అక్షరటుడే, వెబ్డెస్క్: Air Ambulance Missing | వైద్య సేవల కోసం ప్రయాణిస్తున్న ఎయిర్ అంబులెన్స్ విమానం అమెరికా తీర ప్రాంతంలో అదృశ్యమైంది. కెనడాలోని ఒంటారియోకు చెందిన మెడికల్ ట్రాన్స్‌పోర్ట్ సంస్థ నిర్వహిస్తున్న లాటిట్యూడ్ ఎయిర్ అంబులెన్స్‌కు చెందిన గల్ఫ్‌స్ట్రీమ్ జీ100 విమానం నాంటుకెట్ సమీపంలో ప్రయాణిస్తుండగా సంబంధాలు తెగిపోయినట్లు అధికారులు వెల్లడించారు.
విమానంలో మొత్తం ఆరుగురు ఉన్నట్లు సంస్థ ప్రతినిధి క్లారెన్స్ టోగెరెట్జ్ తెలిపారు. వీరిలో ఇద్దరు పైలట్లు, ఇద్దరు వైద్య సిబ్బంది, ఒక రోగి, అతనితో పాటు ప్రయాణిస్తున్న కుటుంబ సభ్యుడు ఉన్నారు. ప్రయాణికుల్లో నలుగురు కెనడా పౌరులు ఉన్నట్లు సమాచారం.
Air Ambulance Missing | బెర్ముడా నుంచి బోస్టన్‌కు..
రోగిని బోస్టన్‌లోని ఆసుపత్రికి తరలించేందుకు విమానం బెర్ముడాలోని ఎల్‌ఎఫ్ వేడ్ అంతర్జాతీయ విమానాశ్రయం నుంచి బోస్టన్‌లోని లోగాన్ అంతర్జాతీయ విమానాశ్రయానికి బయలుదేరింది. సాధారణంగా ఈ ప్రయాణానికి సుమారు రెండు గంటల సమయం పట్టే అవకాశం ఉంది.
అయితే మార్గమధ్యంలో విమానంతో సంబంధాలు తెగిపోయాయి. ఫ్లైట్ ట్రాకింగ్ సమాచారాన్ని పరిశీలించిన అధికారులు విమానం రాడార్ పరిధి నుంచి అదృశ్యమైనట్లు గుర్తించారు.
Oct 04 Horoscope | కలిసొచ్చే రవివారం.. ఇక ఈ రాశుల వారికి నేడు కాసుల వర్షమే!
Air Ambulance Missing | రంగంలోకి దిగిన కోస్ట్‌గార్డ్
విమానంతో సంబంధాలు కోల్పోయిన విషయం వెలుగులోకి వచ్చిన వెంటనే అమెరికా అధికారులు గాలింపు, సహాయక చర్యలను ప్రారంభించారు. అమెరికా కోస్ట్‌గార్డ్ ఆధ్వర్యంలో విమానం కోసం గాలింపు కొనసాగుతోంది. విమానం చివరిగా గుర్తించిన ప్రాంతం చుట్టుపక్కల సముద్ర జలాల్లో ప్రత్యేక బృందాలు అన్వేషణ చేపట్టినట్లు సమాచారం.
ఈ ఘటనపై బెర్ముడా ప్రీమియర్ డేవిడ్ బర్ట్ తీవ్ర ఆందోళన వ్యక్తం చేశారు. విమానంలో ఉన్న వారి కుటుంబ సభ్యులతో అధికారులు సంప్రదింపులు జరుపుతున్నారని తెలిపారు.
విమాన ఆచూకీ, ప్రమాదానికి గల కారణాలు, అందులో ఉన్న ఆరుగురి పరిస్థితిపై అధికారికంగా మరింత సమాచారం వెలువడాల్సి ఉంది. గాలింపు చర్యలు కొనసాగుతున్న నేపథ్యంలో వారి కుటుంబ సభ్యుల్లో తీవ్ర ఆందోళన నెలకొంది.
