అక్షరటుడే, వెబ్డెస్క్: Telangana Rakshana Sena 1 | మాజీ ఎమ్మెల్సీ కే. కవిత ప్రతిపాదించిన ‘తెలంగాణ రక్షణ సేన’ రాజకీయ పార్టీ నమోదు ప్రక్రియలో కీలక పరిణామం చోటుచేసుకుంది. పార్టీ నమోదుకు సంబంధించి భారత ఎన్నికల సంఘం (ECI) జారీ చేసిన నోటీసుకు కవిత తరఫు నుంచి అధికారికంగా స్పందించారు.
Telangana Rakshana Sena 1 | అభ్యంతరాల పూర్తి కాపీలు అందజేయాలంటూ..
ఎన్నికల సంఘం నిబంధనల ప్రకారం కొత్త రాజకీయ పార్టీ నమోదుకు దరఖాస్తు వచ్చిన అనంతరం, ఆ పార్టీ పేరు, ఇతర అంశాలపై ఎవరైనా అభ్యంతరాలు వ్యక్తం చేసే అవకాశం ఉంటుంది. ఈ నేపథ్యంలో తెలంగాణ రక్షణ సేన నమోదుపై అందిన అభ్యంతరాలను పరిశీలిస్తున్న ఎన్నికల సంఘం, వాటికి సంబంధించి వివరణ ఇవ్వాలని నోటీసు జారీ చేసినట్లు తెలిసింది.
దీనిపై స్పందించిన కే. కవిత తరఫు ప్రతినిధులు, తమకు అందిన నోటీసుకు సమాధానంగా అభ్యంతరాల పూర్తి కాపీలను అందజేయాలని ఎన్నికల సంఘాన్ని కోరారు. అలాగే, తమ వాదనలను ప్రత్యక్షంగా వినిపించుకునేందుకు వ్యక్తిగత విచారణ (పర్సనల్ హియరింగ్) నిర్వహించాలని కూడా విజ్ఞప్తి చేశారు.
Telangana Rakshana Sena | తెలంగాణ రక్షణ సేనకు గుర్తింపు ఇవ్వండి.. ఈసీకి కవిత లేఖ
Telangana Rakshana Sena 1 | అవసరమైతే వ్యక్తిగత విచారణ
అభ్యంతరాల పూర్తి వివరాలు అందిన తర్వాత వాటిపై చట్టపరంగా, వాస్తవాల ఆధారంగా సమగ్ర వివరణ సమర్పిస్తామని కవిత తరఫు వర్గాలు తెలిపాయి.
ఇదిలా ఉండగా, భారత ఎన్నికల సంఘం రాజకీయ పార్టీల నమోదు ప్రక్రియను నిర్దిష్ట నిబంధనల ప్రకారం నిర్వహిస్తుంది. అభ్యంతరాలు, దరఖాస్తుదారుల వివరణలు, సంబంధిత పత్రాలను పరిశీలించిన అనంతరం అవసరమైతే వ్యక్తిగత విచారణ నిర్వహించి తుది నిర్ణయం వెల్లడిస్తుంది.
తెలంగాణ రక్షణ సేన నమోదు అంశం ప్రస్తుతం ఎన్నికల సంఘం పరిశీలనలో ఉండగా, తదుపరి విచారణ అనంతరం ఈసీఐ నిర్ణయం వెలువడే అవకాశం ఉంది.
