అక్షరటుడే వెబ్డెస్క్: Telangana State Formation Day | అమరవీరుల మహోన్నత త్యాగాల పునాదులపై ఏర్పడిన తెలంగాణ రాష్ట్రం నేడు అన్ని రంగాల్లో దేశానికే ఆదర్శంగా నిలుస్తూ అభివృద్ధిలో దూసుకుపోతోందని రాష్ట్ర మంత్రి పొంగులేటి శ్రీనివాసరెడ్డి (Ponguleti Srinivasa Reddy) అన్నారు. హన్మకొండలోని పోలీస్ పరేడ్ గ్రౌండ్లో మంగళవారం జరిగిన తెలంగాణ రాష్ట్ర అవతరణ దినోత్సవ వేడుకలకు ఆయన ముఖ్య అతిథిగా హాజరై, అత్యంత వైభవంగా ఉత్సవాలను నిర్వహించారు. ఈ సందర్భంగా మంత్రి మాట్లాడుతూ, రాష్ట్ర ఏర్పాటు ప్రతి పౌరుడిలో ఆత్మగౌరవాన్ని, సామాజిక బాధ్యతను పెంపొందించేలా నిలవాలని ఆకాంక్షించారు. జిల్లాలో ప్రభుత్వం అమలు చేస్తున్న ప్రజాహిత కార్యక్రమాలు, సంక్షేమ పథకాలు , సాధించిన ప్రగతిని ఈ సందర్భంగా ఆయన తన ప్రసంగంలో సుదీర్ఘంగా వివరించారు.
Telangana State Formation Day | అమరవీరుల కుటుంబాలకు ఘన సన్మానం..
తెలంగాణ సాధన కోసం సాగిన ఉద్యమంలో ప్రాణాలర్పించిన అమరవీరుల కుటుంబాలను ఈ వేడుకల్లో మంత్రి పొంగులేటి శ్రీనివాసరెడ్డి శాలువాలతో ఘనంగా సత్కరించారు. వారి త్యాగాలు, సేవలు రాష్ట్ర చరిత్రలో చిరస్థాయిగా నిలిచిపోతాయని, వారిని స్మరించుకోవడం మనందరి బాధ్యతని పేర్కొన్నారు. ఈ ఉత్సవాల్లో వరంగల్ ఎంపీ డాక్టర్ కడియం కావ్య, ఎమ్మెల్సీ బస్వరాజు సారయ్య, వరంగల్ పశ్చిమ ఎమ్మెల్యే నాయిని రాజేందర్ రెడ్డి, వర్ధన్నపేట ఎమ్మెల్యే కె.ఆర్. నాగరాజు, జిల్లా కలెక్టర్ చాహత్ బాజ్పాయి, వరంగల్ సీపీ సన్ప్రీత్ సింగ్, కుడా చైర్మన్ ఇనగాల వెంకట్రామిరెడ్డి సహా పలువురు ప్రజాప్రతినిధులు, అధికారులు, నగర ప్రముఖులు పెద్ద సంఖ్యలో పాల్గొన్నారు.
Telangana State Formation Day | ఆకట్టుకున్న ప్రదర్శనలు..
జిల్లాలోని డీఆర్డీఏ, మెప్మా, వ్యవసాయ, వైద్య ఆరోగ్య, మహిళా శిశు సంక్షేమ, గృహ నిర్మాణ శాఖలతో పాటు వివిధ ప్రభుత్వ విభాగాలు ఏర్పాటు చేసిన ప్రత్యేక ప్రదర్శన స్టాళ్లను మంత్రి సందర్శించి అధికారులను వివరాలు అడిగి తెలుసుకున్నారు. అలాగే, విద్యార్థులు ప్రదర్శించిన దేశభక్తి, తెలంగాణ సంస్కృతి ఉట్టిపడేలా సాగిన సాంస్కృతిక నృత్యాలు ప్రేక్షకులను విశేషంగా ఆకట్టుకున్నాయి. అనంతరం, విధి నిర్వహణలో ఉత్తమ ప్రతిభ కనబరిచిన పోలీసు సిబ్బందికి సేవా పథకాలను, సాంస్కృతిక కార్యక్రమాల్లో రాణించిన విద్యార్థులకు ప్రశంసా పత్రాలను మంత్రి అందజేసి అభినందించారు.
ఇది కూడా చదవండి: Telangana Global Gateway | గ్లోబల్ గేట్వేగా తెలంగాణ : సీఎం రేవంత్రెడ్డి
