అక్షరటుడే వెబ్‌డెస్క్: India Fuel Price Hike| దేశంలో ఇంధన ధరల పెంపు భయాలు మళ్లీ మొదలయ్యాయి. త్వరలోనే పెట్రోల్, డీజిల్ ధరలతో పాటు బ్యాంక్ వడ్డీ రేట్లు కూడా పెరిగే అవకాశం ఉందని ప్రచారం జరుగుతోంది. అంతర్జాతీయంగా ముడిచమురు ధరలు పెరగడం, మధ్యప్రాచ్యంలో ఉద్రిక్తతలు కొనసాగుతుండటమే ఇందుకు ప్రధాన కారణమని ప్రముఖ సంస్థ ‘ఆక్స్ ఫర్డ్ ఎకనామిక్స్’ స్పష్టం చేసింది. నవంబర్ నెలలోనే ఇంధన ధరలలో స్వల్ప పెంపు ఉండవచ్చని అంచనా వేసింది. వచ్చే ఏడాది ఉత్తరప్రదేశ్, పంజాబ్ సహా ఐదు రాష్ట్రాలలో ఎన్నికల ప్రచారం ఊపందుకునేలోపే ఈ ధరలను పెంచవచ్చని ‘బ్లూమ్‌బెర్గ్’ నివేదిక పేర్కొంది. అయితే ఈ పెంపుపై ప్రభుత్వం నుంచి ఇంకా ఎలాంటి అధికారిక ప్రకటన రాలేదు.
India Fuel Price Hike | ఆర్థిక నిపుణులు ఆందోళన..
ఇంధన ధరలు పెరిగితే దేశంలో ద్రవ్యోల్బణం (ధరల పెరుగుదల) మరింత పెరిగే ప్రమాదం ఉందని ఆర్థిక నిపుణులు ఆందోళన వ్యక్తం చేస్తున్నారు. 2026 అక్టోబర్-డిసెంబర్ త్రైమాసికంలో ద్రవ్యోల్బణం 6.2 శాతానికి, 2027 జనవరి-మార్చి త్రైమాసికంలో 6.5 శాతానికి చేరవచ్చని నివేదిక స్పష్టం చేసింది. ఇదే జరిగితే రిజర్వ్ బ్యాంక్ ఆఫ్ ఇండియా (ఆర్‌బీఐ) నిర్ణయించిన 2 నుంచి 6 శాతం పరిమితిని దాటిపోతుంది. ఆర్‌బీఐ అంచనా వేసిన 5.2 శాతంతో పోలిస్తే, ఆర్థిక సంవత్సరానికి ద్రవ్యోల్బణం 5.4 శాతంగా నమోదయ్యే అవకాశం ఉందని ఆక్స్ ఫర్డ్ ఎకనామిక్స్ భావిస్తోంది.
India Fuel Price Hike | చమురు ధరలు పెరగడం..
ధరల ఒత్తిడి ఇలాగే కొనసాగితే డిసెంబర్, ఫిబ్రవరి నెలల సమీక్షల్లో ఆర్‌బీఐ రెపో రేటును (వడ్డీ రేట్లను) 25 నుంచి 50 బేసిస్ పాయింట్ల వరకు పెంచవచ్చని నిపుణులు చెబుతున్నారు. ఒకవేళ నవంబర్‌లో ఇంధన ధరలను పెంచకపోతే ద్రవ్యోల్బణ అంచనాలు కొంత తగ్గే అవకాశం ఉంటుంది. మరోవైపు అంతర్జాతీయ మార్కెట్‌లో చమురు ధరలు పెరగడం రూపాయి మార్పిడి విలువపై కూడా ప్రభావం చూపిస్తోంది. ఆర్‌బీఐ ( RBI ) ఎంత జోక్యం చేసుకున్నా రూపాయికి దీర్ఘకాలిక స్థిరత్వం దక్కడం కష్టమేనని నివేదిక పేర్కొంది. మొత్తానికి పెట్రోల్, డీజిల్ ధరలు పెరిగితే రవాణా ఖర్చులు పెరిగి నిత్యావసరాలు ప్రియమవడంతో పాటు బ్యాంక్ ఈఎంఐల భారం కూడా పెరిగే అవకాశం ఉంది.
ఇది కూడా చదవండి: Telangana Activists Welfare Website | ఉద్యమకారుల కోసం వెబ్‌సైట్ ఏర్పాటు అభినందనీయం
