అక్షరటుడే వెబ్డెస్క్: Tamil Nadu Politics | తమిళనాడు రాజకీయాల్లో సరికొత్త వేడి రాజుకుంది. రాష్ట్రంలో ప్రస్తుత టీవీకే (TVK) ప్రభుత్వం కనీసం మూడు నెలలైనా కొనసాగుతుందా లేదా అని ప్రజలే చర్చించుకుంటున్నారని డీఎంకే అధినేత ఎంకే స్టాలిన్ సంచలన వ్యాఖ్యలు చేశారు. కొత్తగా ఏర్పడిన ప్రభుత్వం కాబట్టి కనీసం ఆరు నెలల వరకు ఎలాంటి విమర్శలు చేయకూడదని తాము భావించామని, కానీ రాష్ట్రంలో ప్రస్తుత పరిస్థితులు చాలా దారుణంగా మారాయని ఆయన మండిపడ్డారు. తాము అనుకున్న గడువు కంటే ముందే ఇక్కడ రాజకీయ పరిణామాలు వేగంగా మారేలా కనిపిస్తున్నాయని అభిప్రాయపడ్డారు.
Tamil Nadu Politics | మేము కష్టపడ్డాం..
ఎన్నికల వ్యూహాల గురించి స్టాలిన్ మాట్లాడుతూ.. 2024 లోక్సభ ఎన్నికల ఫలితాలు వచ్చినప్పటి నుంచే, 2026 అసెంబ్లీ ఎన్నికల కోసం డీఎంకే క్షేత్రస్థాయిలో గట్టిగా శ్రమించిందని గుర్తుచేశారు. బూత్ స్థాయి ఏజెంట్లను నియమించడం, ప్రాంతీయంగా వరుస సమావేశాలు నిర్వహించడం వంటి ఎన్నో జాగ్రత్తలు తీసుకున్నప్పటికీ తాము అధికారంలోకి రాలేకపోయామన్నారు. కానీ, కొందరు మాత్రం ఓటర్లను నేరుగా కలవకపోయినా, కనీసం బూత్ ఏజెంట్లను కూడా పెట్టుకోకపోయినా ఎన్నికల్లో గెలిచి ప్రభుత్వాన్ని ఏర్పాటు చేశారని టీవీకేను ఉద్దేశించి వ్యాఖ్యానించారు. ఇలాంటి
ప్రభుత్వం ఎక్కువ కాలం మనగలుగుతుందని తాను అనుకోవడం లేదన్నారు.
Tamil Nadu Politics | బీజేపీని అడ్డుకునేందుకే ఆ ప్రభుత్వానికి మద్దతు..
రాష్ట్రంలో రాష్ట్రపతి పాలన వచ్చే పరిస్థితిని నివారించాలనే ఏకైక లక్ష్యంతోనే.. టీవీకే ప్రభుత్వానికి మద్దతు ఇచ్చేందుకు తమ కూటమిలోని భాగస్వామ్య పక్షాలను అనుమతించామని స్టాలిన్ స్పష్టం చేశారు. ఒకవేళ తాము ఆ నిర్ణయం తీసుకోకపోయి ఉంటే తమిళనాడులో బీజేపీ పాలనకు మార్గం సుగమం అయ్యేదని ఆందోళన వ్యక్తం చేశారు. తమ కూటమిలోని పార్టీలు ఇచ్చిన మద్దతు వల్లే ప్రస్తుత ప్రభుత్వం నడుస్తోందనే విషయాన్ని గుర్తుంచుకోవాలని స్టాలిన్ పేర్కొన్నారు.
ఇది కూడా చదవండి: Harish Rao Revanth Reddy | హిట్లర్కు పట్టిన గతే సీఎం రేవంత్కు పడుతుంది : హరీశ్రావు
