అక్షరటుడే, ఇందూరు: ‘గాంధారి విద్య’తో ఈ చిన్నారి అద్భుతాలు చేస్తోంది. తన ప్రతిభతో ‘ఇండియా బుక్ ఆఫ్ రికార్డ్స్’లో చోటు సంపాదించింది.
Pravashree India Record | కళ్లకు గంతలు కట్టుకుని విన్యాసాలు
నగరంలోని ప్రెసిడెన్సీ హైస్కూల్లో 6వ తరగతి చదువుతున్న విద్యార్థిని కె. ప్రవశ్రీ కళ్లకు గంతలు కట్టుకుని ఒకసారి ఐదు విన్యాసాలు చేయడంలో ఆరితేరింది. ‘గాంధారి విద్య’గా పేరుగాంచిన ఈ విన్యాసాలను ఏకకాలంగా ప్రదర్శించి ఔరా అనిపిస్తోంది. నగరంలోని వివేకానంద సేవ సమితి ఆధ్వర్యంలో ఇటీవల జరిగిన సమ్మర్ క్యాంప్లో కె.ప్రవశ్రీ ‘గాంధారి విద్య’ ప్రదర్శనతో అబ్బురపర్చింది. ఒకేసారి ఓవర్ బోర్డ్ మీద స్కేటింగ్, హులా హూప్ రింగ్ నడుము చుట్టూ తిప్పడం, తలపై దీపం పెట్టుకొని డాన్స్ స్టెప్స్ వేస్తూ, 2×2 రూబిక్స్ క్యూబ్ను క్షణాల్లో సాల్వ్ చేయడం, వీటన్నింటిని కళ్లు కనిపించకుండా సమతుల్యంగా చేయడం ద్వారా ఆమె ఇండియా బుక్ ఆఫ్ రికార్డ్స్లో స్థానం సాధించింది.
Pravashree India Record | కష్టమైన ఈ విన్యాసాలు..
చూడడానికే కష్టమైన ఈ విన్యాసాలను ప్రవశ్రీ చిరునవ్వుతో, ఎలాంటి తడబాటు లేకుండా పూర్తి చేసింది. ఈ విన్యాసాలను గుర్తించిన ఇండియా బుక్ ఆఫ్ రికార్డ్స్ (India Book of Records) ప్రతినిధులు ఆమె రికార్డుకు గుర్తిస్తూ మెడల్, సర్టిఫికెట్, పెన్, ఐడీ కార్డు అందజేశారు. ఆస్ట్రేలియా, దుబాయ్, ఇటలీ వంటి దేశాల్లోనూ ప్రదర్శనలు ఇచ్చిన కె. ప్రవశ్రీ తన గురువు నవనీత మార్గదర్శకత్వంలో రికార్డు క్రియేట్ చేసింది. ఈ సందర్భంగా ఆమె తల్లిదండ్రులు సాయిప్రసాద్, వైష్ణవి మాట్లాడుతూ ‘కళ్లు మూసుకున్నా మనసు తెరిస్తే ఏదైనా సాధించొచ్చని’ ప్రవశ్రీ నిరూపించిందన్నారు. ఇండియా బుక్ ఆఫ్ రికార్డ్స్లో (India Book of Records)లో స్థానం సంపాదించడం తమ జీవితంలో గుర్తుండిపోయే క్షణమన్నారు.
ఇది కూడా చదవండి..: Telangana University Water Crisis | తెయూలో నీటి కటకట.. రోడ్డెక్కిన విద్యార్థినులు
