అక్షరటుడే వెబ్డెస్క్: Pakistan Drone Deal | పాకిస్తాన్ సైన్యం అమెరికాకు చెందిన ప్రముఖ డ్రోన్ తయారీ సంస్థ ‘పవరస్’తో కీలక ఒప్పందం కుదుర్చుకుంది. డ్రోన్ల కొనుగోలు ఆర్డర్లతో పాటు కీలకమైన అవగాహన ఒప్పందం (MoU) కుదుర్చుకున్నట్లు ఆ కంపెనీ సహ వ్యవస్థాపకుడు బ్రెట్ వెలికోవిచ్ వెల్లడించారు. అయితే, ఈ ఒప్పందానికి సంబంధించిన పూర్తి వివరాలు మాత్రం ఇంకా గోప్యంగానే ఉన్నాయి.
ఈ ఒప్పందంలో అమెరికా అధ్యక్షుడు డొనాల్డ్ ట్రంప్ కుమారులు డొనాల్డ్ ట్రంప్ జూనియర్ ( Donald Trump Jr ), ఎరిక్ ట్రంప్ల ప్రస్తావన తెరపైకి రావడం ప్రాధాన్యం సంతరించుకుంది. ట్రంప్ కుమారుల పెట్టుబడులు ఉన్న ‘ఆరియస్ గ్రీన్వే హోల్డింగ్స్’ అనే కంపెనీలో త్వరలో ‘పవరస్’ విలీనం కానుంది. అక్టోబర్ ప్రారంభంలో ఈ విలీన ప్రక్రియ పూర్తికానుండగా, కొత్తగా ఏర్పడే కంపెనీలో ట్రంప్ కుటుంబానికి 9.9 శాతం బెనిఫిషియల్ ఓనర్షిప్ వాటా దక్కే అవకాశం ఉన్నట్లు సమాచారం.
Pakistan Drone Deal | ప్రతినిధుల భేటీ..
బ్రెట్ వెలికోవిచ్ నేతృత్వంలోని పవరస్ ప్రతినిధుల బృందం పాకిస్తాన్ ఆర్మీ చీఫ్, ఫీల్డ్ మార్షల్ అసిమ్ మునీర్తో ప్రత్యేకంగా సమావేశమైనట్లు పాక్ సైన్యం అధికారికంగా ప్రకటించింది. ఈ సమావేశంలో రక్షణ రంగ కొనుగోళ్లు, అత్యాధునిక డ్రోన్ల ఉత్పత్తి, దీర్ఘకాలిక రక్షణ సామర్థ్యాల పెంపు వంటి అంశాలపై విస్తృతంగా చర్చలు జరిపినట్లు తెలిపింది. పాకిస్తాన్ ప్రైవేట్ రక్షణ రంగం ప్రస్తుతం అభివృద్ధి దశలో ఉందని, అమెరికా సాంకేతికతతో అక్కడ వేగంగా విస్తరించే అవకాశాలున్నాయని పవరస్ సీఈఓ ఆండ్రూ ఫాక్స్ పేర్కొన్నారు. అమెరికా-పాక్ టెక్నికల్ భాగస్వామ్యంతో ముందుకు వెళ్లాలని భావిస్తున్నట్లు తెలిపారు.
Pakistan Drone Deal | వ్యాపార ప్రాతిపదికన..
ఈ వ్యాపార విస్తరణలో ట్రంప్ కుటుంబానికి ఎలాంటి ప్రత్యక్ష సంబంధం లేదని సీఈఓ ఆండ్రూ పాక్స్ స్పష్టం చేశారు. ఒప్పందాలన్నీ కేవలం వ్యాపార ప్రాతిపదికన, మెరిట్ ఆధారంగానే లభిస్తాయని చెప్పారు. ట్రంప్ జూనియర్ కేవలం ఒక పాసివ్ ఇన్వెస్టర్ మాత్రమేనని ఆయన స్పష్టం చేశారు. మరోవైపు, ఈ ఒప్పందం అమెరికా-పాకిస్తాన్ మధ్య రక్షణ సంబంధాలను మరింత బలోపేతం చేస్తుందని పాక్ ఆర్మీ చీఫ్ అసిమ్ మునీర్ ప్రశంసించడం గమనార్హం.
ఇది కూడా చదవండి: Narendra Modi Birthday | నవ భారత నిర్మాత ప్రధాని నరేంద్ర మోదీ
