అక్షరటుడే, కామారెడ్డి: Abandoned Newborn Baby | ఇంకా కళ్లు కూడా సరిగా తెరవలేదు. ఈ లోకంలోకి వచ్చి కొన్ని గంటలు కూడా కాలేదు. అమ్మ గుండెలపై పడుకోవాల్సిన ఆ పసిప్రాణం, అమ్మ పాలకోసం ఏడవాల్సిన ఆ చిన్నారి ముళ్లపొదల్లో(Newborn Baby) అనాథగా పడి ఉంది. ఆ ముళ్లు ఆ పసి శరీరాన్ని గుచ్చుతుంటే.. చలికి వణుకుతూ, ఆకలితో అలమటిస్తూ ఆ బిడ్డ ఏడుపు ఆ గ్రామాన్నే కదిలించింది.
Abandoned Newborn Baby | ఎల్పుగొండలో..
పాల్వంచ మండలం ఎల్పుగొండ గ్రామ శివారులో గురువారం ఇలాంటి గుండెను కలచివేసే దృశ్యం కనిపించింది. అప్పుడే పుట్టిన పసికందును ఎవరో కనికరం లేకుండా చెట్ల పొదల్లో వదిలేసి వెళ్లిపోయారు. ఆ బిడ్డను చూస్తే ఎవరికైనా కన్నీళ్లు ఆగవు. కన్నవాళ్లు ఎలా వదిలి వెళ్లారో అని గ్రామస్తులు ఒకరినొకరు ప్రశ్నించుకున్నారు. ఆ పసికందు ఏడుపు విన్న వెంటనే గ్రామస్తులు మానవత్వం చాటారు. అది ఏదో పక్షి అరుపో, జంతువు శబ్దమో అని పట్టించుకోకుండా వెళ్లిపోలేదు. ఏడుపు వస్తున్న వైపు పరుగు తీశారు. ముళ్లపొదల్లో ఉన్న బిడ్డను చూడగానే వారి గుండె తరుక్కుపోయింది. ఒక్క క్షణం ఆలస్యం చేసినా ఆ పసిప్రాణం ఏమయ్యేదో అని భయపడ్డారు. ఆ బిడ్డను చాలా జాగ్రత్తగా, ప్రేమగా ఎత్తుకున్నారు. తమ చీర కొంగుతో, తమ దుప్పటితో ఆ చిన్నారిని వెచ్చగా చుట్టారు. వెంటనే దోమకొండ పోలీసులకు సమాచారం ఇచ్చారు.
Abandoned Newborn Baby | కామారెడ్డి జీజీహెచ్కు
సమాచారం అందిన వెంటనే పరుగున వచ్చిన దోమకొండ పోలీసులు(Domakonda Police) ఆ పసికందును సురక్షితంగా రక్షించి దోమకొండ పీహెచ్‌సీకి తరలించారు. అక్కడ ప్రాథమిక చికిత్స అందించిన తర్వాత మెరుగైన వైద్యం కోసం కామారెడ్డి జీజీహెచ్కు తీసుకెళ్లారు. ప్రస్తుతం ఆ చిన్నారి ఆరోగ్యం నిలకడగా ఉందని వైద్యులు చెప్పడంతో అందరూ ఊపిరి పీల్చుకున్నారు. ఆ తర్వాత శిశువును ఐసీడీఎస్ అధికారులకు పోలీసులు అప్పగించారు. ఈ ఘటనపై కేసు నమోదు చేసుకున్న దోమకొండ పోలీసులు శిశువు తల్లిదండ్రుల ఆచూకీ కోసం దర్యాప్తు చేస్తున్నారు.
ఇది కూడా చదవండి: ఎమ్మెల్యే వేముల వీరేశంకు తప్పిన ప్రమాదం
