అక్షరటుడే వెబ్డెస్క్: Darbhanga Airport | బిహార్లోని దర్భంగా విమానాశ్రయంలో భయంకరమైన దృశ్యం చోటుచేసుకుంది. ముంబయి నుంచి వచ్చిన స్పైస్జెట్ విమానం రన్వేపై ల్యాండ్ అవుతున్న సమయంలో ఒక్కసారిగా టైరు పేలిపోయింది. పైలట్ అత్యంత చాకచక్యంగా వ్యవహరించడంతో విమానం సురక్షితంగా నిలిచిపోయింది. దీంతో విమానంలో ప్రయాణిస్తున్న 150 మంది ప్రయాణికులు, సిబ్బంది ప్రాణాపాయం నుంచి తృటిలో బయటపడ్డారు.
Darbhanga Airport | విమానంలో పెద్ద శబ్దం..
సోమవారం ఉదయం సుమారు 10 గంటల సమయంలో విమానం రన్వేపై దిగుతుండగా ఈ ఘటన జరిగింది. టైరు పేలిపోవడంతో చక్రం నేలపై గట్టిగా రాసుకుంటూ విమానం తీవ్రంగా కుదుపులకు లోనైంది. ఒక్కసారిగా విమానంలో పెద్ద శబ్దం రావడంతో ప్రయాణికులు తీవ్ర ఆందోళన చెందారు. సమాచారం అందిన వెంటనే అప్రమత్తమైన ఎయిర్పోర్ట్ భద్రతా సిబ్బంది , గ్రౌండ్ స్టాఫ్, వెంటనే రంగంలోకి దిగి ప్రయాణికులందరినీ క్షేమంగా కిందకు దించేశారు.
Darbhanga Airport | స్తంభించిన విమాన సేవలు..
ఈ ఘటన కారణంగా దర్భంగా ఎయిర్పోర్టులో కార్యకలాపాలు గంటల తరబడి స్తంభించాయి. దెబ్బతిన్న స్పైస్జెట్ విమానం సాయంత్రం 6:30 గంటల వరకు పార్కింగ్ స్థలం (ఏప్రాన్)లోనే ఉండిపోవడంతో, అక్కడ స్థల కొరత ఏర్పడింది. ఫలితంగా ఢిల్లీ నుంచి రావాల్సిన ఇండిగో విమానాన్ని అధికారులు పాట్నాకు దారి మళ్లించారు.
Darbhanga Airport | ఆకాశ ఎయిర్లో సాంకేతిక సమస్య..
దురదృష్టవశాత్తూ, అదే సమయంలో ముంబయి నుంచి వచ్చిన ‘ఆకాశ ఎయిర్’ విమానంలో కూడా సాంకేతిక లోపం తలెత్తింది. దీంతో రెండు విమానాలు ఏప్రాన్ను ఆక్రమించడంతో విమానాశ్రయ కార్యకలాపాలు మరింత మందగించాయి. ప్రస్తుతం సాంకేతిక నిపుణులు రెండు విమానాలను క్షుణ్ణంగా పరిశీలిస్తున్నారు. పూర్తి ఫిట్నెస్ సర్టిఫికేట్ పొందిన తర్వాతే వీటిని తిరిగి సర్వీసుల్లోకి అనుమతించనున్నారు. ఈ పరిణామాల నేపథ్యంలో, మంగళవారం కూడా విమాన సర్వీసుల్లో మార్పులు ఉండే అవకాశం ఉన్నందున, ప్రయాణికులు తమ విమాన సమయాలను ముందుగానే సరిచూసుకోవాలని అధికారులు విజ్ఞప్తి చేశారు.
SpiceJet Flight Suffers Tyre Burst During Landing at Darbhanga Airport; All Passengers Safe
SpiceJet flight from Mumbai suffered a tyre burst during landing at Darbhanga Airport, but all passengers were safely evacuated with no injuries reported.#Bihar #BiharNews #SpiceJet…
— Patna Press (@patna_press) June 29, 2026
ఇది కూడా చదవండి: Assam Floods | అస్సాంలో వర్ష బీభత్సం.. భారీ నష్టం
