అక్షరటుడే వెబ్డెస్క్:Russia India Relations|రష్యా విదేశాంగ మంత్రి సెర్గీ లావ్రోవ్ త్వరలో భారత పర్యటనకు రానున్న నేపథ్యంలో ఇరుదేశాల మధ్య ఉన్న బంధంపై అత్యంత కీలక వ్యాఖ్యలు చేశారు. ఒక వార్తా సంస్థకు ఇచ్చిన ఇంటర్వ్యూలో భారత్కు రష్యా ఎల్లప్పుడూ వెన్నంటే ఉంటుందని భరోసా ఇచ్చారు.
Russia India Relations|ఇంధన ఒప్పందాలకు తిరుగులేదు..
భారతదేశానికి అవసరమైన ఇంధన వనరుల సరఫరాలో రష్యా ఎన్నడూ విఫలం కాలేదని లావ్రోవ్ స్పష్టం చేశారు. ముఖ్యంగా చమురు, గ్యాస్, బొగ్గు సరఫరాలో ఎటువంటి ఆటంకాలు కలగనివ్వమని ఆయన హామీ ఇచ్చారు. అంతర్జాతీయ మార్కెట్లో తలెత్తే అన్యాయమైన పోటీ ఇరుదేశాల మధ్య ఉన్న ఒప్పందాలను దెబ్బతీయకుండా కఠిన చర్యలు తీసుకుంటామని వెల్లడించారు. భారత ప్రయోజనాలకు ఎట్టిపరిస్థితుల్లోనూ నష్టం జరగనివ్వబోమని ఆయన నొక్కి చెప్పారు.
Russia India Relations|ప్రధాని మోదీపై ప్రశంసల జల్లు..
ప్రధాని నరేంద్ర మోదీని ప్రపంచంలోని అత్యంత శక్తిమంతమైన నాయకుల్లో ఒకరిగా లావ్రోవ్ అభివర్ణించారు. ఆర్థిక వ్యవస్థ, సైన్యం, సంస్కృతి వంటి అన్ని రంగాల్లో భారత్ సార్వభౌమాధికారాన్ని (Self-reliance) సాధించడమే లక్ష్యంగా మోదీ పనిచేస్తున్నారని ఆయన కొనియాడారు. భారత్-రష్యా సంబంధాలు కేవలం అవసరాల మీద కాకుండా లోతైన స్నేహంపై ఆధారపడి ఉన్నాయని, వీటిని బలహీనపరిచేందుకు కొందరు చేస్తున్న ప్రయత్నాల పట్ల అప్రమత్తంగా ఉండాలని ఆయన సూచించారు.
Russia India Relations|కుడంకుళం ప్రాజెక్ట్ ..
కుడంకుళం అణు విద్యుత్ కేంద్రం నిర్మాణంలో రష్యా సహకారం నిరంతరాయంగా కొనసాగుతుందని, కొత్త పవర్ యూనిట్ల పనులు వేగంగా జరుగుతున్నాయని ఆయన తెలిపారు. అలాగే, ‘హిందీ-రూసీ భాయ్ భాయ్’ అనేది కేవలం ఒక నినాదం మాత్రమే కాదని, అది ఇరుదేశాల సంస్కృతిలో భాగమని చెప్పారు. రష్యాలో భారతీయ సినిమాలు, ముఖ్యంగా రాజ్ కపూర్ చిత్రాలకు ఉన్న ఆదరణ రెండు దేశాల మధ్య ఉన్న మానవతా సంబంధాలకు నిదర్శనమని పేర్కొన్నారు.
Russia India Relations|ముందున్న కీలక చర్చలు..
తన పర్యటనలో భాగంగా లావ్రోవ్ భారత విదేశాంగ మంత్రి ఎస్. జైశంకర్తో ద్వైపాక్షిక అంశాలపై చర్చలు జరపనున్నారు. వీటితో పాటు ‘బ్రిక్స్’ (BRICS) విదేశాంగ మంత్రుల సమావేశంలో కూడా పాల్గొని కీలక నిర్ణయాలు తీసుకోనున్నారు.
ఇది కూడా చదవండి: Bandi Bhagirath POCSO Case | విచారణకు రాని బండి భగీరథ్.. హైకోర్టులో ముందస్తు బెయిల్ పిటిషన్.. రేపు భవిష్యత్తు తేలనుందా?
