అక్షరటుడే వెబ్డెస్క్: Bulk FD Rules 2026 | బ్యాంకుల్లో ఫిక్స్డ్ డిపాజిట్లు (FD) చేసే వారికి కొత్త నిబంధనలు అమల్లోకి రానున్నాయి. అక్టోబర్ 1, 2026 నుంచి బల్క్ ఫిక్స్డ్ డిపాజిట్లకు సంబంధించిన వడ్డీ రేట్ల విషయంలో ఈ కొత్త రూల్స్ వర్తించనున్నాయి. పెద్ద మొత్తంలో డిపాజిట్లు చేసే ఖాతాదారులకు వడ్డీ రేట్ల విషయంలో పూర్తి పారదర్శకత కల్పించడమే ఈ మార్పుల ప్రధాన ఉద్దేశం.
Bulk FD Rules 2026 | వడ్డీ రేట్ల వెల్లడి తప్పనిసరి..
కొత్త నిబంధనల ప్రకారం బ్యాంకులు ప్రతి పనిదినం బల్క్ ఎఫ్డీలపై వర్తించే వడ్డీ రేట్లను తమ అధికారిక వెబ్సైట్లో తప్పనిసరిగా వెల్లడించాల్సి ఉంటుంది. బ్యాంకులు ఉదయం 10 గంటలలోపు ఆ రోజు వడ్డీ రేట్లను అప్డేట్ చేయాలి. ఇందుకోసం ఉదయం 10.10 గంటల వరకు అదనపు గడువు ఉంటుంది. ఆ రోజు బల్క్ ఎఫ్డీ చేసే ఖాతాదారులకు వెబ్సైట్లో ప్రకటించిన రేట్లే వర్తిస్తాయి.
అయితే ఈ నిబంధనలు ప్రధానంగా బల్క్ డిపాజిట్లకు మాత్రమే వర్తిస్తాయి. షెడ్యూల్డ్ కమర్షియల్ బ్యాంకుల్లో సాధారణంగా రూ.3 కోట్లు లేదా అంతకంటే ఎక్కువ మొత్తాన్ని బల్క్ డిపాజిట్గా పరిగణిస్తారు. చిన్న మొత్తంలో సాధారణ ఎఫ్డీలు చేసే రిటైల్ ఖాతాదారులపై ఈ ప్రత్యేక మార్పు నేరుగా ఎలాంటి ప్రభావం చూపదు.
Bulk FD Rules 2026 | వేర్వేరు రేట్లకు చెక్..
కొత్త నిబంధనల్లో మరో ముఖ్యమైన మార్పు ఏంటంటే.. ఒకే బ్యాంకులో ఒకే రోజున, ఒకే మొత్తానికి, ఒకే కాలపరిమితితో చేసే బల్క్ ఎఫ్డీలకు వేర్వేరు శాఖలు తమ ఇష్టానుసారం వేర్వేరు వడ్డీ రేట్లు అందించే విధానానికి పరిమితులు రానున్నాయి. అయితే లిక్విడిటీ కవరేజ్ రేషియో (LCR) వంటి ప్రత్యేక నిబంధనల ఆధారంగా కొన్ని సందర్భాల్లో మినహాయింపులు ఉండే అవకాశం ఉంది.
Bulk FD Rules 2026 | ప్రయోజనాలు ..
పెద్ద మొత్తంలో డబ్బును ఎఫ్డీల్లో పెట్టుబడి పెట్టే వ్యక్తులు, సంస్థలు ప్రతి పనిదినం బ్యాంకు వెబ్సైట్లో బల్క్ ఎఫ్డీ వడ్డీ రేట్లను తెలుసుకునే అవకాశం ఉంటుంది. వడ్డీ రేట్ల విషయంలో సమాచార లోపం తగ్గడంతో పాటు, వివిధ బ్యాంకుల మధ్య రేట్లను పోల్చుకోవడం సులభం అవుతుంది. మొత్తంగా ఈ కొత్త నిబంధనలు బల్క్ ఎఫ్డీల ప్రక్రియను మరింత పారదర్శకంగా మార్చడానికి దోహదపడతాయి.
ఇది కూడా చదవండి: Milk Powder Smuggling | పిల్లల పాలపొడిని వదలని అక్రమార్కులు!
