అక్షరటుడే, వెబ్డెస్క్: Meenakshi Natarajan nomination | రాజకీయాల్లో శత్రువుల కంటే ‘సొంత మనుషుల’ వెన్నుపోట్లే ఎక్కువ ప్రమాదకరమని చెబుతుంటారు. ఇప్పుడు మధ్యప్రదేశ్, తెలంగాణ కాంగ్రెస్ వర్గాల్లో జరుగుతున్న పరిణామాలు చూస్తుంటే ఇది అక్షరాలా నిజమనిపిస్తోంది.
మధ్యప్రదేశ్ నుంచి కాంగ్రెస్ రాజ్యసభ అభ్యర్థిగా బరిలోకి దిగిన రాహుల్ గాంధీ అత్యంత ఆప్తురాలు, తెలంగాణ కాంగ్రెస్ వ్యవహారాల ఇన్ఛార్జ్ మీనాక్షి నటరాజన్ నామినేషన్ నాటకీయ పరిణామాల మధ్య తిరస్కరణకు గురికావడం జాతీయ రాజకీయాల్లో తీవ్ర దుమారం రేపుతోంది. ఆమె అఫిడవిట్లో తెలంగాణలోని ఒక కోర్టు కేసు వివరాలను దాచారంటూ బీజేపీ చేసిన ఫిర్యాదుతో రిటర్నింగ్ అధికారి ఈ నిర్ణయం తీసుకున్నారు.
అయితే, ఈ వ్యవహారంలో అసలు ట్విస్ట్ ఏంటంటే.. తెలంగాణలో ఉన్న కేసు వివరాలు ఎక్కడో మధ్యప్రదేశ్లో ఉన్న బీజేపీ నాయకులకు ఎలా తెలిశాయి? దీనికి మధ్యప్రదేశ్ బీజేపీ మంత్రి కైలాష్ విజయ్వర్గీయ పేల్చిన బాంబు ఇప్పుడు కాంగ్రెస్ పార్టీ పునాదులను కదిలిస్తోంది.
Meenakshi Natarajan nomination | మంత్రి కైలాష్ విజయ్వర్గీయ వ్యాఖ్యలు
మీనాక్షి నటరాజన్ నామినేషన్ తిరస్కరణ అనంతరం మంత్రి కైలాష్ విజయ్వర్గీయ మీడియాతో మాట్లాడుతూ అత్యంత కీలకమైన వ్యాఖ్యలు చేశారు.
“మీనాక్షి నటరాజన్పై తెలంగాణలో ఉన్న కేసు గురించి మాకు సమాచారం ఇచ్చింది స్వయంగా తెలంగాణ కాంగ్రెస్ నాయకులే. ఆ పార్టీలోని వాళ్లే మాకు ఈ రిపోర్టులు, వివరాలన్నీ అందించారు. ప్రస్తుతం తెలంగాణలో కాంగ్రెస్ పార్టీయే అధికారంలో ఉంది.. అంటే అక్కడ ఏం జరుగుతుందో మీరే అర్థం చేసుకోండి” అంటూ ఆయన చేసిన వ్యాఖ్యలు కాంగ్రెస్ పార్టీ అంతర్గత కుమ్ములాటలను నడిరోడ్డుపైకి తెచ్చాయి.
Meenakshi Natarajan nomination | సొంత పార్టీలోనే సమాచార లీకేజీ
ఈ మొత్తం ఉదంతాన్ని నిశితంగా పరిశీలిస్తే కొన్ని కీలకమైన రాజకీయ విమర్శలు, సందేహాలు వ్యక్తమవుతున్నాయి:
సొంత పార్టీ నేతలే కోవర్టులా?: 2025లో తెలంగాణలో కాంగ్రెస్ ప్రభుత్వ హయాంలోనే ఆ పార్టీకి చెందిన ఒక జాతీయ స్థాయి మహిళా నేత (మీనాక్షి నటరాజన్) పై కేసు నమోదైంది. అయితే విచిత్రమేమిటంటే, ఆ కేసు గురించిన సమాచారం ఆమెకు, అధిష్ఠానానికి చేరలేదు.. వారు దాన్ని సీరియస్గా కూడా తీసుకోలేదు.
