అక్షరటుడే, నిజామాబాద్సిటీ: Cricket Selections Nizamabad | నిజామాబాద్ జిల్లా క్రికెట్ అసోసియేషన్(Nizamabad District Cricket Association) ఆధ్వర్యంలో స్థానిక గిరిరాజ్ ప్రభుత్వ కళాశాల(Giriraj Government College) మైదానంలో అండర్-16, అండర్-19 బాలబాలికల క్రికెట్ ఎంపికలు శుక్రవారం నిర్వహించారు. ఈ ఎంపికలకు జిల్లా నలుమూలల నుంచి దాదాపు 300 మందికి పైగా క్రీడాకారులు హాజరయ్యారు.
Cricket Selections Nizamabad | ఉచిత శిక్షణ..
జిల్లా క్రికెట్ అసోసియేషన్ కార్యదర్శి వెంకట్రెడ్డి మాట్లాడుతూ.. హైదరాబాద్(Hyderabad) క్రికెట్ అసోసియేషన్ సూచనల మేరకు ఈ ఎంపికలు నిర్వహించామన్నారు. అండర్-16 కేటగిరీలో 30 మందిని, అలాగే అండర్-19 కేటగిరీలో 30 మంది ప్రతిభావంతులైన క్రీడాకారులను ఎంపిక చేసినట్లు తెలిపారు. ఎంపికైన 60 మంది క్రీడాకారులకు నిజామాబాద్ జిల్లా క్రికెట్ అసోసియేషన్ ఆధ్వర్యంలో మూడు నెలల పాటు పూర్తిగా ఉచితంగా ప్రత్యేక శిక్షణ ఇవ్వనున్నట్లు వివరించారు.
శిక్షణా కాలం పూర్తయిన తర్వాత, వారి ప్రదర్శన ఆధారంగా అత్యుత్తమ ప్రతిభ కనబరిచిన 15 మంది చొప్పున అండర్-16, అండర్-19 విభాగాల్లో రెండు తుది జట్లను ఎంపిక చేస్తామని తెలియజేశారు. ఈ జట్లను జిల్లా, రాష్ట్ర స్థాయి (స్టేట్ లెవెల్) క్రికెట్ టోర్నమెంట్లలో ఆడేందుకు పంపిస్తామని తెలిపారు. క్రీడాకారులు ఈ సువర్ణ అవకాశాన్ని సద్వినియోగం చేసుకోవాలన్నారు. ఈ ఎంపిక కార్యక్రమంలో జిల్లా క్రికెట్ అసోసియేషన్ ట్రెజరర్ శ్రీనివాసరావు, జాయింట్ సెక్రెటరీ సురేష్ బాబు, ప్రతినిధులు నయీమ్, లలిత్, విక్రమ్, వినోద్ తదితరులు పాల్గొన్నారు.
ఇది కూడా చదవండి: Akunuri Murali Resignation | విద్యా కమిషన్ ఛైర్మన్ పదవికి ఆకునూరి మురళి రాజీనామా
