అక్షరటుడే ఆర్మూర్: Padakal Palm Fire | నిజామాబాద్ జిల్లా జక్రాన్పల్లి మండలం పడకల్ గ్రామంలో గురువారం రాత్రి భారీ అగ్నిప్రమాదం సంభవించింది. ఈతవనంలో మంటలు వ్యాపించి, పచ్చని వనం కాలిబూడిదగా మారింది.
గ్రామ శివారులో గౌడ సంఘం ఆధ్వర్యంలో ఏర్పాటు చేసిన ఈతవనం మంటల్లో చిక్కుకుని దగ్ధమైంది. సుమారు 5 ఎకరాల విస్తీర్ణంలో ఉన్న ఈ వనంలో సుమారు 200కు పైగా ఈత చెట్లు పూర్తిగా కాలిబూడిదైనట్లు స్థానికులు తెలిపారు.
Padakal Palm Fire | కారణాలు ఏమిటి..?
అగ్ని ప్రమాదానికి కచ్చితమైన కారణాలు ఇంకా తెలియరాలేదు. ఎండాకాలం తీవ్రత కారణంగా ప్రమాదవశాత్తు మంటలు చెలరేగి ఉండవచ్చని స్థానికులు భావిస్తుండగా.. మరికొందరు కావాలనే ఎవరో నిప్పు పెట్టి ఉండవచ్చని అనుమానిస్తున్నారు. సమాచారం అందుకున్న వెంటనే స్థానికులు మంటలను అదుపులోకి తెచ్చేందుకు ప్రయత్నించినప్పటికీ, అప్పటికే భారీ నష్టం సంభవించింది.
ఈ ఘటనపై సంబంధిత అధికారులు విచారణ చేపట్టాల్సి ఉంది. రైతులు, గౌడ సంఘ సభ్యులు ఈ ఘటనపై ఆవేదన వ్యక్తం చేస్తున్నారు. అగ్నిప్రమాదం వల్ల జరిగిన నష్టాన్ని అంచనా వేసి, బాధితులకు ప్రభుత్వం తగిన పరిహారం అందించాలని వారు కోరుతున్నారు.
