Trump Iran War | ఇరాన్‌తో యుద్ధానికి గుడ్‌బై చెప్పనున్న ట్రంప్?

అక్షరటుడే వెబ్‌డెస్క్: Trump Iran War | అమెరికా అధ్యక్షుడు డొనాల్డ్ ట్రంప్ ఇరాన్‌తో జరుగుతున్న యుద్ధానికి స్వస్తి పలికే అంశంపై తీవ్రంగా ఆలోచిస్తున్నారు. ఈ ఏడాది నవంబర్‌లో జరగనున్న మధ్యంతర ఎన్నికలను దృష్టిలో ఉంచుకుని ఆయన ఈ కీలక నిర్ణయం వైపు మొగ్గు చూపుతున్నట్లు తెలుస్తోంది. ప్రత్యక్ష సైనిక చర్యలకు బదులుగా, ఆర్థిక ఆంక్షలు , తీవ్రమైన ఒత్తిడి ద్వారా ఇరాన్ ప్రభుత్వాన్ని బలహీనపరచాలని ట్రంప్ భావిస్తున్నట్లు సమాచారం. ఈ మేరకు సీనియర్ సహాయకులతో ఆయన ఉన్నత స్థాయి సమావేశాలు నిర్వహించారు.

Trump Iran War | మధ్యంతర ఎన్నికల ప్రభావం..

దాదాపు ఆరు నెలల క్రితం ప్రారంభమైన ఈ సైనిక చర్యను త్వరగా ముగించాలని ట్రంప్ భావిస్తున్నప్పటికీ, మధ్యప్రాచ్యంలో ఇప్పటికీ పరిస్థితి ఉద్రిక్తంగానే ఉంది. ప్రస్తుతం ఈ ప్రాంతంలో సుమారు 50,000 మంది అమెరికా సైనికులు, 19 యుద్ధ నౌకలు, భారీగా వైమానిక రక్షణ వ్యవస్థలు మోహరించి ఉన్నాయి. అయితే, యుద్ధం మరింత ముదిరితే రానున్న మధ్యంతర ఎన్నికల్లో రిపబ్లికన్ పార్టీ విజయ అవకాశాలపై ఇది ప్రతికూల ప్రభావం చూపుతుందని ట్రంప్ సీనియర్ సహాయకులు గట్టిగా హెచ్చరిస్తున్నారు.

Trump Iran War | దెబ్బకొట్టాలని ఆలోచన..

ఒకవేళ ప్రత్యక్ష యుద్ధాన్ని ఆపివేసి, కఠినమైన ఆర్థిక ఆంక్షలను నిరంతరం కొనసాగిస్తే టెహ్రాన్ ( Tehran )తన అణు కార్యక్రమాన్ని పూర్తిగా నిలిపివేసేలా చేయవచ్చని ట్రంప్ అంచనా వేస్తున్నారు. లేదంటే ఆ ఆర్థిక ఒత్తిడి తలవంచలేక ఇరాన్ పాలక వ్యవస్థే స్వయంగా కుప్పకూలే అవకాశం ఉందని ఆయన నమ్ముతున్నారు. మరోవైపు, హార్ముజ్ జలసంధిపై పట్టు కోసం ఇరాన్ వెనక్కి తగ్గకపోవడం, ప్రపంచవ్యాప్తంగా రవాణా సదుపాయాలకు అంతరాయం కలగడం వంటి సమస్యలు అమెరికాను ఇబ్బంది పెడుతున్నాయి.

Trump Iran War| అస్పష్టంగానే ట్రంప్ వ్యూహం..

ట్రంప్ యుద్ధాన్ని ముగించాలని ఆలోచిస్తున్నప్పటికీ, మరోవైపు పెంటగాన్ మాత్రం వచ్చే ఏడాది వరకు సైనిక చర్యలు కొనసాగే అవకాశం ఉందని భావిస్తూ సుదీర్ఘ పోరాటానికి సిద్ధమవుతోంది. అమెరికా ఆర్మీకి చెందిన కొన్ని బలగాలు 2027 వరకు మధ్యప్రాచ్యంలోనే ఉండే సూచనలు కనిపిస్తున్నాయి. దీంతో ఇరాన్ విషయంలో ట్రంప్ అనుసరించబోయే అసలు వ్యూహం ఏంటనే దానిపై ఇంకా స్పష్టత కొరవడింది. యుద్ధానికి పూర్తిగా ముగింపు పలికి ఆర్థికంగా దెబ్బకొడతారా? లేక మళ్లీ పెద్ద ఎత్తున సైనిక దాడులకు దిగుతారా? అనేది ఇప్పుడు అంతర్జాతీయ రాజకీయ వర్గాల్లో హాట్‌టాపిక్‌గా మారింది.

ఇది కూడా చదవండి:  TG Transco Warning | టీజీ ట్రాన్స్‌కో సీరియస్ వార్నింగ్.. అంతర్గత విషయాలు బయటకు చెబితే కఠిన చర్యలు