అక్షరటుడే వెబ్‌డెస్క్: AP Postal Ballot Rules | ఆంధ్రప్రదేశ్ రాష్ట్రంలోని మున్సిపల్ కార్పొరేషన్లు, మున్సిపాలిటీలు , నగర పంచాయతీల ఎన్నికలకు సంబంధించి రాష్ట్ర ఎన్నికల సంఘం (SEC) కీలక ఆదేశాలు జారీ చేసింది. ఎన్నికల ప్రక్రియలో కీలకమైన ‘పోస్టల్ బ్యాలెట్’ పత్రాల రూపకల్పన, ముద్రణ, అభ్యర్థుల పేర్ల కూర్పుపై స్పష్టమైన విధివిధానాలను వెల్లడించింది.
AP Postal Ballot Rules | అభ్యర్థుల వర్గీకరణ ..
పోస్టల్ బ్యాలెట్ పత్రాలపై పోటీలో ఉండే అభ్యర్థుల పేర్లను నిబంధనల ప్రకారం 3 విభాగాలుగా వర్గీకరించి ముద్రించాలని అధికారులను ఆదేశించారు. సాధారణ బ్యాలెట్ పేపర్లలో ఉండే వరుస క్రమాన్నే ఇక్కడ కూడా అనుసరించాల్సి ఉంటుంది:
కేటగిరీ-1: గుర్తింపు పొందిన జాతీయ, రాష్ట్ర స్థాయి రాజకీయ పార్టీల అభ్యర్థులు.
కేటగిరీ-2: ఇతర రాష్ట్రాల్లో గుర్తింపు పొంది, ఇక్కడ నమోదైన పార్టీల అభ్యర్థులు.
కేటగిరీ-3: స్వతంత్ర (ఇండిపెండెంట్) అభ్యర్థులు.
AP Postal Ballot Rules | అభ్యర్థుల వివరాలు..
పోస్టల్ బ్యాలెట్ పత్రంలో సమాచారం సులభంగా అర్థమయ్యేలా ద్విభాషా (తెలుగు, ఇంగ్లీష్) విధానాన్ని అమలు చేయాలని సూచించారు. బ్యాలెట్ పేపర్‌పై అభ్యర్థి పేరు, వారు ప్రాతినిధ్యం వహిస్తున్న పార్టీ పేరును మొదట తెలుగులో, ఆ కింద ఇంగ్లీష్‌లో తప్పనిసరిగా ముద్రించాలి.
AP Postal Ballot Rules | గుర్తుల ముద్రణ నిషేధం..
పోస్టల్ బ్యాలెట్‌లకు సంబంధించి ఎస్ఈసీ ఒక ముఖ్యమైన స్పష్టత ఇచ్చింది. సాధారణ పోలింగ్ కేంద్రాల్లో ఉపయోగించే బ్యాలెట్ పేపర్ల మాదిరిగా పోస్టల్ బ్యాలెట్లపై ఎలాంటి ఎన్నికల గుర్తులు (Symbols) ముద్రించకూడదు. కేవలం అభ్యర్థి పేరు, పార్టీ పేరు మాత్రమే పొందుపరచాలి.
AP Postal Ballot Rules | ఎస్ఈసీ ఆదేశాలు..
రాష్ట్రంలోని అన్ని జిల్లాల కలెక్టర్లు, జిల్లా ఎన్నికల అధికారులు, మున్సిపల్ కమిషనర్లు, రిటర్నింగ్ అధికారులు ఈ మార్గదర్శకాలను ఖచ్చితంగా పాటించాలని ఎస్ఈసీ స్పష్టం చేసింది. ఎన్నికల విధుల్లో ఉండే ఉద్యోగులు, అత్యవసర సేవల సిబ్బంది తమ ఓటు హక్కును పారదర్శకంగా వినియోగించుకునేందుకే ఈ నియమ నిబంధనలను రూపొందించినట్లు తెలిపింది.
ఇది కూడా చదవండి: Prajavani Rajanna Sircilla | ప్రజావాణితో సమస్యల పరిష్కారం..: కలెక్టర్ గరిమ అగ్రవాల్
