అక్షరటుడే వెబ్‌డెస్క్: TMC Bank Accounts | మమతా బెనర్జీ ( Mamata Banerjee )నేతృత్వంలోని తృణమూల్ కాంగ్రెస్ (TMC) పార్టీకి చెందిన నాలుగు బ్యాంక్ ఖాతాల సీజ్‌పై సుప్రీంకోర్టు కీలక తీర్పు వెలువరించింది. పార్టీ ఖాతాల సీజ్‌ను సవాలు చేస్తూ దాఖలు చేసిన పిటిషన్‌ను అత్యున్నత న్యాయస్థానం తోసిపుచ్చింది. రూ. 804 కోట్లు ఉన్న బ్యాంక్ అకౌంట్ల ఫ్రీజ్‌‌ను ఎత్తివేయడానికి మధ్యంతర ఉపశమనం అందించేందుకు నిరాకరిస్తూ కలకత్తా హైకోర్టు ఆగస్టు 27న ఇచ్చిన ఉత్తర్వులను సమర్థించింది. జస్టిస్ ఎం.ఎం. సుందరేష్, జస్టిస్ పి.బి. వరాలేలతో కూడిన ధర్మాసనం ఈ తీర్పు వెలువరించింది.
TMC Bank Accounts | హైకోర్టు తీర్పులో జోక్యం చేసుకోలేం..
పార్టీ గుర్తు వివాదం ఇంకా కేంద్ర ఎన్నికల సంఘం (ECI) వద్ద పెండింగ్‌లో ఉందని సుప్రీంకోర్టు స్పష్టం చేసింది. ఈ కారణంగానే కలకత్తా హైకోర్టు తీర్పులో తాము జోక్యం చేసుకోలేమని తేల్చిచెప్పింది. అయితే ఈ కేసుకు సంబంధించి మెరిట్స్ జోలికి మాత్రం వెళ్లడం లేదని అత్యున్నత న్యాయస్థానం పేర్కొంది.
TMC Bank Accounts | పార్టీ కార్యకలాపాలు స్తంభించాయి..
ఈ కేసులో తృణమూల్ కాంగ్రెస్ తరఫున సీనియర్ న్యాయవాది ఏ.ఎం. సింఘ్వీ వాదనలు వినిపిస్తూ.. బ్యాంక్ ఖాతాలను సీజ్ చేయడం ద్వారా పార్టీ రాజకీయ కార్యకలాపాలను అడ్డుకునే యత్నం జరుగుతోందని ఆరోపించారు. త్వరలో జరగనున్న ఉపఎన్నికల నేపథ్యంలో పార్టీ నిర్వహణ ఖర్చుల నిమిత్తం నెలకు కనీసం రూ. 12.15 కోట్లు అవసరమని తెలిపారు. దేశంలోనే మూడో అతిపెద్ద పార్టీ అయిన ఎఐటిసికి ( AITC ) ప్రాథమిక రాజకీయ కార్యకలాపాలకే ఈ నిధులు అత్యవసరమని, ఎలాంటి కోర్టు ఉత్తర్వులు లేకుండానే రాష్ట్ర పోలీసులు ఖాతాలను నిలిపివేశారని వాదించారు.
TMC Bank Accounts | ప్రభుత్వ వాదన..
మమతా వర్గం అభ్యర్థనను పశ్చిమ బెంగాల్ ప్రభుత్వం తరఫున హాజరైన సోలిసిటర్ జనరల్ తుషార్ మెహతా తీవ్రంగా వ్యతిరేకించారు. రెండు వర్గాలు తామే అసలైన తృణమూల్ అని దావా వేస్తున్నాయని, ఈ వివాదాన్ని పరిష్కరించాలని కేంద్ర ఎన్నికల సంఘాన్ని సుప్రీంకోర్టు కోరిందని గుర్తుచేశారు. ఎన్నికల గుర్తును ఈసీఐ ఫ్రీజ్ చేసినందున, అసలైన పార్టీ ఏదో తేలేవరకు బ్యాంక్ ఖాతాలను ఎవరు నిర్వహించాలనేది నిర్ణయించలేమని తెలిపారు.
అలాగే, టీఎంసీ ప్రధాన కార్యదర్శి పర్సనల్ సెక్రటరీ సుమిత్ రాయ్ రోడ్లపై సేకరించిన రూ. 35 కోట్ల నగదును ఈ ఖాతాల్లో జమ చేసినట్లు దర్యాప్తులో తేలిందని మెహతా కోర్టుకు వివరించారు. మునుపటి ప్రభుత్వ హయాంలో ప్రభుత్వ భూములను ప్రైవేట్ వ్యక్తులకు అప్పగించి సంపాదించిన అక్రమ సొమ్మునే ఇందులో జమ చేశారని, దీనిపై ముమ్మర విచారణ జరుగుతోందని తెలిపారు. దసరా సెలవుల తర్వాత ఈ అంశంపై కలకత్తా హైకోర్టు విచారణ జరపనుందని ఆయన స్పష్టం చేశారు.
ఇది కూడా చదవండి: Danam Nagender Votes | హైదరాబాద్‌ను తగలబెడతాం.. దానం నాగేందర్ సంచలన హెచ్చరిక
