అక్షరటుడే వెబ్‌డెస్క్: Meta Child Safety | సోషల్ మీడియా వేదికలపై చిన్నారుల భద్రతను మరింత కఠినతరం చేసేందుకు ప్రముఖ టెక్ దిగ్గజం ‘మెటా’ (Meta) కీలక నిర్ణయం తీసుకుంది. ప్లాట్‌ఫారమ్‌లలో బాలల లైంగిక దోపిడీ (CSE) , తప్పుదారి పట్టించే ప్రకటనలను అరికట్టేందుకు సరికొత్త కృత్రిమ మేధస్సు (AI) సాధనాలను ప్రవేశపెట్టినట్లు ప్రకటించింది. నేరస్థులు మారుస్తున్న పద్ధతులకు అనుగుణంగా తమ సెక్యూరిటీ సిస్టమ్‌ను మరింత బలోపేతం చేసినట్లు వెల్లడించింది.
Meta Child Safety | కీలక విశేషాలు..
2026 జనవరి నుంచి జూన్ మధ్య కాలంలో ఒక్క భారతదేశంలోనే ఫేస్‌బుక్, ఇన్‌స్టాగ్రామ్ వేదికలపై బాలల లైంగిక దోపిడీకి సంబంధించిన 53 లక్షల కంటెంట్‌పై మెటా చర్యలు తీసుకుంది. ఇందులో ఎవరైనా ఫిర్యాదు చేయకముందే ఏకంగా 98 శాతానికి పైగా కంటెంట్‌ను సిస్టమ్స్ ముందస్తుగా గుర్తించి తొలగించడం విశేషం. ఇదే సమయంలో ప్రపంచవ్యాప్తంగా 3.32 కోట్ల కంటెంట్‌పై చర్యలు తీసుకోగా, అందులో 97 శాతం కంటెంట్‌ను ముందే గుర్తించారు.
Meta Child Safety | ఏఐ టెక్నాలజీతో కట్టడి..
సాధారణ ప్రకటనల ముఖం వెనుక చట్టవిరుద్ధమైన లింక్‌లను రహస్యంగా చొప్పిస్తున్న నేరస్థుల వ్యూహాలను తిప్పికొట్టేందుకు కొత్త లార్జ్ లాంగ్వేజ్ మోడల్ (LLM) ఆధారిత గుర్తింపు వ్యవస్థను ప్రవేశపెట్టారు. అలాగే భద్రతా లోపాలను ముందుగానే పసిగట్టేందుకు ‘రెడ్-టీమింగ్ AI ఏజెంట్‌’ను వినియోగిస్తున్నారు. ఫొటో, వీడియో మ్యాచింగ్ టెక్నాలజీ (PhotoDNA) ద్వారా అనుమానాస్పద కాపీలను తక్షణమే గుర్తిస్తారు. ఉల్లంఘనలకు పాల్పడే బాహ్య వెబ్‌సైట్లు , లింక్‌లను ఎప్పటికప్పుడు బ్లాక్ చేస్తున్నారు.
Meta Child Safety | చట్ట అమలు సంస్థలతో సహకారం..
బాలల భద్రతకు సంబంధించిన కేసులను మరింత వేగంగా పరిష్కరించేందుకు, నేషనల్ సెంటర్ ఫర్ మిస్సింగ్ & ఎక్స్‌ప్లాయిటెడ్ చిల్డ్రన్ (NCMEC) తో పాటు ఇండియన్ సైబర్‌క్రైమ్ కోఆర్డినేషన్ సెంటర్ (I4C) నిర్వహిస్తున్న నేషనల్ సైబర్ క్రైమ్ రిపోర్టింగ్ పోర్టల్‌కు కూడా నేరుగా నివేదించనున్నట్లు మెటా స్పష్టం చేసింది. యువతకు సురక్షితమైన ఆన్‌లైన్ వాతావరణాన్ని అందించేందుకు ఈ రక్షణ చర్యలు నిరంతరం కొనసాగుతాయని మెటా స్పష్టం చేసింది.
ఇది కూడా చదవండి: New Bar Applications | నూతన బార్ ఏర్పాటుకు దరఖాస్తుల ఆహ్వానం