కానీ, పొరుగు రాష్ట్రంలో ఉన్న ప్రత్యర్థి పార్టీ (బీజేపీ) నాయకులకు మాత్రం ఈ వివరాలు చేరాయి. అంటే, కాంగ్రెస్ పార్టీలోనే ఉంటూ ప్రత్యర్థి పార్టీలకు ‘కోవర్టులు’గా పనిచేస్తున్న నాయకులు ఉన్నారనేది స్పష్టమవుతోంది.
Meenakshi Natarajan nomination | కాంగ్రెస్లో అసంతృప్తి జ్వాలలు
మీనాక్షి నటరాజన్ తెలంగాణ ఏఐసీసీ ఇన్ఛార్జ్గా వ్యవహరిస్తున్నారు. ఆమె పనితీరుపై, రాష్ట్ర పార్టీపై ఆమె పెత్తనంపై తెలంగాణ కాంగ్రెస్లోని ఒక వర్గం తీవ్ర అసంతృప్తితో ఉందనే గుసగుసలు చాలా కాలంగా ఉన్నాయి.
ఆమెను రాజకీయంగా దెబ్బతీయడానికి సొంత పార్టీ నేతలే బీజేపీతో చేతులు కలిపి సమాచారాన్ని చేరవేశారనే విమర్శలకు ఈ లీకేజీ బలాన్ని చేకూరుస్తోంది.
కేవలం తెలంగాణ నేతలే కాదు, మధ్యప్రదేశ్లో కూడా మీనాక్షి నటరాజన్ అభ్యర్థిత్వంపై తీవ్ర వ్యతిరేకత వ్యక్తమైంది. సీనియర్ నేత దిగ్విజయ్ సింగ్ను పక్కనబెట్టి ఆమెకు సీటు ఇవ్వడంపై cross-voting భయాలు వ్యక్తమయ్యాయి.
ఈ క్రమంలో తెలంగాణ కాంగ్రెస్ అసంతృప్త నేతలు, మధ్యప్రదేశ్ అసంతృప్త నేతలు వ్యూహాత్మకంగా సమాచారాన్ని బీజేపీకి చేరవేసి ఆమె నామినేషన్ను స్కాష్ చేయించారనే కోణం స్పష్టంగా కనిపిస్తోంది.
Meenakshi Natarajan nomination | బీజేపీ వ్యూహాత్మక చదరంగం
కాంగ్రెస్లోని అంతర్గత విభేదాలను బీజేపీ చాలా చాకచక్యంగా వాడుకుంది. కాంగ్రెస్ నుంచి అందిన సమాచారంతో లీగల్ టీమ్ను రంగంలోకి దించి, పక్కా ఆధారాలతో అభ్యర్థిత్వాన్ని రద్దు చేయించడంలో సఫలమైంది. తద్వారా రాజ్యసభ ఎన్నికల బరిలో కాంగ్రెస్ను కోలుకోలేని దెబ్బతీసింది.
తెలంగాణలో తమ పార్టీయే అధికారంలో ఉండి కూడా, తమ సొంత జాతీయ నేత కేసు వివరాలను కాపాడుకోలేకపోవడం, పైగా ఆ సమాచారాన్ని సొంత పార్టీ నేతలే శత్రు పక్షానికి లీక్ చేయడం కాంగ్రెస్ లోని క్రమశిక్షణా రాహిత్యానికి అద్దం పడుతోంది.
ఈ ‘కోవర్టు’ రాజకీయాలు, అంతర్గత కుమ్ములాటలను కాంగ్రెస్ అధిష్ఠానం సకాలంలో అణచివేయకపోతే, రాబోయే రోజుల్లో మరిన్ని ఘోర పరాజయాలను చవిచూడాల్సి వస్తుందనడంలో ఎలాంటి సందేహం లేదు.
మీనాక్షి నటరాజన్ నామినేషన్ తిరస్కరణ కాంగ్రెస్ పార్టీకి కేవలం ఒక స్థానాన్ని కోల్పోవడం మాత్రమే కాదు.. పార్టీ వ్యవస్థాగత బలహీనతను దేశం ముందు ఉంచిన అతి పెద్ద అవమానం.
