అక్షరటుడే వెబ్డెస్క్: Masoud Pezeshkian Resignation | ఇరాన్ రాజకీయాల్లో ఒక్కసారిగా తీవ్ర కలకలం రేగింది. అధ్యక్షుడు మసూద్ పెజెష్కియన్ ( Masoud Pezeshkian) తన పదవికి రాజీనామా చేశారంటూ అంతర్జాతీయ మీడియాలో పెద్ద ఎత్తున వార్తలు వస్తున్నాయి. ప్రభుత్వ నిర్ణయాల్లో ఇస్లామిక్ రివల్యూషనరీ గార్డ్ కార్ప్స్ (IRGC) తో కూడిన కఠినవాద వర్గాల జోక్యం ఎక్కువైందని, కీలక నిర్ణయాల ప్రక్రియల నుండి తన ప్రభుత్వాన్ని పూర్తిగా పక్కనబెట్టారని ఆరోపిస్తూ ఆయన తన రాజీనామా లేఖను సుప్రీం లీడర్ కార్యాలయానికి సమర్పించినట్లు ‘ఇరాన్ ఇంటర్నేషనల్’ ఓ కథనంలో పేర్కొంది. అయితే, ఈ వార్తలను ఇరాన్ ప్రభుత్వం తీవ్రంగా తోసిపుచ్చింది. ఇవన్నీ కేవలం రాజకీయ ప్రేరేపిత అవాస్తవాలని స్పష్టం చేసింది.
Masoud Pezeshkian Resignation | అసలు నివేదికలో ఏముంది?
ప్రముఖ మీడియా సంస్థ నివేదిక ప్రకారం.. దేశంలోని అంతర్గత అధికార మార్పులు, అత్యంత కీలకమైన పాలనాపరమైన నిర్ణయాల విషయంలో అధ్యక్షుడి అధికారాలకు కఠినవాద శక్తులు అడ్డుకట్ట వేస్తున్నట్లు సమాచారం. ఈ పరిణామాల నేపథ్యంలో, ప్రస్తుత పరిస్థితుల్లో తాను ప్రభుత్వాన్ని సమర్థవంతంగా నడపలేనని, తన రాజ్యాంగబద్ధమైన బాధ్యతలను నెరవేర్చలేనని పేర్కొంటూ మసూద్ పెజెష్కియన్ తక్షణమే పదవి నుండి తప్పుకునేందుకు అనుమతించాలని కోరినట్లు సదరు కథనం వెల్లడించింది. దీనికి ఇరాన్ సుప్రీం లీడర్ మొజ్తబా ఖమేనీ ఆమోదం తెలపాల్సి ఉందని పేర్కొంది.
Masoud Pezeshkian Resignation | పుకార్లను కొట్టిపారేసిన అధికారులు..
ఈ ఆరోపణలపై ఇరాన్ అధ్యక్ష కార్యాలయం స్పందిస్తూ.. ఇవన్నీ విదేశీ నెట్వర్క్లు సృష్టిస్తున్న కల్పిత కథనాలని మండిపడింది. ఇరాన్ సార్వభౌమత్వాన్ని, ప్రజల ఐక్యతను దెబ్బతీయడానికి జరుగుతున్న “హాస్యాస్పదమైన మీడియా గేమ్స్” లో ఇవి భాగమని కొట్టిపారేసింది.
అధ్యక్షుడు మసూద్ పెజెష్కియన్ ఎక్కడికీ వెళ్లడం లేదని, ఆయన యథావిధిగా తన విధులను నిర్వహిస్తూ ప్రజలకు సేవ చేస్తూనే ఉంటారని అధికార వర్గాలు స్పష్టం చేశాయి.
ఇది కూడా చదవండి: Virat Kohli Emotional | కన్నీళ్లు పెట్టుకున్న కోహ్లీ.. ఓదార్చిన అనుష్క శర్మ
