అక్షరటుడే వెబ్డెస్క్:US Senator Comments|అమెరికాలోని మిస్సోరి రాష్ట్ర రిపబ్లికన్ సెనేటర్ ఎరిక్ ష్మిట్ సోషల్ మీడియా వేదికగా చేసిన వ్యాఖ్యలు ఇప్పుడు తీవ్ర దుమారం రేపుతున్నాయి. ముఖ్యంగా హైదరాబాద్లోని ప్రసిద్ధ చిలుకూరు బాలాజీ ఆలయ చిత్రాన్ని పంచుకుంటూ ఆయన చేసిన వ్యాఖ్యలు భారతీయులను, ఐటీ నిపుణులను షాక్కు గురిచేస్తున్నాయి. అమెరికాలోని హెచ్-1బీ (H-1B) వీసా వ్యవస్థను ఆయన ఒక “వీసా కార్టెల్” (ఒక ముఠా లేదా మాఫియా) అని సంబోధించారు. ఈ వ్యవస్థ ద్వారా అమెరికన్ కార్మికులను పక్కన పెట్టి భారతీయులకు మేలు చేస్తున్నారని, ఇది అమెరికా మధ్యతరగతి ఆర్థిక వ్యవస్థను దెబ్బతీస్తోందని ఆయన ఆరోపించారు.
US Senator Comments|’వీసా టెంపుల్’ పేరుతో విమర్శలు..
హైదరాబాద్లోని చిలుకూరు బాలాజీ ఆలయాన్ని భక్తులు ఆప్యాయంగా “వీసా టెంపుల్” అని పిలుచుకుంటారు. ఈ విషయాన్ని ప్రస్తావిస్తూ ఎరిక్ ష్మిట్ విమర్శలు గుప్పించారు. “హైదరాబాద్లో వీసా కార్టెల్కు ఒక ప్రత్యేక దేవాలయం ఉంది. అక్కడ వేలాది మంది భారతీయులు తమ పాస్పోర్ట్లకు ఆశీర్వాదం పొందుతున్నారు. అమెరికా కార్మికులు ఇలాంటి మోసపూరిత వ్యవస్థతో పోటీ పడాల్సిన అవసరం లేదు” అంటూ ఆయన ఘాటుగా స్పందించారు. దశాబ్దాలుగా విద్యార్థులు, నిపుణులు తమ వీసా ఇంటర్వ్యూలకు ముందు దైవ అనుగ్రహం కోసం ఈ ఆలయాన్ని సందర్శించడం ఆచారంగా వస్తుండగా, దాన్ని ఆయన వ్యతిరేక కోణంలో చిత్రించడం గమనార్హం.
US Senator Comments|నిధుల మళ్లింపుపై ఆరోపణలు..
కేవలం ఆలయంపైనే కాకుండా, అమెరికాలోని పెద్ద టెక్ కంపెనీలపైన కూడా సెనేటర్ తీవ్ర ఆరోపణలు చేశారు. ఈ కంపెనీలు తక్కువ వేతనానికి దొరికే విదేశీయులను చేర్చుకుంటూ, అమెరికా గ్రాడ్యుయేట్లను అప్పులపాలు చేస్తున్నాయని ఆయన మండిపడ్డారు. AI శిక్షణ కోసం అమెరికన్ల పన్ను సొమ్ము సబ్సిడీల రూపంలో భారత్కు మళ్లుతోందని ఆయన వాదించారు. అంతేకాకుండా, భారతీయ వీసా దరఖాస్తుదారులు ఇంటర్వ్యూ ప్రశ్నలను ఒకరికొకరు రహస్యంగా పంచుకుంటూ మోసాలకు పాల్పడుతున్నారని, ఇప్పుడు అమెరికాలో ప్రతిభ కంటే జాతి పక్షపాతానికే ప్రాధాన్యత ఇస్తున్నారని ఎటువంటి ఆధారాలు లేకుండా ఆరోపణలు సంధించారు.
US Senator Comments|వీసా గణాంకాలు ..
ప్రస్తుతం అమెరికా ఏటా జారీ చేసే మొత్తం హెచ్-1బీ వీసాల్లో సుమారు 70 నుంచి 80 శాతం వాటా భారతీయులదే ఉంటోంది. ఇది చైనా (12 శాతం) కంటే ఎంతో ఎక్కువ. అమెరికా ఆర్థిక వ్యవస్థలోని నైపుణ్యాల కొరతను భారతీయులు భర్తీ చేస్తున్నారని ఒక వర్గం వాదిస్తుండగా, అమెరికాలో ఎన్నికల సమయం దగ్గర పడుతుండటంతో ఎరిక్ ష్మిట్ వంటి నేతలు స్థానిక కార్మికుల ఓట్ల కోసం భారతీయులను, వారి సంస్కృతిని లక్ష్యంగా చేసుకుంటున్నారనే విమర్శలు వినిపిస్తున్నాయి. సెనేటర్ చేసిన ఈ పోస్టులు ప్రస్తుతం ఎక్స్లో (X) పెద్ద ఎత్తున చర్చలకు , ప్రతిచర్యలకు దారితీస్తున్నాయి.
ఇది కూడా చదవండి: UAE LPG Deal | ఎల్పీజీ సరఫరాపై యూఏఈతో భారత్ కీలక ఒప్పందం
