అక్షరటుడే, వెబ్డెస్క్ : Secunderabad Drugs Seizure | సికింద్రాబాద్ రైల్వే స్టేషన్ (Secunderabad Railway Station)లో ఇద్దరు మహిళల నుంచి రూ.11.4 కోట్ల విలువైన 11.4 కిలోల యాంఫెటమైన్ను డీఆర్ఐ (DRI) అధికారులు స్వాధీనం చేసుకున్నారు. ట్రాలీ బ్యాగులలోని బెడ్షీట్ల మడతలలో దాచి ఉంచిన డ్రగ్స్ సీజ్ చేసి నిందితులను అరెస్ట్ చేశారు.
మాదకద్రవ్యాల స్మగ్లింగ్పై చేపట్టిన ఒక భారీ ఆపరేషన్లో డైరెక్టరేట్ ఆఫ్ రెవెన్యూ ఇంటెలిజెన్స్ అధికారులు పక్కా సమాచారం మేరకు రైల్వే స్టేషన్లో దాడులు చేశారు. సికింద్రాబాద్ రైల్వే స్టేషన్లో రైలులో ప్రయాణిస్తున్న ఇద్దరు మహిళలను అధికారులు అడ్డగించారు. వారు తీసుకువెళ్తున్న రెండు ట్రాలీ బ్యాగులను క్షుణ్ణంగా తనిఖీ చేయగా, తెల్లటి స్ఫటికాకార పదార్థం ఉన్న 10 పారదర్శక ప్లాస్టిక్ ప్యాకెట్లు లభించాయి. డ్రగ్స్ తరలిస్తున్న మహిళలు వాటిని గుర్తు పట్టకుండా.. నల్ల పాలిథీన్లో చుట్టి, డిజైనర్ పేపర్తో కప్పి, ట్రాలీ బ్యాగులలోని పరుపుల షీట్ల మడతలలో దాచారు.
Secunderabad Drugs Seizure | రూ.11 కోట్ల విలువ
స్వాధీనం చేసుకున్న ఆ పదార్థాన్ని ఫీల్డ్ డ్రగ్ డిటెక్షన్ కిట్ ఉపయోగించి పరీక్షించారు. అది యాంఫెటమైన్ అని, దీనిని సాధారణంగా క్రిస్టల్ మెత్ అని పిలుస్తారని అధికారులు తెలిపారు. స్వాధీనం చేసుకున్న 11,400 గ్రాముల ఈ నిషేధిత సరుకు మార్కెట్ విలువ సుమారు రూ.11.4 కోట్లుగా అంచనా వేశారు. ఇద్దరు నిందితులను అరెస్ట్ చేశారు. ఈ డ్రగ్స్ను విదేశాలకు తరలించేందుకు నిందితులు యత్నించినట్లు సమాచారం.
ఇది కూడా చదవండి : Constable Harassment | కానిస్టేబుల్ వేధింపులతో యువకుడి సూసైడ్.. వెలుగులోకి సెల్ఫీ వీడియో..
