాలుడి విగ్రహానికి పంచామృతాలతో స్నానం చేయించి, నూతన వస్త్రాలు ధరింపజేస్తారు. కిరీటం, నెమలిపింఛం, వేణువుతో స్వామివారిని విశేషంగా అలంకరించి ఉయ్యాలలో ఉంచి ప్రత్యేక పూజలు నిర్వహిస్తారు. శ్రీకృష్ణుడికి ఎంతో ఇష్టమైన వెన్న-పటికబెల్లం (మాఖన్-మిశ్రీ), తులసీదళాలు, పండ్లను నైవేద్యంగా సమర్పిస్తారు. ఈ వేడుకల సందర్భంగా ఆలయాల్లో రాత్రి వేళల్లో ప్రత్యేక భజనలు, సంకీర్తనలు, భగవద్గీత పారాయణలు అత్యంత వైభవంగా జరుగుతాయి.
ఇది కూడా చదవండి: Kavitha TRS | కవితపై అనుచిత వ్యాఖ్యలు చేస్తే క్షమించేది లేదు..
