అక్షరటుడే, వెబ్డెస్క్: Solomon Pappayya Death | తమిళ భాష, సాహిత్యానికి విశేష సేవలు అందించిన ప్రముఖ పండితుడు, నటుడు, టీవీ వ్యాఖ్యాత సోలమన్ పప్పయ్య (90) కన్నుమూశారు.
కొంతకాలంగా అనారోగ్యంతో బాధపడుతున్న ఆయన మదురైలోని ఓ ప్రైవేటు ఆస్పత్రిలో శుక్రవారం తుదిశ్వాస విడిచారు. శనివారం ఆయన అంత్యక్రియలను ప్రభుత్వ లాంఛనాలతో నిర్వహించారు.
తమిళనాట ‘పట్టిమండ్రం’ కార్యక్రమాలకు ప్రత్యేక గుర్తింపు తీసుకురావడంలో సోలమన్ పప్పయ్య కీలక పాత్ర పోషించారు. పండితుల మధ్య జరిగే సాహితీ చర్చలను సామాన్య ప్రజలకు చేరువ చేయడంలో ఆయన తనదైన ముద్ర వేశారు.
అనారోగ్యం తీవ్రతరం కావడానికి కొద్దిరోజుల ముందే వినాయక చవితి సందర్భంగా ప్రసారం కావాల్సిన ప్రత్యేక పట్టిమండ్రం కార్యక్రమాన్ని కూడా ఆయన రికార్డు చేశారు.
BRICS Declaration | ఉగ్రవాదంపై కఠిన వైఖరి.. బ్రిక్స్ న్యూఢిల్లీ డిక్లరేషన్
Solomon Pappayya Death | రజినీకాంత్ సంతాపం
సోలమన్ పప్పయ్య మృతిపై సూపర్స్టార్ రజినీకాంత్ తీవ్ర విచారం వ్యక్తం చేశారు. తమిళ భాష, సాహిత్యం కోసం ఆయన చేసిన సేవలను గుర్తుచేసుకుంటూ సంతాపం తెలిపారు. పట్టిమండ్రం వేదికను ప్రజలకు మరింత చేరువ చేసిన వ్యక్తిగా పప్పయ్య సేవలను పలువురు ప్రముఖులు స్మరించుకున్నారు.
Solomon Pappayya Death | అనుకోకుండా సినీ రంగ ప్రవేశం
సినిమాల్లో నటించాలనే ప్రత్యేక ఆసక్తి సోలమన్ పప్పయ్యకు లేకపోయినా.. ఆయన గొంతులోని ప్రత్యేకత, హావభావాలు, ప్రేక్షకుల్లో ఉన్న ఆదరణ దర్శకుల దృష్టిని ఆకర్షించాయి.
దీంతో ఆయనకు సినిమాల్లో నటించే అవకాశాలు లభించాయి. ‘మాప్పిళ్లై’, ‘పుదు వరుషం’ వంటి చిత్రాలతో ప్రారంభమైన ఆయన సినీ ప్రస్థానానికి దర్శకుడు శంకర్ చిత్రాలు మరింత గుర్తింపు తీసుకొచ్చాయి.
1999లో విడుదలైన ‘ముదల్వన్’తో పాటు ‘బాయ్స్’, ‘ఎస్ మేడమ్’ తదితర సినిమాల్లోనూ పప్పయ్య నటించారు. అయితే రజినీకాంత్ ప్రధాన పాత్రలో తెరకెక్కిన ‘శివాజీ: ది బాస్’ ఆయనకు ప్రత్యేక గుర్తింపు తెచ్చింది. ఆ సినిమాలో థొండైమాన్ పాత్రలో రజినీకాంత్తో కలిసి ఆయన చేసిన సన్నివేశాలు ప్రేక్షకులను విశేషంగా ఆకట్టుకున్నాయి.
Solomon Pappayya Death | 200కు పైగా అవకాశాలు వచ్చినా..
‘శివాజీ’ సినిమా విజయంతో సోలమన్ పప్పయ్యకు వరుసగా సినిమా అవకాశాలు వచ్చాయి. 200కు పైగా అవకాశాలు వచ్చినప్పటికీ ఆయన వాటిని స్వీకరించకుండా తనకు ఎంతో ఇష్టమైన తమిళ సాహిత్యం, పట్టిమండ్రం కార్యక్రమాలపైనే దృష్టి పెట్టాలని నిర్ణయించుకున్నారు.
‘శివాజీ’లోని అంగవై, సంగవై పాత్రలతో రూపొందించిన ఓ హాస్య సన్నివేశంపై తర్వాత ఆయన అసంతృప్తి వ్యక్తం చేసినట్లు సమాచారం. తమిళ చరిత్రలో ప్రాధాన్యం కలిగిన ఆ పేర్లను హాస్య సన్నివేశంలో ఉపయోగించడం సరైన నిర్ణయం కాదని ఆయన భావించినట్లు తెలుస్తోంది. అనంతరం సినిమాలకు దూరంగా ఉండటానికి ఇదొక కారణంగా మారిందని చెబుతారు.
Solomon Pappayya Death | పద్మశ్రీతో పాటు పలు గౌరవాలు
తమిళ భాష, సాహిత్యం, ప్రజల్లో చైతన్యం తీసుకురావడానికి చేసిన కృషికి సోలమన్ పప్పయ్యకు పలు పురస్కారాలు లభించాయి. తమిళనాడు ప్రభుత్వం 2000లో ‘కలైమామణి’ పురస్కారంతో ఆయనను సత్కరించింది. అనంతరం 2021లో భారత ప్రభుత్వం దేశంలోని ప్రతిష్ఠాత్మక ‘పద్మశ్రీ’ పురస్కారాన్ని అందించింది.
ఆరు దశాబ్దాలకు పైగా తమిళ భాష, సాహిత్యం, ప్రజా వేదికలతో మమేకమైన సోలమన్ పప్పయ్య మరణం తమిళ సాహితీ, సాంస్కృతిక రంగాలకు తీరని లోటుగా మారింది.
