అక్షరటుడే వుబ్డెస్క్:Hyderabad Metro Refinancing| హైదరాబాద్ రవాణా వ్యవస్థలో అత్యంత ముఖ్యమైన మెట్రో రైలు భవిష్యత్తును మార్చేసే ఒక కీలక పరిణామం చోటుచేసుకుంది. మెట్రోపై ఉన్న భారీ రుణ భారాన్ని తగ్గించేందుకు ఏకంగా రూ.13,600 కోట్ల రీఫైనాన్సింగ్ ఒప్పందం కుదిరింది. ఇండియన్ రైల్వే ఫైనాన్స్ కార్పొరేషన్ (IRFC) తో ఎల్అండ్టీ మెట్రో రైల్ హైదరాబాద్ లిమిటెడ్ ఈ మెగా డీల్ కుదుర్చుకుంది. న్యూఢిల్లీలో జరిగిన ఒక ప్రత్యేక కార్యక్రమంలో ఐఆర్ఎఫ్సీ సీఎండీ మనోజ్ కుమార్ దూబే, తెలంగాణ ఐఏఎస్ అధికారి కె.రామకృష్ణ రావు సమక్షంలో ఈ ఒప్పంద పత్రాలపై సంతకాలు జరిగాయి.
Hyderabad Metro Refinancing | పూర్తిగా ప్రభుత్వ పరిధిలోకి..
ఈ ఒప్పందంతో హైదరాబాద్ మెట్రో( Hyderabad Metro) నిర్వహణలో సరికొత్త అధ్యాయం మొదలుకానుంది. ఇప్పటి వరకు లార్సెన్ అండ్ టూబ్రో (L&T) చేతుల్లో ఉన్న ‘ఎల్అండ్టీ మెట్రో రైల్ హైదరాబాద్ లిమిటెడ్’ 100 శాతం యాజమాన్య హక్కులు ఇకపై పూర్తిగా తెలంగాణ ప్రభుత్వానికి బదిలీ కానున్నాయి. దీనివల్ల హైదరాబాద్ మెట్రో పూర్తిగా ఒక ప్రభుత్వ ప్రజా రవాణా ఆస్తిగా (Public Asset) మారబోతోంది.
Hyderabad Metro Refinancing | 20 ఏళ్ల గడువు..
ఈ ఒప్పందం ద్వారా సమకూరే రూ.13,600 కోట్ల నిధులను ప్రస్తుతం ఉన్న అప్పులను రీఫైనాన్స్ చేయడానికి (నాన్ కన్వర్టిబుల్ డిబెంచర్లు, కమర్షియల్ పేపర్లు, వర్కింగ్ కాపిటల్ కోసం) ఉపయోగిస్తారు. ఈ రుణాన్ని చెల్లించడానికి 20 ఏళ్ల సుదీర్ఘ కాలపరిమితి ఉండటంతో పాటు, ప్రతి మూడు నెలలకు ఒకసారి (త్రైమాసిక పద్ధతిలో) చెల్లింపులు జరిపే వెసులుబాటు ఉండటం వల్ల మెట్రోపై నెలవారీ వడ్డీల భారం గణనీయంగా తగ్గుతుంది. ఈ భారీ ఆర్థిక ఉపశమనం వల్ల రాబోయే రోజుల్లో చేపట్టబోయే మెట్రో ఫేజ్-2, ఫేజ్-3 విస్తరణ పనులకు ఎలాంటి నిధుల కొరత లేకుండా పనులు వేగంగా ముందుకు సాగడానికి మార్గం సుగమమైంది.
Hyderabad Metro Refinancing | నగర ప్రగతికి మెట్రోనే కీలకం..
ఈ సందర్భంగా ప్రభుత్వ ప్రతినిధి రామకృష్ణ రావు మాట్లాడుతూ.. ముఖ్యమంత్రి రేవంత్ రెడ్డి నేతృత్వంలో హైదరాబాద్ రవాణా వ్యవస్థను అంతర్జాతీయ స్థాయిలో తీర్చిదిద్దడానికి ప్రభుత్వం కట్టుబడి ఉందని స్పష్టం చేశారు. దేశ ఆర్థిక వృద్ధిలో హైదరాబాద్ పాత్ర కీలకమని, మెట్రో విస్తరణ ద్వారా నగరంలో ట్రాఫిక్ సమస్యలు తగ్గి ప్రయాణికులకు సురక్షితమైన ప్రయాణం అందుబాటులోకి వస్తుందని ఆయన ఆశాభావం వ్యక్తం చేశారు. ఈ భారీ డీల్ కు సహకరించిన కేంద్ర ప్రభుత్వానికి, ఐఆర్ఎఫ్సీ, ఎల్అండ్టీ సంస్థలకు ఆయన కృతజ్ఞతలు తెలిపారు.
ఇది కూడా చదవండి: KTR Challenge Revanth | సీఎం రేవంత్రెడ్డికి కేటీఆర్ సవాల్
