అక్షరటుడే, వెబ్డెస్క్: Rahul Ramakrishna Tweets | టాలీవుడ్ ప్రముఖ నటుడు రాహుల్ రామకృష్ణ సోషల్ మీడియా వేదికగా చేసిన కొన్ని పోస్టులు ప్రస్తుతం రాజకీయ, సినీ వర్గాల్లో తీవ్ర చర్చకు దారితీశాయి. సామాజిక, రాజకీయ అంశాలపై ఎప్పటికప్పుడు తన అభిప్రాయాలను ముక్కుసూటిగా పంచుకునే ఆయన.. తాజాగా ఆంధ్రప్రదేశ్ ఉపముఖ్యమంత్రి పవన్ కళ్యాణ్ను లక్ష్యంగా చేసుకుని ఎక్స్ (ట్విట్టర్) ఖాతాలో వరుస ప్రశ్నలు కురిపించారు. పవన్ బాధ్యతలు నిర్వహిస్తున్న శాఖల పనితీరు, పారదర్శకతను ప్రస్తావిస్తూ ఆయన చేసిన ట్వీట్లు నెట్టింట విపరీతంగా వైరల్ అవుతున్నాయి.
Rahul Ramakrishna Tweets | ఆర్భాటాలు పక్కనపెట్టి ..
పవన్ కళ్యాణ్ చూస్తున్న ప్రభుత్వ శాఖల్లో సమాచార హక్కు చట్టం (RTI) ఎంతవరకు అమలవుతోందని రాహుల్ రామకృష్ణ ప్రశ్నించారు. డిప్యూటీ సీఎం తన ఆర్భాటాలను పక్కన పెట్టి, ఆయన పరిధిలోని ప్రతి ప్రభుత్వ విభాగం వివరాలను ప్రజలకు అందుబాటులో ఉంచాలని డిమాండ్ చేశారు. చట్టం ప్రకారం ముందస్తు సమాచారాన్ని బయట పెట్టాల్సిన సెక్షన్ 4.1(బి)ని ఆయా శాఖల్లో అమలు చేస్తున్నారా లేదా అని నిలదీశారు. తాను ఒక అభిమానిగానే బాధ్యతతో ఈ ప్రశ్నలు వేస్తున్నానని, దీనికి పవన్ కళ్యాణ్ సమాధానం చెప్పాల్సిన అవసరం ఎంతైనా ఉందని స్పష్టం చేశారు.
Rahul Ramakrishna Tweets | అటవీకరణపై అనుమానాలు..
దీనితో పాటు గిరిజన ప్రాంతాల్లోని ప్రత్యేక చట్టాల అమలు తీరుపై కూడా రాహుల్ పలు అభ్యంతరాలు వ్యక్తం చేశారు. పెసా (PESA) చట్టం, 1/70 చట్టం, గ్రామసభ చట్టాల అమలుకు సంబంధించిన అసలైన ఫలితాలను ప్రజల ముందుంచాలని డిమాండ్ చేశారు. ప్రభుత్వం చేపట్టినట్లు చెబుతున్న అటవీకరణ కార్యక్రమాల వివరాలపై ఒక స్వతంత్ర సంస్థ సేకరించిన గణాంకాలు చూస్తే తీవ్ర అనుమానాలు వ్యక్తమవుతున్నాయని పేర్కొన్నారు. తాను స్వయంగా క్షేత్రస్థాయిలో దాఖలు చేసి, గుర్తించిన ఫలితాల ఆధారంగానే ఈ వివరాలు కోరుతున్నానని చెబుతూ.. తన ట్వీట్ ముగింపులో ‘జై తెలంగాణ’ అని నినదించడం ప్రాధాన్యత సంతరించుకుంది. హైదరాబాద్ వేదికగా పవన్ కళ్యాణ్ చేసిన కొన్ని వ్యాఖ్యలపై ఇప్పటికే ఇక్కడ వివాదం నడుస్తున్న తరుణంలో ఈ నినాదం మరింత హాట్ టాపిక్గా మారింది.
Rahul Ramakrishna Tweets | ప్రశ్నిస్తే దేశద్రోహిని కాను..
ఈ తరహా ప్రశ్నల వల్ల పవన్ కళ్యాణ్ అభిమానులు, జనసేన శ్రేణుల నుంచి పెద్ద ఎత్తున ట్రోలింగ్ వచ్చే అవకాశం ఉందని ముందుగానే ఊహించిన రాహుల్ రామకృష్ణ.. మరో ట్వీట్లో దానికి కూడా క్లారిటీ ఇచ్చారు. కేవలం ప్రజాప్రతినిధులను ప్రశ్నించినంత మాత్రాన తనను దేశద్రోహిగా ముద్రవేయలేరని ఆయన స్పష్టం చేశారు. బాధ్యత గల పౌరుడిగా, అభిమానిగానే ప్రజాప్రతినిధుల నుంచి జవాబుదారీతనాన్ని కోరుకుంటున్నట్లు ఆయన తన పోస్ట్ చివర్లో స్పష్టం చేశారు.
@PawanKalyan please ask and show for results for the implementation of PESA, 1/70 Act, Grama Sabha Act. The afforestation programs, did you do them? numbers seem dubious as verified by an independent body
I’m asking for filed and marked resultsJai Telangana!
— Rahul Ramakrishna (@eyrahul) June 7, 2026
ఇది కూడా చదవండి: Jeevan Reddy Remarks | తెలంగాణ జాతిని అంతం చేసే యత్నం: మాజీ ఎమ్మెల్యే జీవన్రెడ్డి
