Jabalpur Boat Tragedy | ప్రాణం పోతున్నా బిడ్డను వీడలేదు.. జబల్‌పూర్‌లో కంటతడి పెట్టించే విషాదం

అక్షరటుడే, మధ్యప్రదేశ్: Jabalpur Boat Tragedy | మధ్యప్రదేశ్‌ (Madhya Pradesh)లోని జబల్‌పూర్ జిల్లా బార్గి డ్యామ్‌లో చోటుచేసుకున్న పడవ ప్రమాదం తీవ్ర విషాదాన్ని నింపింది. మే 1వ తేదీ అర్ధరాత్రి జరిగిన ఈ ఘటనలో ప్రాణాలు కోల్పోతున్నామని తెలిసి కూడా తన బిడ్డను కాపాడుకోవాలని తల్లడిల్లిన ఓ తల్లి పోరాటం చూసిన వారి కళ్లను చెమర్చింది.

Jabalpur Boat Tragedy | ఘటన వివరాలు:

సుమారు 29 మంది పర్యాటకులతో వెళ్తున్న ఒక బోటు ఖమరియా ద్వీపం సమీపంలోకి చేరుకోగానే అకస్మాత్తుగా బలమైన తుపాను బారిన పడింది. రాకాసి అలలు పడవను చుట్టుముట్టడంతో అది నీట మునిగింది. ఇప్పటివరకు 8 మంది మృతదేహాలు లభ్యమవగా, మొత్తం 9 మంది మరణించినట్లు అధికారులు ధృవీకరించారు. గాలింపు చర్యల ద్వారా 15 మందిని సురక్షితంగా బయటకు తీశారు. ఇంకా మరికొందరు గల్లంతయ్యారు.

Jabalpur Boat Tragedy | కంటతడి పెట్టించిన దృశ్యం:

ఈ ప్రమాదంలో మరణించిన వారిలో ఒక మాతృమూర్తి తన నాలుగేళ్ల కుమారుడిని గుండెలకు హత్తుకుని కనిపించిన తీరు అక్కడున్న వారిని కలచివేసింది. పడవ మునిగిపోతున్న సమయంలో, తన ప్రాణం పోయినా పర్వాలేదు కానీ తన బిడ్డ బతకాలని ఆమె చివరి నిమిషం వరకు ప్రయత్నించింది. మరణం తప్పదని గ్రహించినా, తన బిడ్డను ఒడిలో పొదువుకుని అలాగే నదిలో కలిసిపోయింది.

Jabalpur Boat Tragedy | వైఫల్యాలపై ఆగ్రహం:

ప్రమాదం నుంచి బయటపడిన వారు అధికారుల తీరుపై మండిపడుతున్నారు. పర్యాటకులకు సరైన లైఫ్ జాకెట్లు (Life jackets) అందించి ఉంటే మరణాల సంఖ్య తగ్గేదని బాధితులు చెబుతున్నారు. తుపాను వస్తుందని గమనించిన పర్యాటకులు పడవను వెనక్కి తిప్పమని కోరినా, అది సాధ్యపడే లోపే అలలు పడవను ముంచేశాయి.

స్థానికులు తాళ్ల సాయంతో కొందరిని కాపాడగలిగారు. ప్రస్తుతం ఎన్డీఆర్ఎఫ్ బృందాలు గల్లంతైన వారి కోసం గాలిస్తున్నాయి. అధికారులు కేసు నమోదు చేసి ప్రమాదానికి గల పూర్తి కారణాలపై విచారణ జరుపుతున్నారు.

ఇది కూడా చదవండి..: Gas Price Hike | ఒక్కరోజే రూ. 993 పెరిగిన గ్యాస్ ధరలు.. కేంద్రంపై రాహుల్ గాంధీ ఆగ్రహం!