అక్షరటుడే, వెబ్డెస్క్: Microwave Food | ప్రస్తుత ఉరుకుల పరుగుల జీవితంలో మైక్రోవేవ్ ఓవెన్ అనేది వంటగదిలో ఒక భాగమైపోయింది. చల్లారిన ఆహారాన్ని నిమిషాల్లో వేడి చేసుకోవడానికి ఇది ఎంతో సహాయపడుతుంది. అయితే, సౌకర్యం వెనుక కొన్ని జాగ్రత్తలు పాటించకపోతే ఆరోగ్యం దెబ్బతినే అవకాశం ఉంది. కొన్ని రకాల ఆహార పదార్థాలను మైక్రోవేవ్లో వేడి చేయడం వల్ల అవి విషపూరితంగా మారడమే కాకుండా, ప్రమాదాలకు కూడా దారితీయవచ్చు.
Microwave Food | అసలు ఏయే పదార్థాలను మైక్రోవేవ్లో పెట్టకూడదో ఇప్పుడు తెలుసుకుందాం.
కోడిగుడ్లు (ఉడికించినవి లేదా పెంకుతో ఉన్నవి) : గుడ్లను పెంకుతో సహా మైక్రోవేవ్లో పెడితే, లోపల విపరీతమైన ఆవిరి ఒత్తిడి పెరిగి అవి బాంబులా పేలిపోయే ప్రమాదం ఉంది. ఒకవేళ ఉడికించిన గుడ్డును వేడి చేయాలనుకుంటే, దానిని ముక్కలుగా కోసి వేడి చేయడం సురక్షితం.
ఆకుకూరలు : ఆకుకూరల్లో నైట్రేట్లు అధికంగా ఉంటాయి. వీటిని మైక్రోవేవ్లో పదే పదే వేడి చేసినప్పుడు ఆ నైట్రేట్లు కాన్సర్ కారకాలుగా (Nitrosamines) మారే అవకాశం ఉంది. దీనివల్ల పోషకాలు నశించడమే కాకుండా ఆరోగ్యం కూడా దెబ్బతింటుంది.
మిగిలిపోయిన అన్నం : అన్నాన్ని ఎక్కువసేపు గది ఉష్ణోగ్రత వద్ద ఉంచినప్పుడు అందులో ‘బాసిల్లస్ సిరియస్’ అనే బ్యాక్టీరియా చేరే అవకాశం ఉంటుంది. మైక్రోవేవ్లో అన్నం అన్ని వైపులా సమానంగా వేడి కాదు, ఫలితంగా ఆ బ్యాక్టీరియా చనిపోకుండా ఆహారపు విషతుల్యతకు (Food Poisoning) దారితీయవచ్చు.
మిరపకాయలు : పచ్చి మిర్చి లేదా ఎండు మిరపకాయలను ఓవెన్లో పెడితే అందులోని ‘క్యాప్సైసిన్’ అనే రసాయనం ఆవిరి రూపంలో విడుదలవుతుంది. మైక్రోవేవ్ తలుపు తీయగానే ఆ ఘాటైన ఆవిరి కళ్లు, ముక్కు , గొంతులో తీవ్రమైన మంటను కలిగిస్తుంది.
Microwave Food | ప్రాసెస్ చేసిన మాంసం..
సాసేజ్లు, సలామీ వంటి నిల్వ ఉంచిన మాంస ఉత్పత్తుల్లో ప్రిజర్వేటివ్లు ఉంటాయి. వీటిని మైక్రోవేవ్ చేయడం వల్ల అవి ఆక్సీకరణం చెంది గుండె జబ్బులకు దారితీసే హానికర సమ్మేళనాలుగా మారుతాయి.
ప్లాస్టిక్ , మెటల్ పాత్రలు : సాధారణ ప్లాస్టిక్ పాత్రలను వాడితే అందులోని ‘బిస్ఫెనాల్-ఏ’ (BPA) వంటి కెమికల్స్ ఆహారంలో కలిసి హార్మోన్ల సమస్యలను తెచ్చిపెడతాయి. కేవలం ‘మైక్రోవేవ్ సేఫ్’ అని ఉన్న వాటినే వాడాలి. స్టీల్, అల్యూమినియం పాత్రలు లేదా ఫాయిల్స్ వాడటం వల్ల స్పార్క్స్ (మెరుపులు) వచ్చి ఓవెన్ కాలిపోయే ప్రమాదం ఉంది.
ఇది కూడా చదవండి..: Mosquito Coil Health Risks| దోమల అగర్బత్తీలు డెంగ్యూ కంటే ప్రమాదకరం.. పరిశోధనలో తేలిన సంచలన నిజాలు!
