అక్షరటుడే వెబ్డెస్క్: DoorDash Hyderabad | ప్రపంచంలోని ప్రముఖ స్థానిక వాణిజ్య వేదికల్లో (Local Commerce Platform) ఒకటైన డోర్డాష్ భారతదేశంలో తన తొలి కేంద్రాన్ని హైదరాబాద్లో ఏర్పాటు చేసింది. అమెరికాలోని టెంపే (అరిజోనా), మెక్సికో సిటీల తర్వాత ప్రపంచవ్యాప్తంగా తమ మూడవ అంతర్గత కస్టమర్ ఎక్స్పీరియన్స్ & ఇంటిగ్రిటీ (CXI) సర్వీస్ సెంటర్ను నగరంలో ప్రారంభించింది. తెలంగాణలోని ప్రతిభ, ఆవిష్కరణల వ్యవస్థపై దీర్ఘకాలిక నిబద్ధతతో ఈ బహుళ సంవత్సరాల పెట్టుబడిని పెడుతున్నట్లు సంస్థ వెల్లడించింది.
తెలంగాణ ( Telangana ) ప్రభుత్వ సమాచార సాంకేతిక, పరిశ్రమల శాఖల మంత్రి శ్రీ డి. శ్రీధర్ బాబు ఈ కేంద్రాన్ని లాంఛనంగా ప్రారంభించారు. ఈ కార్యక్రమంలో డోర్డాష్ చీఫ్ ఫైనాన్షియల్ ఆఫీసర్ రవి ఇనుకొండ, డోర్డాష్ వర్క్ఫోర్స్ స్ట్రాటజీ అండ్ టాలెంట్ అక్విజిషన్ ఆపరేషన్స్ సీనియర్ డైరెక్టర్ జెన్నా కోంకే, తెలంగాణ ప్రభుత్వ ఐటీ సలహాదారు శ్రీ సాయి కృష్ణ తదితరులు పాల్గొన్నారు.
DoorDash Hyderabad | అంతర్జాతీయ మద్దతు..
ప్రపంచవ్యాప్తంగా 40కి పైగా దేశాల్లో కార్యకలాపాలు నిర్వహిస్తూ, 1 బిలియన్కు పైగా జనాభా ఉన్న ప్రాంతాల్లో 56 మిలియన్లకు పైగా నెలవారీ క్రియాశీల వినియోగదారులకు సేవలందిస్తున్న డోర్డాష్ అంతర్జాతీయ వేదికకు ఈ హైదరాబాద్ బృందం అండగా నిలవనుంది. వినియోగదారులు, వ్యాపారులు, డాషర్లు నమ్మకమైన సేవలు పొందేందుకు ఇది తోడ్పడుతుంది. తొలుత సుమారు 500 మంది ఉద్యోగులతో ప్రారంభించి, కాలక్రమేణా ఈ సంఖ్యను 3,000 కంటే ఎక్కువ ఉద్యోగాలకు విస్తరించాలని సంస్థ ప్రణాళికాబద్ధంగా ముందుకు వెళ్తోంది. అక్టోబర్ 2026లో తొలి కార్యాలయం ప్రారంభం కానుండగా, ఆ తర్వాత ఏప్రిల్ 2027 నాటికి హైటెక్ సిటీలో మరింత పెద్దదైన దీర్ఘకాలిక కార్యాలయం అందుబాటులోకి రానుంది. ఈ ప్రారంభ అవసరాల కోసం ‘టేబుల్ స్పేస్’ (Table Space) సంస్థతో భాగస్వామ్యం కుదుర్చుకున్నారు.
DoorDash Hyderabad | గ్లోబల్ హబ్గా హైదరాబాద్..
హైదరాబాద్ కేవలం సాంప్రదాయ ఐటీ సేవల కేంద్రమే కాకుండా.. జీసీసీలు, ఈ-కామర్స్, క్విక్-కామర్స్, గిగ్ ఎకానమీని ఒకచోట చేర్చే విస్తృత డిజిటల్ ఆర్థిక వ్యవస్థ కేంద్రంగా ఎదుగుతోందనడానికి డోర్డాష్ రాక నిదర్శనమని మంత్రి శ్రీధర్ బాబు పేర్కొన్నారు. 2025లో డోర్డాష్ 100 బిలియన్ డాలర్లకు పైగా మార్కెట్ప్లేస్ గ్రాస్ ఆర్డర్ వాల్యూ (GOV)ను నమోదు చేసింది.
DoorDash Hyderabad | ఉద్యోగాల కోసం దరఖాస్తు..
హైదరాబాద్ హబ్ కోసం డోర్డాష్ నేరుగా ఉద్యోగులను నియమించుకుంటోంది. ఆసక్తి గల అభ్యర్థులు డోర్డాష్ అధికారిక కెరీర్స్ పేజీ (careersatdoordash.com/working-at-doordash-in-india/) ద్వారా ప్రస్తుత ఉద్యోగ అవకాశాలను పరిశీలించి దరఖాస్తు చేసుకోవచ్చని సంస్థ తెలిపింది.
ఇది కూడా చదవండి: Flydubai Flight | పైలట్ను కత్తితో పొడిచిన కోపైలెట్.. విమానం ఎమర్జెన్సీ ల్యాండింగ్
