అక్షరటుడే, వెబ్డెస్క్: LRLACM Missile Test | భారత రక్షణ పరిశోధన – అభివృద్ధి సంస్థ (DRDO) మరో కీలక విజయాన్ని తన ఖాతాలో వేసుకుంది. స్వదేశీ సాంకేతిక పరిజ్ఞానంతో అభివృద్ధి చేసిన లాంగ్ రేంజ్ ల్యాండ్ అటాక్ క్రూయిజ్ మిస్సైల్ (LRLACM) పరీక్షను విజయవంతంగా నిర్వహించింది.
LRLACM Missile Test | ఒడిశా పరీక్షా కేంద్రం నుంచి
ఒడిశా తీరంలోని పరీక్షా కేంద్రం నుంచి నిర్వహించిన ఈ ప్రయోగం విజయవంతమై, క్షిపణి నిర్దేశించిన లక్ష్యాలన్నింటినీ కచ్చితత్వంతో ఛేదించినట్లు అధికారులు వెల్లడించారు.
ఈ ప్రయోగాన్ని భారత నౌకాదళం (నేవీ), వైమానిక దళం (ఎయిర్ ఫోర్స్)కు చెందిన ఉన్నతాధికారులు ప్రత్యక్షంగా వీక్షించారు. పరీక్ష సందర్భంగా క్షిపణి పనితీరు, మార్గనిర్దేశక వ్యవస్థలు, లక్ష్య ఛేదన సామర్థ్యం వంటి కీలక అంశాలు నిర్దేశించిన ప్రమాణాలకు అనుగుణంగా పనిచేసినట్లు DRDO తెలిపింది.
LRLACM Missile Test | అత్యంత కచ్చితత్వంతో దాడులు
స్వదేశీ పరిజ్ఞానంతో రూపొందించిన ఈ సుదూర క్రూయిజ్ క్షిపణి భారత రక్షణ సామర్థ్యాలను మరింత బలోపేతం చేయనున్నదని నిపుణులు అభిప్రాయపడుతున్నారు. భూభాగంలోని లక్ష్యాలపై అత్యంత కచ్చితత్వంతో దాడులు నిర్వహించే సామర్థ్యం ఈ క్షిపణికి ఉన్నట్లు వెల్లడించారు.
LRLACM Missile Test | స్వదేశీ ఆయుధ వ్యవస్థల అభివృద్ధి
ఈ విజయవంతమైన ప్రయోగంపై రక్షణ మంత్రి రాజ్నాథ్ సింగ్ స్పందిస్తూ, DRDO శాస్త్రవేత్తలు, ఇంజినీర్లు మరియు ప్రాజెక్టులో భాగస్వాములైన ప్రతి ఒక్కరికి అభినందనలు తెలిపారు. దేశ రక్షణ స్వావలంబన దిశగా ఇది మరో ముఖ్యమైన ముందడుగుగా ఆయన పేర్కొన్నారు.
LRLACM విజయవంతమైన పరీక్షతో భారత రక్షణ రంగంలో స్వదేశీ ఆయుధ వ్యవస్థల అభివృద్ధికి మరింత ఊతం లభించనుందని విశ్లేషకులు భావిస్తున్నారు.
