Princeton Trademark Dispute | ‘ప్రిన్స్‌టన్’ పేరు వివాదం.. విద్యాసంస్థలకు సుప్రీంకోర్టు కీలక ఆదేశాలు

అక్షరటుడే వెబ్‌డెస్క్: Princeton Trademark Dispute | తెలంగాణలో ‘ప్రిన్స్‌టన్’ పేరుతో నడుస్తున్న విద్యాసంస్థలకు సుప్రీంకోర్టు కీలక ఆదేశాలు జారీ చేసింది. అమెరికాలోని ప్రసిద్ధ ‘ప్రిన్స్‌టన్ విశ్వవిద్యాలయం’ (Princeton University)తో తమకు ఎలాంటి సంబంధం లేదనే విషయాన్ని విద్యార్థులకు, ప్రజలకు స్పష్టంగా తెలిసేలా ప్రముఖంగా ప్రకటించాలని స్పష్టం చేసింది. వాగ్దేవి ఎడ్యుకేషనల్ సొసైటీతో పాటు ఇతరులు నడుపుతున్న ఆరు విద్యాసంస్థలపై దాఖలైన ట్రేడ్‌మార్క్ వివాదం అప్పీళ్లను విచారించిన జస్టిస్ పి.వి. సంజయ్ కుమార్, జస్టిస్ కె. వినోద్ చంద్రన్‌ల ధర్మాసనం ఈ ఉత్తర్వులు ఇచ్చింది.

Princeton Trademark Dispute | గందరగోళం వద్దు..

అంతర్జాతీయంగా ఎంతో గుర్తింపు ఉన్న ఐవీ లీగ్ సంస్థ అయిన ప్రిన్స్‌టన్ విశ్వవిద్యాలయానికి ట్రేడ్‌మార్క్ చట్టం ప్రకారం రక్షణ పొందే హక్కు ఉందని సుప్రీంకోర్టు పేర్కొంది. తెలంగాణలోని సంస్థలు కూడా అదే పేరు వాడటం వల్ల, అమెరికా వర్సిటీతో వీటికి ఏదో సంబంధం ఉందేమోనని విద్యార్థులు, ప్రజలు పొరపాటు పడే అవకాశం ఉందని కోర్టు అభిప్రాయపడింది. అందుకే విద్యార్థుల ప్రయోజనాలను కాపాడేందుకు కొన్ని కఠిన నిబంధనలు విధించింది.

Princeton Trademark Dispute | సుప్రీంకోర్టు విధించిన కీలక షరతులు..

ఆరు విద్యాసంస్థలు తమ అధికారిక వెబ్‌సైట్లు, బ్రోచర్లు, ప్రచార సామగ్రిలో ‘అమెరికా ప్రిన్స్‌టన్ వర్సిటీతో మాకు సంబంధం లేదు’ అనే నిరాకరణ ప్రకటనను (Disclaimer) స్పష్టంగా పెట్టాలి. ముఖ్యంగా వెబ్‌సైట్లలో వాడే అన్నిటికంటే పెద్ద ఫాంట్ సైజులోనే ఈ ప్రకటన కనిపించాలి. జూన్ 1 నుంచి 12వ తేదీ వరకు ఒక రోజు మార్చి ఒక రోజు ప్రముఖ దినపత్రికలలో పావు పేజీ (Quarter Page) సైజులో ఈ విషయమై బహిరంగ ప్రకటనలు ఇవ్వాలి. కాలేజీల బయట పెద్ద డిస్‌ప్లే బోర్డులు ఏర్పాటు చేయడంతో పాటు, విద్యార్థులకు ఇచ్చే సర్టిఫికెట్లు, మార్క్స్ మెమోలపై కూడా ఈ నిరాకరణ ప్రకటనను పెద్ద అక్షరాలతో ముద్రించాలి. వచ్చే విద్యాసంవత్సరం అడ్మిషన్ల ప్రక్రియ మొదలయ్యేలోపే ఈ ఆదేశాలన్నింటినీ అమలు చేయాలని కోర్టు గడువు విధించింది.

Princeton Trademark Dispute | వివాదం ఎక్కడ మొదలైంది?

తెలంగాణ సంస్థలు 1991 నుంచి ‘ప్రిన్స్‌టన్’ పేరుతో ఇక్కడే సేవలందిస్తున్నందున, వాటిని పూర్తిగా మూసివేయించడం సరికాదని గతంలో ఢిల్లీ హైకోర్టు డివిజన్ బెంచ్ పేర్కొంది. అయితే కొత్తగా ఈ పేరుతో ఎలాంటి సంస్థలు పెట్టకూడదని అప్పట్లో స్పష్టం చేసింది. ఈ మధ్యంతర ఉపశమనంపై అసంతృప్తితో అమెరికా ప్రిన్స్‌టన్ వర్సిటీ సుప్రీంకోర్టును ఆశ్రయించగా, తెలంగాణ సంస్థలు కూడా హైకోర్టు ఆదేశాలను సవాలు చేశాయి. చివరకు రెండు వైపులా వాదనలు విన్న అత్యున్నత న్యాయస్థానం.. కేసు పూర్తిగా తేలేవరకు ప్రస్తుతానికి పాత పేరుతో కొనసాగేందుకు అనుమతిస్తూనే, ప్రజలు మోసపోకుండా ఉండటానికి ఈ అదనపు ఆంక్షలను విధించింది. ఈ ట్రేడ్‌మార్క్ ఉల్లంఘన కేసు ప్రస్తుతం ఢిల్లీ హైకోర్టులో విచారణలో ఉంది.

ఇది కూడా చదవండి: Delhi Restaurant Fire | ఢిల్లీలో ఘోర అగ్నిప్రమాదం.. 20 మంది మృతి