అక్షరటుడే, వెబ్డెస్క్: India Stock Market | దేశీయ స్టాక్ మార్కెట్ సుమారు రెండేళ్లుగా తీవ్ర ఒడిదుడుకులను ఎదుర్కొంటోంది. అమెరికా అధ్యక్షుడిగా ట్రంప్ రెండోసారి ఎన్నికయ్యాక విధించిన రెసిప్రోకల్ టారిఫ్స్తో ప్రారంభమైన పతనం కొనసాగుతూనే ఉంది. పశ్చిమాసియాలో సంక్షోభంతో తీవ్రత మరింత పెరిగింది.
క్రూడ్ ఆయిల్ (Crude Oil) ధరలకు రెక్కలు రావడం, విదేశీయ సంస్థాగత ఇన్వెస్టర్లు పెట్టుబడులు ఉపసంహరిస్తుండడం, రూపాయి విలువ భారీగా పతనమవడం వంటి కారణాలతో ఇన్వెస్టర్లు అమ్మకాలకు పాల్పడుతుండడంతో స్టాక్ మార్కెట్ కోలుకోలేకపోతోంది. అంతర్జాతీయ మార్కెట్ క్యాపిటలైజేషన్ (మార్కెట్ విలువ) పరంగా ఇటీవల తైవాన్ మనల్ని ఆరో స్థానానికి నెట్టేయగా.. తాజాగా సౌత్ కొరియా స్టాక్ మార్కెట్ కోస్పీ ఏడో స్థానానికి పడేసింది.
India Stock Market | ఆసియా దేశాల హవా..
ఆసియా స్టాక్ మార్కెట్లు (Asian Stock Markets) జోరు మీదున్నాయి. మార్కెట్ క్యాపిటలైజేషన్ పరంగా టాప్ 7 దేశాల్లో ఆరు ఆసియాకు చెందినవే కావడం గమనార్హం. అమెరికా అగ్ర స్థానంలో కొనసాగుతుండగా.. చైనా, జపాన్, హాంగ్కాంగ్, తైవాన్లు తర్వాతి నాలుగు స్థానాల్లో ఉన్నాయి. తాజాగా సౌత్ కొరియా స్టాక్ మార్కెట్ ఆరో స్థానాన్ని ఆక్రమించింది. మన స్టాక్ మార్కెట్ ఏడో స్థానంలో ఉంది.
India Stock Market | ఏఐలో వెనకబాటుతో..
ఆర్టిఫిషియల్ ఇంటెలిజెన్స్ (Artificial Intelligence), సెమీకండక్టర్ల రంగాల్లో భారత్ వెనకబడింది. ఈ రంగాలలో పురోగతి సాధించిన దేశాల స్టాక్స్ పరుగులు తీస్తున్నాయి. గ్లోబల్ ఇన్వెస్టర్లంతా ఆర్టిఫిషియల్ ఇంటెలిజెన్స్ ఆధారిత టెక్నాలజీ షేర్ల వైపు పరుగులు తీస్తుండడంతో సౌత్ కొరియా స్టాక్ మార్కెట్ విలువ 5.04 ట్రిలియన్ డాలర్లకు చేరింది. ఇదే సమయంలో భారత మార్కెట్ విలువ 4.84 ట్రిలియన్ డాలర్లకు క్షీణించింది. ప్రపంచవ్యాప్తంగా నడుస్తున్న సెమీ కండక్టర్, హార్డ్వేర్ ఏఐ బూమ్ను క్యాష్ చేసుకోవడంలో మన కంపెనీలు వెనకబడడమే ఇందుకు కారణం.
India Stock Market | ఆ రెండు కంపెనీల వల్లే..
సౌత్ కొరియా మార్కెట్ పెరగడానికి ప్రధాన కారణం సెమీకండక్టర్ దిగ్గజాలు శామ్సంగ్ ఎలక్ట్రానిక్స్, ఎస్కే హైనిక్స్. ఇవి రెండూ ఇప్పుడు ట్రిలియన్ డాలర్ల క్లబ్లోకి చేరాయి. తైవాన్ మార్కెట్ ను టీఎసఎంసీ కంపెనీ నడిపిస్తుండగా.. కోస్పీని శామ్సంగ్ ఎలక్ట్రానిక్స్, ఎస్కే హైనిక్స్ పరుగులు పెట్టిస్తున్నాయి. దక్షిణ కొరియా బెంచ్మార్క్ ఇండెక్స్ కోస్పి 2026 సంవత్సరంలో ఇప్పటివరకు 110 శాతానికిపైగా పెరగ్గా.. తైవాన్ 65 శాతానికి పైగా లాభపడింది. ఇదే సమయంలో భారత బెంచ్ మార్క్ సూచీలు 11 శాతానికిపైగా నష్టపోయాయి.
ఇది కూడా చదవండి..: Stock Market Losses | నష్టాల్లో దేశీయ స్టాక్ మార్కెట్లు
