Rupee Depreciation | రూపాయి విలువ తగ్గడమే మంచిది: అరవింద్ పణగరియ

అక్షరటుడే వెబ్‌డెస్క్: Rupee Depreciation | ప్రపంచవ్యాప్తంగా నెలకొన్న అస్థిరతల వల్ల దేశీయ కరెన్సీ రూపాయి విలువ నిరంతరం పడిపోతున్న నేపథ్యంలో, నీతి ఆయోగ్ మాజీ వైస్ ఛైర్మన్ అరవింద్ పణగరియ రిజర్వ్ బ్యాంక్ ఆఫ్ ఇండియా (RBI)కు పలు కీలక సూచనలు చేశారు. చమురు సంక్షోభం తక్కువ కాలం ఉన్నా లేదా ఎక్కువ కాలం కొనసాగినా రూపాయి విలువ తగ్గడాన్ని అనుమతించడమే మంచిదని ఆయన అభిప్రాయపడ్డారు. డాలర్‌తో పోలిస్తే రూపాయి వంద మార్కుకు (Rs 100) చేరడం అనేది కేవలం ఒక మానసిక భావన మాత్రమేనని, దీనికి భయపడాల్సిన పనిలేదని ఆయన స్పష్టం చేశారు. ఈ మేరకు ఆయన సామాజిక మాధ్యమం ‘ఎక్స్’ (X) లో ఒక సుదీర్ఘ పోస్ట్ పెట్టారు.

Rupee Depreciation | భవిష్యత్తులో లాభం..

రూపాయి బలహీనపడటం వల్ల దిగుమతులపై భారం పెరిగినప్పటికీ, అది విదేశీ పెట్టుబడులను భారీగా ఆకర్షించడానికి దోహదపడుతుందని పణగరియ విశ్లేషించారు. దీనివల్ల జరిగే నష్టాన్ని సులభంగా భర్తీ చేయవచ్చని చెప్పారు. ప్రస్తుత చమురు కొరత కొన్ని నెలల పాటు లేదా ఏడాది పాటు కొనసాగితే, ప్రారంభంలో రూపాయి కాస్త క్షీణించినా.. విదేశీ పెట్టుబడుల రాకతో భవిష్యత్తులో మళ్లీ బలంగా పుంజుకుంటుందని ధీమా వ్యక్తం చేశారు. చమురు దిగుమతులు తగ్గగానే రూపాయి యథాస్థితికి వస్తుందని పేర్కొన్నారు.

Rupee Depreciation | ఆర్‌బీఐకి హెచ్చరికలు..

ఒకవేళ ఈ చమురు సంక్షోభం సుదీర్ఘకాలం పాటు కొనసాగితే, దేశంలోని విదేశీ మారక నిల్వలు (Foreign Exchange Reserves) కరిగిపోయే ప్రమాదం ఉందని ఆయన హెచ్చరించారు. ఇలాంటి స్థితిలో రూపాయి విలువను తగ్గనివ్వడమే సరైన మార్గమని, అలా కాకుండా ఇతర ప్రత్యామ్నాయాలు వెతికితే నష్టాలు తప్పవన్నారు. సంక్షోభాన్ని అధిగమించడానికి డాలర్ బాండ్లు జారీ చేయడం లేదా ఎన్నారై డాలర్ డిపాజిట్లపై ఎక్కువ వడ్డీలు ఆఫర్ చేయడం వంటి చర్యలపై ఆర్‌బీఐ ఎక్కువగా ఆధారపడకూడదని సూచించారు. ఇవి చాలా ఖరీదైన, తాత్కాలిక ఉపశమనాలు మాత్రమేనని కొట్టిపారేశారు.

Rupee Depreciation | 2013 నాటి పరిస్థితులతో పోలిక..

గతంలో దేశం ఎదుర్కొన్న ఆర్థిక పరిస్థితులను గుర్తు చేస్తూ.. 2013 నాటి కరెన్సీ సంక్షోభంతో పోలిస్తే ప్రస్తుతం భారతదేశ స్థూల ఆర్థిక రంగం (Macroeconomic Situation) ఎంతో స్థిరంగా , బలంగా ఉందని పణగరియ గుర్తు చేశారు. అప్పుడు ద్రవ్యోల్బణం (Inflation) రెండంకెల స్థాయిలో ఉండేదని, కానీ ఇప్పుడు ఆర్‌బీఐ తీసుకుంటున్న సమర్థవంతమైన ద్రవ్య విధానాల వల్ల ద్రవ్యోల్బణం పూర్తిగా అదుపులోనే ఉందని ఆయన ప్రశంసించారు.

ఇది కూడా చదవండి: Future City Cancellation | ఫ్యూచర్​ సిటీ రద్దు చేస్తాం.. హరీశ్​రావు సంచలన వ్యాఖ్యలు