అక్షరటుడే వెబ్‌డెస్క్: Jio Starlink Competition | బిలియనీర్ ఎలాన్ మస్క్‌కు చెందిన శాటిలైట్ ఇంటర్నెట్ సంస్థ స్టార్‌లింక్ (Starlink), భారత టెలికాం రంగం మధ్య శాటిలైట్ స్పెక్ట్రమ్ కేటాయింపులపై చర్చలు నడుస్తున్న వేళ రిలయన్స్ జియో ( Reliance Jio )స్పందించింది. స్టార్‌లింక్ సహా ఏ విదేశీ కంపెనీ నుంచైనా వచ్చే పోటీని తాము మనస్ఫూర్తిగా స్వాగతిస్తున్నామని రిలయన్స్ స్పష్టం చేసింది. అయితే భారత మార్కెట్‌లో వ్యాపారం చేయాలనుకునే ఏ సంస్థయినా ఇక్కడి చట్టాలు, భద్రతా నిబంధనలను తప్పనిసరిగా పాటించాలని తేల్చిచెప్పింది.
Jio Starlink Competition | స్పందించిన రిలయన్స్..
సోషల్ మీడియా వేదిక ‘X’ లో రిలయన్స్ ఈ అంశంపై అధికారికంగా ప్రకటన విడుదల చేసింది. తాము ఎన్నడూ పోటీకి వెనకాడలేదని, ఆరోగ్యకరమైన పోటీ ఎల్లప్పుడూ వినియోగదారులకు మెరుగైన సేవలు అందేలా చేస్తుందని పేర్కొంది. 2016లో సున్నా కస్టమర్లతో భారత టెలికాం రంగంలోకి అడుగుపెట్టిన జియో, దశాబ్దం పూర్తికాకముందే 53 కోట్లకు పైగా వినియోగదారుల నమ్మకాన్ని గెలుచుకుందని గుర్తుచేసింది. భారతీయులకు అత్యంత చవకైన ధరకే అత్యుత్తమ డిజిటల్ మౌలిక సదుపాయాలు, హై-స్పీడ్ డేటాను అందించడంలో జియో కీలక పాత్ర పోషించిందని వివరించింది.
Jio Starlink Competition | ఒకే రకమైన నిబంధనలు ..
భారత ప్రభుత్వం స్వదేశీ, విదేశీ కంపెనీలన్నింటికీ సమానమైన లైసెన్సింగ్ విధానాలు, ప్రక్రియలను అమలు చేస్తోందని రిలయన్స్ అభిప్రాయపడింది. తమ సొంత శాటిలైట్ కమ్యూనికేషన్ సేవల క్లియరెన్స్ కోసం జియో కూడా ప్రభుత్వ నిబంధనల ప్రకారమే వేచి చూస్తోందని వెల్లడించింది. దేశ ప్రజలకు సేవలు అందించే క్రమంలో స్థానిక చట్టాలు, ప్రభుత్వ విధానాలకు ప్రతి ఒక్కరూ కట్టుబడి ఉండాల్సిందేనని రిలయన్స్ స్పష్టం చేసింది.
ఇది కూడా చదవండి: Kamareddy Tahsildar Office | తహశీల్దార్ కార్యాలయం తరలింపుపై సందిగ్ధం
