అక్షరటుడే వెబ్డెస్క్: LIC Unclaimed Funds | లైఫ్ ఇన్సూరెన్స్ కార్పొరేషన్ ఆఫ్ ఇండియా (LIC), ఎంప్లాయీస్ ప్రావిడెంట్ ఫండ్ ఆర్గనైజేషన్ (EPFO) వద్ద క్లెయిమ్ చేయకుండా నిలిచిపోయిన అన్క్లెయిమ్డ్ నిధుల విషయంలో కేంద్ర ప్రభుత్వం కీలక ప్రకటన చేసింది. ఈ నిధులను మరే ఇతర ప్రభుత్వ అవసరాలకు మళ్లించే ఎటువంటి ప్రతిపాదన లేదని కేంద్రం స్పష్టం చేసింది. లోక్సభలో ఓ సభ్యుడు అడిగిన ప్రశ్నకు కేంద్ర ఆర్థిక శాఖ సహాయ మంత్రి పంకజ్ చౌదరి లిఖితపూర్వకంగా ఈ సమాధానం ఇచ్చారు. ఆగస్టు 19, 2024 నాటి ఐఆర్డిఏఐ (IRDAI) మాస్టర్ సర్క్యులర్ ప్రకారం.. పదేళ్లకు పైగా క్లెయిమ్ కాకుండా ఉన్న బీమా నిధులను ‘సీనియర్ సిటిజన్ వెల్ఫేర్ ఫండ్’ (SCWF)కు బదిలీ చేయాల్సి ఉంటుందని, వాటిని వేరే పనులకు ఉపయోగించే యోచన లేదని మంత్రి స్పష్టం చేశారు.
LIC Unclaimed Funds | నిధుల వివరాలు..
మార్చి 31, 2026 నాటికి ఎల్ఐసీ వద్ద మొత్తం రూ. 7,318.50 కోట్ల అన్క్లెయిమ్డ్ నిధులు ఉండగా, ఇందులో పాలసీదారుల అసలు మొత్తం రూ. 5,564.55 కోట్లు కాగా, దానిపై వచ్చిన వడ్డీ ఆదాయం రూ. 1,753.95 కోట్లుగా ఉంది. అలాగే, సరిగ్గా అదే తేదీ నాటికి ఈపీఎఫ్ఓ ఖాతాలో రూ. 9,330.56 కోట్ల అన్క్లెయిమ్డ్ నిధులు ఉన్నట్లు కేంద్ర మంత్రి వెల్లడించారు.
LIC Unclaimed Funds | గుర్తింపునకు ప్రత్యేక చర్యలు..
అసలైన లబ్ధిదారులు లేదా వారి నామినీలను గుర్తించి, ఆ మొత్తాన్ని తిరిగి చెల్లించేందుకు ఎల్ఐసీ, ఈపీఎఫ్ఓ సంస్థలు పలు ప్రత్యేక చర్యలు చేపడుతున్నాయి. ఎల్ఐసీ తన అధికారిక వెబ్సైట్ ద్వారా అన్క్లెయిమ్డ్ నిధులను వెతుక్కునేందుకు ప్రత్యేక సదుపాయం కల్పించింది. దీనితో పాటు ఎస్ఎంఎస్లు, ఉత్తరాలు, ఏజెంట్లు, బీమా సఖీల ద్వారా ఖాతాదారులను సంప్రదిస్తోంది. మరోవైపు ఈపీఎఫ్ఓలో కేవైసీ (KYC) ఆధారంగా ఖాతాలను వర్గీకరిస్తున్నారు. రూ. 1,000 లేదా అంతకంటే తక్కువ బ్యాలెన్స్ ఉండి, ఆధార్ వెరిఫై అయిన ఇన్-ఆపరేటివ్ ఖాతాల్లోని డబ్బును ఎటువంటి దరఖాస్తులు లేకుండానే నేరుగా లబ్ధిదారుల బ్యాంక్ ఖాతాల్లో జమ చేసేందుకు ఒక పైలట్ ప్రాజెక్ట్ను కూడా ప్రారంభించినట్లు మంత్రి వెల్లడించారు.
ఇది కూడా చదవండి: Gig Workers Issues | గిగ్ వర్కర్ల సమస్యలు పరిష్కరించాలి : కవిత
