అక్షరటుడే, వెబ్డెస్క్: July 11 Gold Prices | దేశీయ బులియన్ మార్కెట్లో బంగారం, వెండి ధరలు ఒత్తిడికి లోనయ్యాయి. మధ్యప్రాచ్యంలో ఉద్రిక్త పరిస్థితులు కొనసాగుతున్నప్పటికీ అమెరికా–ఇరాన్ శాంతి చర్చలు కొనసాగించేందుకు అంగీకరించడం, అలాగే అమెరికా ఫెడరల్ రిజర్వ్ వడ్డీ రేట్లపై అనిశ్చితి కొనసాగుతున్న నేపథ్యంలో విలువైన లోహాల ధరల్లో హెచ్చుతగ్గులు కనిపించాయి.
July 11 Gold Prices | స్వల్ప నష్టాలతో ట్రేడ్..
మల్టీ కమోడిటీ ఎక్స్చేంజ్ (MCX)లో బంగారం ధర రూ.1,050 వరకు తగ్గగా, వెండి ధర ఏకంగా రూ.3,400 మేర క్షీణించింది. ట్రేడింగ్ సమయంలో ఎంసీఎక్స్ బంగారం 10 గ్రాములకు సుమారు రూ.1,44,600 వద్ద, వెండి కిలోకు రూ.2.26 లక్షల పరిధిలో ట్రేడైంది.
హైదరాబాద్ బులియన్ మార్కెట్లో 24 క్యారెట్ల (99.9 శాతం స్వచ్ఛత) బంగారం గ్రాము ధర రూ.14,483గా నమోదైంది. 22 క్యారెట్ల బంగారం గ్రాము రూ.13,276కు, 18 క్యారెట్ల బంగారం గ్రాము రూ.10,863కు విక్రయమవుతోంది.
అంతర్జాతీయ మార్కెట్లో స్పాట్ గోల్డ్ ఔన్సుకు 4,118 డాలర్ల సమీపంలో స్వల్ప నష్టాలతో ట్రేడవుతుండగా, స్పాట్ సిల్వర్ మాత్రం దాదాపు ఒక శాతం లాభపడి ఔన్సుకు 60 డాలర్లకు పైగా కొనసాగుతోంది.
Rangareddy Murders | ఘోరం.. కక్షతో ఆరుగురి దారుణ హత్య.. బాధితులు పొక్సో కేసు కుటుంబం!
July 11 Gold Prices | వడ్డీ రేట్లు పెరుగుతాయని అంచనాలు..
మరోవైపు, అమెరికా–ఇరాన్ మధ్య తాజా క్షిపణి దాడుల అనంతరం కూడా శాంతి చర్చలు కొనసాగనున్నాయన్న సంకేతాలు మార్కెట్లకు కొంత ఊరటనిచ్చాయి.
అయితే హోర్ముజ్ జలసంధిలో ఉద్రిక్తతలు, ఇంధన సరఫరాపై ఆందోళనలు, ద్రవ్యోల్బణ భయాలు ఇంకా పూర్తిగా తగ్గకపోవడంతో పెట్టుబడిదారులు అప్రమత్తంగా వ్యవహరిస్తున్నారు.
అమెరికా ఫెడరల్ రిజర్వ్ ఈ ఏడాది కనీసం మరోసారి వడ్డీ రేట్లను పెంచే అవకాశాలు ఉన్నాయన్న అంచనాలు కూడా బంగారం ధరలపై ఒత్తిడిని పెంచుతున్నాయి.
ఇదే సమయంలో అమెరికా ఆర్థిక వ్యవస్థలో కృత్రిమ మేధ (AI) ఆధారిత డిమాండ్ కూడా ద్రవ్యోల్బణంపై ప్రభావం చూపుతోందని న్యూయార్క్ ఫెడ్ అధ్యక్షుడు జాన్ విలియమ్స్ పేర్కొనడం మార్కెట్ దృష్టిని ఆకర్షించింది.
ఇక ముడి చమురు ధరలు మాత్రం ఎగువ స్థాయిల్లోనే కొనసాగుతున్నాయి. అమెరికా డబ్ల్యూటీఐ క్రూడ్ బ్యారెల్కు 72 డాలర్లకు పైగా, బ్రెంట్ క్రూడ్ 77 డాలర్ల సమీపంలో ట్రేడవుతోంది. ఇదిలా ఉండగా అమెరికా డాలర్ సూచీ స్వల్పంగా బలహీనపడి 100.75 స్థాయి వద్ద కొనసాగుతోంది.
July 11 Gold Prices | మార్కెట్ వర్గాల అభిప్రాయం..
అంతర్జాతీయ పరిణామాలు, అమెరికా ఫెడ్ వడ్డీ రేట్ల నిర్ణయాలు, డాలర్ కదలికలు, ముడి చమురు ధరల మార్పులు తదుపరి రోజుల్లో బంగారం, వెండి ధరల దిశను నిర్ణయించే కీలక అంశాలుగా ఉండనున్నాయని విశ్లేషకులు పేర్కొంటున్నారు.
