అక్షరటుడే వెబ్డెస్క్ : Tamil Nadu Politics |తమిళనాడు అసెంబ్లీ ఎన్నికల ఫలితాల తర్వాత అక్కడి రాజకీయాలు మరింత వేడెక్కాయి. డీఎంకే (DMK) అధ్యక్షుడు ఎంకే స్టాలిన్ తంజావూరులో జరిగిన ఒక వివాహ వేడుకలో మాట్లాడుతూ, నూతన ముఖ్యమంత్రి, తమిళగ వెట్రి కజగం (TVK) నాయకుడు జోసెఫ్ విజయ్పై ఘాటు వ్యాఖ్యలు చేశారు. కనీసం బూత్ ఏజెంట్లను కూడా సరిగ్గా నియమించుకోకుండా, కేవలం సోషల్ మీడియా ప్లాట్ఫామ్ ఇన్స్టాగ్రామ్ ద్వారా పిల్లలను ప్రభావితం చేసి విజయ్ అధికారంలోకి వచ్చారంటూ స్టాలిన్ వ్యంగ్యాస్త్రాలు కురిపించారు.
Tamil Nadu Politics | శాంతిభద్రతల క్షీణతపై ఆందోళన..
తమిళనాడులో ఇటీవల కాలంలో ప్రతిరోజూ జరుగుతున్న హత్యల ఉదంతాలను ప్రస్తావిస్తూ రాష్ట్రంలో శాంతిభద్రతల పరిస్థితిపై స్టాలిన్ తీవ్ర ఆందోళన వ్యక్తం చేశారు. కాంచీపురం జిల్లా పడప్పైలో కాలేజీ విద్యార్థుల దారుణ హత్య, తూత్తుకుడిలో మద్యం వివాదంలో జరిగిన యువకుడి హత్య వంటి ఘటనలను ఆయన ఉదహరించారు. కొత్త ప్రభుత్వం బాధ్యతలు స్వీకరించినప్పటి నుంచి నేరాల సంఖ్య పెరుగుతోందని, ఇది ప్రజల్లో భయాందోళనలు కలిగిస్తోందని విమర్శించారు. గత ఐదేళ్ల డీఎంకే పాలనలో శాంతిభద్రతలు క్షీణించాయంటూ అప్పట్లో ఆరోపణలు చేసిన వారు, ఇప్పుడు టీవీకే అధికారంలోకి వచ్చినా అదే పరిస్థితి కొనసాగుతుండటంపై ఏం సమాధానం చెబుతారని ప్రశ్నించారు. ప్రజల ప్రాణాలను, ఆస్తులను రక్షించడం నూతన ప్రభుత్వ ప్రాథమిక కర్తవ్యమని, ఇప్పటికైనా సీఎం విజయ్ వాస్తవాలను గ్రహించి కఠిన చర్యలు తీసుకోవాలని డిమాండ్ చేశారు.
Tamil Nadu Politics | అపజయానికి బాధ్యత..
ఇటీవల ముగిసిన అసెంబ్లీ ఎన్నికలలో డీఎంకే కేవలం 59 స్థానాలకే పరిమితం కాగా, విజయ్ నేతృత్వంలోని టీవీకే 108 స్థానాలు గెలుచుకుని ఇతర పార్టీల మద్దతుతో ప్రభుత్వాన్ని ఏర్పాటు చేసిన సంగతి తెలిసిందే. ఈ ఘోర పరాజయంపై డీఎంకే అధినేత స్టాలిన్ స్పందిస్తూ, క్షేత్రస్థాయిలో పార్టీ ఓటమికి గల కారణాలను విశ్లేషించడానికి 38 మంది సభ్యులతో కూడిన ఒక ఉన్నత స్థాయి సమీక్షా కమిటీని ఏర్పాటు చేసినట్లు ప్రకటించారు. రాష్ట్రంలోని మొత్తం 234 నియోజకవర్గాల్లో పర్యటించి, క్షేత్రస్థాయి కార్యకర్తలు, స్థానిక నాయకుల నుంచి పక్షపాతం లేకుండా అభిప్రాయాలను సేకరించాలని కమిటీ సభ్యులను స్టాలిన్ ఆదేశించారు. జూన్ 5వ తేదీలోగా ఈ నివేదికలను సమర్పించాలని, దాని ఆధారంగా జూన్ చివరి నాటికి పార్టీలో కీలక సంస్థాగత సంస్కరణలు, మార్పులు చేపడతామని స్పష్టం చేశారు.
ప్రభుత్వ వ్యతిరేక ప్రచారాన్ని, సోషల్ మీడియాలో వస్తున్న అబద్ధాలను తిప్పికొట్టాలని స్టాలిన్ తన సోషల్ మీడియా ‘X’ ఖాతా ద్వారా పార్టీ శ్రేణులకు పిలుపునిచ్చారు. కొత్త ప్రభుత్వం పరిపాలన సాగించుకోవడానికి తాము ఎలాంటి ఆటంకాలు కలిగించబోమని, అయితే తమ అసమర్థతను కప్పిపుచ్చుకోవడానికి డీఎంకేపై తప్పుడు నిందలు వేస్తే మాత్రం సహించేది లేదని ఆయన హెచ్చరించారు.
ఇది కూడా చదవండి: Government Job Age Limit | నిరుద్యోగులకు గుడ్న్యూస్.. వయో పరిమితి పెంచిన ప్రభుత్వం
