అక్షరటుడే, ఇందూరు: Bonded Labour Rescue | ఇటుక బట్టీల్లో కొన్ని నెలలుగా నిర్బంధంగా వెట్టిచాకిరి చేస్తున్న కార్మికులకు జిల్లా న్యాయమూర్తి భరతలక్ష్మి (Judge Bharatalakshmi) విముక్తి కల్పించారు. ఈ మేరకు మంగళవారం ఆర్మూర్ నియోజకవర్గంలోని దేగాంలో ఉన్న బట్టీలను ఆకస్మికంగా తనిఖీ చేశారు. అక్కడ వందల సంఖ్యలో ఉన్న వివిధ రాష్ట్రాల నుంచి తీసుకొచ్చిన కూలీలతో మాట్లాడారు. నిర్బంధంగా పనిచేస్తున్నట్లుగా గుర్తించిన ఆమె జిల్లా న్యాయసేవాధికార సంస్థ ఆధ్వర్యంలో వారిని సొంతూళ్లకు వెళ్లేందుకు ఏర్పాట్లు చేస్తామన్నారు.
Bonded Labour Rescue | రేకుల షెడ్లలో.. కనీస సౌకర్యాల్లేకుండా..
జిల్లా న్యాయమూర్తి భరత లక్ష్మి మాట్లాడుతూ దేగాం పరిసర ప్రాంతాల్లో ఉన్న ఇటుక బట్టీలను సందర్శించగా ఇక్కడ ఘోరమైన పరిస్థితులు కనిపించాయన్నారు. కొన్ని నెలలుగా కార్మికులను బట్టీల్లోని రేకుల షెడ్లో ఎలాంటి సౌకర్యాలు లేకుండా చిన్నపిల్లలతో సహా ఉంచుతున్నారన్నారు. వారి దయనీయ పరిస్థితి చూస్తే ఎవరికైనా జాలి కలుగుతుందన్నారు.
Bonded Labour Rescue | సరైన పనివేళలు లేకుండా..
బట్టీల్లో పనిచేస్తున్న నిర్బంధ కార్మికులకు సరైన పనివేళలు ఇవ్వకుండా రాత్రింబవళ్లు వారితో పనిచేయించుకుంటున్నట్లుగా తెలుస్తోందన్నారు. ఇటుక బట్టిలో 20మంది కార్మికులు పనిచేస్తున్నట్లుగా లైసెన్స్ తీసుకుని వందల సంఖ్యలో పనివాళ్లతో నిర్బంధంగా పనిచేయిస్తున్నట్లు గుర్తించామన్నారు. ఇక్కడ నిర్బంధంగా పనిచేస్తున్న కార్మికుల పరిస్థితి అత్యంత దయనీయంగా ఉందని ఆమె విచారం వ్యక్తం చేశారు. ఇటుక బట్టీ నిర్వాహకులపై చట్టపరంగా చర్యలు తీసుకుంటామన్నారు. ఇన్నిరోజులుగా వారి పనిచేసిన దానికి డబ్బులు ఇప్పిస్తామన్నారు.
ఇది కూడా చదవండి..: Double Bedroom Houses | ఇళ్ల పట్టాల పంపిణీలో జాప్యంపై లబ్ధిదారుల నిరసన
