అక్షరటుడే వెబ్‌డెస్క్: Abhijit Dipke Bail | దేశ రాజధాని ఢిల్లీలో ( Delhi ) కేంద్ర ఎన్నికల సంఘం (ECI) తీరును నిరసిస్తూ నిర్వహించిన ఆందోళనల్లో కీలక పాత్ర పోషించిన ‘కాక్రోచ్ జనతా పార్టీ’ (CJP) వ్యవస్థాపకుడు అభిజిత్ దిప్కేకు ఉపశమనం లభించింది. ఢిల్లీలోని మందిర్ మార్గ్ స్పెషల్ ఎగ్జిక్యూటివ్ మెజిస్ట్రేట్ (SEM) కోర్టు ఆయనకు షరతులతో కూడిన బెయిల్ మంజూరు చేయడంతో ఆయన జైలు నుంచి విడుదలయ్యారు.
Abhijit Dipke Bail | అసలేం జరిగింది?
ఇటీవలే కన్నాట్ ప్లేస్ ప్రాంతంలో ఈసీఐ వైఖరికి వ్యతిరేకంగా ‘లహెరా దో తిరంగా’ పేరుతో నిర్వహించిన నిరసన కార్యక్రమ సమయంలో శాంతిభద్రతల పరిరక్షణ సాకుతో ఢిల్లీ పోలీసులు దిప్కేను ముందస్తుగా అదుపులోకి తీసుకున్నారు. విచారణ అనంతరం కోర్టు విధించిన కఠిన నిబంధనలకు లోబడి, వ్యక్తిగత పూచీకత్తు సమర్పించడంతో పోలీసులు ఆయనను శనివారం విడుదల చేశారు.
Abhijit Dipke Bail | ప్రత్యేక బాండ్ వివాదం..
విడుదల ప్రక్రియలో భాగంగా ఆయనతో పోలీసులు ఒక ప్రత్యేక ‘శాంతి బాండ్’ (Peace Bond) పై సంతకం చేయించడం రాజకీయ , న్యాయ వర్గాల్లో చర్చనీయాంశంగా మారింది. భవిష్యత్తులో శాంతిభద్రతలకు ఎలాంటి విఘాతం కలిగించనని, విచారణాధికారులకు పూర్తిస్థాయిలో సహకరిస్తానని హామీ ఇస్తూ ఈ అదనపు బాండ్‌ను నమోదు చేసినట్లు తెలుస్తోంది.
Abhijit Dipke Bail | రాజకీయ రగడ..
రాజ్యాంగం ప్రసాదించిన శాంతియుత నిరసన తెలిపే హక్కును కాలరాసేందుకే ప్రభుత్వం ఇలా వరుస కేసులు, బాండ్ల పేరుతో తమను వేధిస్తోందని సీజేపీ వర్గాలు తీవ్రస్థాయిలో ధ్వజమెత్తాయి. అయితే, నగరంలో శాంతిభద్రతలను పరిరక్షించేందుకే చట్టప్రకారం ఈ ముందస్తు భద్రతా చర్యలు తీసుకున్నామని పోలీసు యంత్రాంగం స్పష్టం చేసింది.
ఇది కూడా చదవండి: DMK Congress Rift | డీఎంకే, కాంగ్రెస్ మధ్య పెరుగుతున్న దూరం.. సీజేపీకి స్టాలిన్ మద్దతు
