Gadala Srinivasa Rao | తెలంగాణ రాష్ట్ర పబ్లిక్ హెల్త్ అండ్ ఫ్యామిలీ వెల్ఫేర్ శాఖ మాజీ డైరెక్టర్ డాక్టర్ గడల శ్రీనివాసరావు జనసేన పార్టీలో చేరారు. హైదరాబాద్లోని జూబ్లీహిల్స్లో ఉన్న తన నివాసంలో బుధవారం జనసేన పార్టీ అధ్యక్షుడు, ఆంధ్రప్రదేశ్ ఉప ముఖ్యమంత్రి పవన్ కళ్యాణ్ ఆయనకు పార్టీ కండువా కప్పి పార్టీలోకి సాదరంగా ఆహ్వానించారు.
Gadala Srinivasa Rao | సేవలు ప్రశంసనీయం
ఈ సందర్భంగా జరిగిన సమావేశంలో పవన్ కళ్యాణ్ మాట్లాడుతూ.. డాక్టర్ గడల శ్రీనివాసరావు కుటుంబంతో తమ కుటుంబానికి ఎన్నో ఏళ్లుగా సన్నిహిత సంబంధాలు ఉన్నాయని తెలిపారు. ప్రజారోగ్య రంగంలో ఆయన అందించిన సేవలు ప్రశంసనీయమని కొనియాడారు. సమాజం పట్ల నిబద్ధతతో పనిచేసే వ్యక్తులు రాజకీయాల్లోకి రావడం ప్రజాస్వామ్యానికి మేలు చేస్తుందని పేర్కొన్నారు.
డాక్టర్ గడల శ్రీనివాసరావు వైద్యరంగంలో విశేష అనుభవం కలిగిన అధికారి. ప్రజారోగ్య సేవల మెరుగుదల కోసం ఆయన చేపట్టిన పలు కార్యక్రమాలు రాష్ట్రవ్యాప్తంగా గుర్తింపు పొందాయి. ముఖ్యంగా కరోనా మహమ్మారి సమయంలో ప్రజారోగ్య వ్యవస్థను బలోపేతం చేయడంలో ఆయన కీలక పాత్ర పోషించారు.
Gadala Srinivasa Rao | ప్రజాసేవకు రాజకీయ వేదికగా..
జనసేన పార్టీ సిద్ధాంతాలు, ప్రజా సమస్యల పరిష్కారానికి పార్టీ చేస్తున్న కృషి తనను ఆకర్షించాయని డాక్టర్ గడల శ్రీనివాసరావు ఈ సందర్భంగా పేర్కొన్నట్లు సమాచారం. ప్రజాసేవకు రాజకీయ వేదికగా జనసేనను ఎంచుకున్నానని ఆయన చెప్పారు.
డాక్టర్ గడల శ్రీనివాసరావు చేరికతో తెలంగాణలో జనసేన పార్టీకి మరింత బలం చేకూరుతుందని పార్టీ వర్గాలు భావిస్తున్నాయి. వైద్య, మేధావి వర్గాలకు చెందిన ప్రముఖులు పార్టీలో చేరడం ద్వారా ప్రజల్లో పార్టీ ప్రభావం మరింత పెరుగుతుందని నాయకులు ఆశాభావం వ్యక్తం చేశారు.
