అక్షరటుడే, వెబ్డెస్క్: Bay of Bengal Cyclone | ఆగ్నేయ బంగాళాఖాతంలో కేంద్రీకృతమై ఉన్న వాయుగుండం క్రమంగా బలపడుతూ ఆంధ్రప్రదేశ్ (Andhra Pradesh) తీరం దిశగా కదులుతోంది. రాబోయే 24 గంటల్లో ఇది తుఫాన్‌గా మారే అవకాశం ఉందని భారత వాతావరణ శాఖ (ఐఎండీ) వెల్లడించింది.
అంతేకాకుండా మంగళవారం నుండి బుధవారం నాటికి మరింత తీవ్రరూపం దాల్చి తీవ్ర తుఫాన్‌గా మారొచ్చని అంచనా వేస్తోంది. దీని ప్రభావంతో వచ్చే గురు, శుక్రవారాల్లో ఉత్తరాంధ్ర జిల్లాల్లో బలమైన ఈదురుగాలులతో కూడిన భారీ వర్షాలు కురిసే అవకాశముంది. ఈ నేపథ్యంలో కోస్తా తీర ప్రాంతాల ప్రజలు, యంత్రాంగం అప్రమత్తంగా ఉండాలని అధికారులు సూచించారు.
Bay of Bengal Cyclone | మత్స్యకారులకు కీలక హెచ్చరికలు..
ప్రస్తుతం ఈ వాయుగుండం చెన్నైకి తూర్పు ఆగ్నేయంగా సుమారు 860 కిలోమీటర్లు, విశాఖపట్నానికి దక్షిణ ఆగ్నేయంగా 1,040 కిలోమీటర్ల దూరంలో కేంద్రీకృతమై ఉంది. ఉత్తర వాయువ్య దిశగా ప్రయాణిస్తున్న ఈ తుఫాన్, ఉత్తర కోస్తాంధ్ర వైపు కదిలి తీరం దాటే సూచనలు ఉన్నాయని, అయితే కచ్చితంగా ఎక్కడ తీరం దాటుతుందనే అంశంపై త్వరలోనే స్పష్టత వస్తుందని వాతావరణ నిపుణులు చెబుతున్నారు. తుఫాన్ కారణంగా సముద్రం అల్లకల్లోలంగా మారనున్నందున, వేటకు వెళ్లిన మత్స్యకారులు ఇవాళ సాయంత్రంలోగా తీరానికి చేరుకోవాలని ఐఎండీ స్పష్టం చేసింది. తదుపరి ఆదేశాలు వెలువడే వరకు ఎవరూ సముద్రంలోకి వెళ్లవద్దని, ప్రజలు ఎప్పటికప్పుడు వాతావరణ హెచ్చరికలను గమనిస్తూ జాగ్రత్తగా ఉండాలని అధికారులు విజ్ఞప్తి చేశారు.
ఇది కూడా చదవండి..: Akvan Cyclone Telangana | తెలంగాణకు ‘అక్వాన్’ తుపాను ముప్పు.. ఈ జిల్లాలకు భారీ వర్ష సూచన
