అక్షరటుడే, ఇందూరు: Nizamabad Ganesh Shobhayatra | నవరాత్రులు పూజలందుకున్న లంబోదరుడు గంగమ్మ ఒడికి చేరే సమయం ఆసన్నమైంది.. ‘గణపతి బప్పా మోరియా.. ఆగలే వర్స్ తుమ్ జల్దీ ఆ..‘ అంటూ భక్తులు భక్తిశ్రద్ధలతో గణనాథుడికి వీడ్కోలు పలికే ఘట్టం మరికొన్ని గంటల్లో ప్రారంభం కానుంది.
Nizamabad Ganesh Shobhayatra | భక్తిశ్రద్ధలతో..
తొమ్మిదిరోజుల పాటు ఇళ్లలో, మండపాల్లో దూపదీప నైవేద్యాలతో విశేష పూజలందుకున్న లంబోదరుడిని సాగనంపేందుకు భక్తులు సిద్ధమవుతున్నారు. ఇన్నాళ్లు తమతోనే ఉన్న గణపయ్య తమను వీడి వెళ్తున్నందుకు భక్తులు భావోద్వేగానికి లోనవుతారు. అంతలా గణనాథుడు భక్తుల్లో లీనమై ఉంటాడు.
Nizamabad Ganesh Shobhayatra | మధ్యాహ్నం రథయాత్ర ప్రారంభం..
ఇందూరు (Nizamabad) పట్టణంలో గణేష్ నిమజ్జన శోభాయాత్ర అత్యంత ప్రతిష్టాత్మకంగా నిర్వహిస్తారు. పట్టిష్టమైన పోలీసు బందోబస్తు మధ్య.. సార్వజనిక్ గణేష్ మండలి ఆధ్వర్యంలో రథయాత్ర ప్రారంభమవుతుంది. మధ్యాహ్నం 2గంటల ప్రాంతంలో ప్రారంభమయ్యే ఈ రథాన్ని ఎడ్లు లాగుతుంటాయి. అలాగే భక్తులు సైతం రథాన్ని లాగి తమ మొక్కులు తీర్చుకుంటారు. మున్సిపల్ కార్పొరేషన్ ఆధ్వర్యంలో రథయాత్ర ప్రారంభ ప్రాంతం నుంచి గణపతుల బావి వరకు పారిశుధ్య ఏర్పాట్లు ఇప్పటికే పూర్తి చేశారు. దుబ్బ ప్రాంతంలో ప్రారంభమయ్యే రథయాత్ర రైల్వేకమాన్, గంజ్ మార్కెట్ మీదుగా బోధన్ బస్టాండ్ మీదుగా సాగుతుంది. గురుద్వార్, లక్ష్మీ మెడికల్ చౌరస్తా నుంచి గోల్హనుమాన్ చౌరస్తా నుంచి వినాయకుల బావికి చేరుకోవడంతో రథయాత్ర ముగుస్తుంది.
Nizamabad Ganesh Shobhayatra | 1300మందికి పైగా పోలీసు సిబ్బంది..
ఈ ఏడాది సీపీ సాయిచైతన్య ఆధ్వర్యంలో పోలీసు యంత్రాంగం అన్ని ఏర్పాట్లు పూర్తి చేసింది. దుబ్బలో రథయాత్ర ప్రారంభం నుంచి వినాయక్నగర్లో గణపతుల బావి వద్ద ముగింపు వరకు అడుగడుగునా పోలీసులను ఇప్పటికే మోహరించింది. 1300మందికి పైగా పోలీసు సిబ్బంది ఈ బందోబస్తులో పాల్గొన్నారు. పోలీస్ కమిషనరేట్లో కొంతమంది పోలీసులు హైదరాబాద్ గణేష్ శోభాయాత్రకు తరలినప్పటికీ ఇతర ప్రాంతాల నుంచి పోలీసు సిబ్బంది విధుల్లో పాల్గొంటున్నారు.
ఇది కూడా చదవండి..: Banswada Journalist Training | బాన్సువాడలో జర్నలిస్టుల శిక్షణకు జోరుగా ఏర్పాట్లు
