అక్షరటుడే నిజామాబాద్ సిటీ: SIR Survey Process | జిల్లాలో ‘సర్’ ప్రక్రియను పక్కాగా నిర్వహించాలని కలెక్టర్ ఇలా త్రిపాఠి (Collector Ila Tripathi) ఆదేశించారు. నగరంలోని న్యూ అంబేడ్కర్ భవన్లో గురువారం నిజామాబాద్ గ్రామీణ నియోజకవర్గ బూత్ లెవెల్ ఆఫీసర్లు, సూపర్వైజర్లు, సహాయ రిటర్నింగ్ అధికారులకు శిక్షణ తరగతులు నిర్వహించారు.
SIR Survey Process | ఈనెల 25వ తేదీ నుంచి..
ఈనెల 25 నుంచి జూలై 24 వరకు బీఎల్వోలు ప్రతి ఇంటిని సందర్శిస్తూ ఓటరు మ్యాపింగ్ను పూర్తి చేయాలని కలెక్టర్ సూచించారు. ఎస్ఐఆర్ ప్రక్రియ నిర్వహణలో పాల్గొంటున్న బీఎల్వోలకు సర్వే కాలంలో నెల రోజుల పాటు వారి శాఖలకు సంబంధించిన విధుల నుంచి మినహాయింపు కల్పించారని కలెక్టర్ తెలిపారు. దీనిని దృష్టిలో పెట్టుకుని ఎస్ఐఆర్ పైనే పూర్తి స్థాయిలో దృష్టిని కేంద్రీకరిస్తూ, ఎలాంటి తప్పిదాలకు తావు లేకుండా పకడ్బందీగా ఈ ప్రక్రియను పూర్తి చేయాలన్నారు. ఓటరు వివరాలను క్షుణ్ణంగా పరిశీలించాలని, ఓటరు జాబితాలో పేర్లు ఉన్నవారు ఇతర ప్రాంతానికి శాశ్వతంగా వలస వెళ్లారా.. మృతి చెందారా, రెండు చోట్ల పేర్లు ఉన్నాయా అనే అంశాలను నిశితంగా గమనించాలని సూచించారు.
SIR Survey Process | ‘సర్’ ఆధారంగానే ఓటరు జాబితా..
ఎస్ఐఆర్ సర్వే వివరాల ఆధారంగానే ఓటరు జాబితాను రూపొందించనున్న దృష్ట్యా పొరపాట్లకు అవకాశం ఇవ్వకుండా జాగ్రత్తగా సర్వే జరపాలని కలెక్టర్ సూచించారు. ఎస్ఐఆర్ ప్రక్రియకు సంబంధించిన ప్రతి అంశంపై అవగాహన కలిగి ఉండాలని, ఏవైనా సందేహాలు ఉంటే ఏమాత్రం సంకోచించకుండా శిక్షణ తరగతులలో నివృత్తి చేసుకోవాలని సూచించారు. శిక్షణా తరగతులలో నిజామాబాద్ ఆర్డీవో రాజేంద్రకుమార్, ఎన్నికల విభాగం పర్యవేక్షకుడు బాలరాజు, ఏఈఆర్వోలు, బీఎల్వోలు, సూపర్వైజర్లు పాల్గొన్నారు.
ఇది కూడా చదవండి..: Farmer Fertilizer Protest | రేవంత్ తుగ్లక్ పాలనలో రైతులు రోడ్డు పాలయ్యారు..: మాజీ మంత్రి ప్రశాంత్రెడ్డి
